كوشە كەزگەن جەتكىنشەك قىلمىسقا ءۇيىر

كوميسسيا باسقوسۋىندا قا­لا­لىق پوليتسيا دەپارتامەنتى باستىعىنىڭ ءبىرىنشى ورىنباسارى ە.ابدرامانوۆ جاسوسپىرىمدەر اراسىنداعى قۇقىق بۇزۋشىلىق جونىندە بايانداما جاسادى.

– شىمكەنت قالاسى پوليتسيا دەپارتامەنتى تاراپىنان قۇقىق بۇزۋشىلىقتىڭ الدىن الۋ بويىنشا شارالار قولعا الىنىپ كەلەدى. سونىمەن بىرگە وسى باعىتتا ارنايى رەيدتەر ۇيىمداستىرىلۋدا. بالا­لار­دىڭ اتا-انالارىنا دا دەپارتامەنت ماماندارى تۇراقتى تۇر­دە ءتۇسىندىرۋ جۇمىستارىن جۇر­گىزىپ وتىرادى. ەسەپتى كەزەڭ ارا­لىعىندا ياعني, جىل باسىنان بەرى 4 333 جاسوسپىرىمگە قاتىستى اكىم­شىلىك شارا قولدانىلدى. اسىرەسە تۇنگى ۋاقىتتا, ساعات 23.00-دەن كەيىن اتا-اناسىنىڭ باقىلاۋىنسىز كوشە كەزەتىن جاس جەتكىنشەكتەر ءتارتىپ ساق­شىلارىنىڭ نازارىنا ءتۇسىپ قالىپ جاتادى. پوليتسەيلەردىڭ ۇيىمداستىرعان ءىس-شارالارى بارىسىندا ءتۇرلى ويىن-ساۋىق ورىندارىندا وسىنداي ءبىراز ءجاسوسپىرىم انىقتالدى.

باس-اياعى 2 ايدىڭ ىشىندە, قىركۇيەك پەن قازان ايلارىندا تۇنگى ۋاقىتتا اتا-اناسىز كوشەگە شىققان 658 ءجاسوسپىرىم ۇستالدى. الاڭداتارلىق جايت, ولاردىڭ جارتىسىنا جۋىعى – ءالى مەكتەپتە وقيتىن وقۋشىلار.

سونداي-اق جىل باسىنان بەرى اتا-اناسىنىڭ رۇقساتىنسىز ۇيى­نەن كەتىپ قالا بەرەتىن 3 ءجاس­­وس­پىرىم انىقتالدى. جەت­كىن­شەك­تەر سوت شەشىمىمەن تا­راز قالا­سىنداعى ارنايى مەك­تەپكە اۋىستىرىلدى. بالا تاربيەسىندەگى مىندەتىن ورىنداماعان 5 اتا-انانىڭ قۇقىقتارى شەكتەلدى. قاداعالاۋسىز جۇرگەن 195 بالا ەندى كامەلەتكە تولماعانداردى بەيىمدەۋ ورتالىعىندا تار­بيە­لە­نەدى, – دەدى پوليتسيا وكىلى ەرماحان ءادىلحان ۇلى.

سونداي-اق ە.ابدرامانوۆ ستاتيستيكالىق مالىمەتتەن جاق­سى دەرەكتەردى دە كەلتىردى. ماسە­لەن, پوليتسيا دەپارتامەنتى وكىلىنىڭ حابارلاۋىنشا, وسى جىلدىڭ 10 ايىندا كامەلەتكە تولماعاندار اراسىندا جاسال­عان قىلمىس 38 پايىزعا تومەن­دەگەن. وسى رەتتە دەپارتامەنت ماماندارى كامەلەتكە تول­ما­عان جاسوسپىرىمدەر اراسىندا تىركەلگەن قىلمىستاردىڭ ار­قاي­سىسىن زەرتتەپ-زەردەلەگەن. سونىڭ قورىتىندىسىنا قا­راي 60 قىلمىسقا قاتىسى بار 74 ءجاسوسپىرىمنىڭ 12,2 پايىزى – مەكتەپ وقۋشىسى, 9,5 پايىزى – كوللەدج ستۋدەنتى, 78,3 پايىزى مەكتەپ بىتىرگەننەن كەيىن وقۋعا تۇسە الماي قالعان جانە ەش جەردە تۇراقتى جۇمىس ىستەمەيتىن جاس جەتكىنشەكتەر ەكەنى بەلگىلى بولدى.

قالا اكىمىنىڭ ءبىرىنشى ورىن­باسارى شىڭعىس مۇقان جاس­وسپىرىمدەر اراسىنداعى قىلمىس ازايعانىمەن بۇل ماسەلە ءالى دە قوعامدى الاڭداتاتىنىن ايتادى. وسى تۇستا انىق بول­عانداي, وقۋشىلارعا قاتىستى نەمەسە وقۋشىلار تاراپىنان جاسالاتىن قىلمىس اتاۋلى ادەتتە مەكتەپتەگى وقۋ مەرزىمىنەن تىس ۋاقىتتا بولادى ەكەن. بۇل جاعدايدا, اري­نە, مەكتەپ اكىمشىلىگى ونداي بۇزاقى وقۋشىلاردىڭ ارە­كە­تى­نە جاۋاپتى ەمەس. بۇل جەردە ءبىرىنشى كىنا – اتا-انانىڭ جاۋاپسىزدىعىندا. سوندىقتان بالا تاربيەسىنە ەڭ الدىمەن قىلمىسقا, زاڭ بۇزۋشىلىققا بارعان جەتكىنشەكتىڭ اتا-اناسى جاۋاپ بەرۋى ءتيىس. دەي تۇر­عانمەن, مەكتەپتە بەرىلگەن جاق­سى تاربيە وقۋشىنىڭ مەكتەپتەن تىس ۋاقىتتاعى مىنەز-قۇل­قىنا, ءجۇرىس-تۇرىسىنا وڭ اسە­رىن تيگىزەتىن كورىنەدى. سول سە­بەپتى مامانداردىڭ پىكىرىنشە, مەك­تەپتەگى ۇستازدار مەن اتا-انالار ءبىرىنشى كەزەكتە بالالاردىڭ تار­بيەسىمەن اينالىسىپ, وسى ما­سەلەگە كوپ كوڭىل بولگەندەرى دۇ­رىس.

قالالىق اكىمدىكتە وتكەن كو­ميسسيا وتىرىسىندا, سونداي-اق, تاراز قالاسىنداعى بالالار مەن جاسوسپىرىمدەردىڭ ارناۋلى مەكتەبىنە قاتىستى ماسەلە قارالدى. ناقتى ايتقاندا اتالعان ءبىلىم وشاعىنا 4 ءجاسوسپىرىمدى ورنالاستىرۋعا بايلانىستى جاع­داي تالقىلاندى. وسىدان كەيىن كوميسسيالىق باسقوسۋ كامە­لەت­كە تولماعان بالالار مەن ولار­دىڭ اتا-انالارىنا قاتىستى جەكەلەگەن ماسەلەلەردى قاراۋ مەن ولاردى شەشۋ جولدارى بويىنشا «جابىق ەسىك» جاعدايىندا جالعاستى.

شىمكەنت