قر پارلامەنتى سەناتى «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭدى قابىلدادى, دەپ حابارلايدى Egemen.kz.
2022 جىلعى 24 تامىزدا استانادا قازاقستان مەن حالىقارالىق قايتا قۇرۋ جانە دامۋ بانكى (حقدب) اراسىندا 345,7 ميلليون ەۋرو كولەمىندە نەسيە بەرۋ تۋرالى كەلىسىمگە قول قويىلدى.
«نەسيە تولىعىمەن بيۋدجەت تاپشىلىعىن قارجىلاندىرۋعا جۇمسالادى. قارىز قاراجاتى قابىلدانعان بيۋدجەت شىعىستارىن, ونىڭ ىشىندە الەۋمەتتىك جانە باسقا دا باسىم ماقساتتارعا باعىتتالعان شىعىستاردى قولداۋعا مۇمكىندىك بەرەدى. نەسيە قازاقستانعا وتەۋ مەرزىمى 11,5 جىل, ونىڭ ىشىندە 2,5 جىل جەڭىلدىك كەزەڭى. سىياقى مولشەرلەمەسى نەسيە سوماسىنىڭ 0,25 پايىزىن, يگەرىلمەگەن نەسيە سوماسى ءۇشىن رەزەرۆتىك كوميسسيانىڭ 0,25 پايىزىن قۇرايدى. تارتىلعان نەسيەگە قىزمەت كورسەتۋ جانە وتەۋ رەسپۋبليكالىق بيۋدجەت ەسەبىنەن جۇزەگە اسىرىلادى», دەدى قارجى ءمينيسترى ەرۇلان جاماۋباەۆ سەنات وتىرىسىندا.
زاڭ ەل پرەزيدەنتىنىڭ قول قويۋىنا جىبەرىلەدى.
ايتا كەتەيىك, حالىقارالىق قايتا قۇرۋ جانە دامۋ بانكى دۇنيەجۇزىلىك بانكتىڭ نەگىزگى نەسيەلىك ينستيتۋتى بولىپ تابىلادى.