الدا كەلە جاتقان كەزەكتەن تىس پرەزيدەنت سايلاۋىندا الماتى تۇرعىندارى تىركەۋدە بار-جوعىنا قاراماستان, داۋىس بەرە الادى. زاڭنامادا ۋاقىتشا نەمەسە تۇراقتى تىركەلگەن ازاماتتار داۋىس بەرە الاتىنى انىق جازىلعان.
قازىرگى سايلاۋ ناۋقانىنا دەيىن تۇراقتى تىركەۋى جوق قازاقستاندىقتاردىڭ داۋىس بەرۋىنە جول بەرىلمەي كەلدى. ۇكىمەت قاۋلىسىمەن ىشكى ميگرانتتاردى تىركەۋ قاعيدالارىنا وزگەرىستەر ەنگىزىلدى, بۇل ازاماتتاردىڭ ءتىپتى سايلاۋ كۇنى تىكەلەي سايلاۋ ۋچاسكەسىندە تىركەلۋىنە مۇمكىندىك بەرەدى.
«قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا سايكەس ازاماتتى سايلاۋ قۇقىعىن جۇزەگە اسىرۋ جانە سايلاۋشىلار تىزىمىنە ەنگىزۋ ماقساتىندا تۇرعىلىقتى جەرى بويىنشا تىركەۋدەن شىعارىلعان ادامداردى تىركەۋ تۇرعىن ءۇي, عيمارات نەمەسە ءۇي-جاي يەسىنىڭ ءوتىنىشى نەگىزىندە داۋىس بەرۋ كۇنى سايلاۋ ۋچاسكەسىنىڭ مەكەنجايى بويىنشا عيماراتقا نەمەسە ءۇي-جايعا تىركەۋگە رۇقسات ەتىلەدى», دەلىنگەن ىشكى ميگرانتتاردى تىركەۋدىڭ جاڭارتىلعان قاعيدالارىندا.
وسىلايشا, تىركەۋى جوق الماتىلىقتار مەن باسقا وڭىرلەردىڭ تۇرعىندارى 20 قاراشا كۇنى سايلاۋدا داۋىس بەرە الادى.
سايلاۋ كۇنى ءاربىر اۋداندا ارنايى ۋچاسكەلىك سايلاۋ كوميسسيالارى جۇمىس ىستەيدى, ولار ارقىلى داۋىس بەرۋ ءۇشىن ءبىر كۇنگە تىركەلۋگە بولادى. كەلەسى كۇنى, 21 قاراشادا جۇيە سايلاۋ ۋچاسكەسىنىڭ مەكەنجايى بويىنشا تىركەلگەن ازاماتتاردى ەسەپتەن شىعارادى. سايلاۋ كۇنى الماتىدا 55 سايلاۋ ۋچاسكەسى جۇمىس ىستەيدى, قالادا تىركەۋى جوق بولعان جاعدايدا ولارعا تىركەلىپ, داۋىس بەرۋگە بولادى. بۇل تۋرالى وكق بريفينگىندە الماتى قالاسى اۋماقتىق سايلاۋ كوميسسياسىنىڭ ءتورايىمى جاننا اسانوۆا مالىمدەدى.
الماتى