جەتىسۋدا وبلىس ورتالىعىنان شالعاي جاتقان ەلدى مەكەندەر جەتىپ ارتىلادى. سول سەبەپتى كەيبىر اۋىلدار جىلجىمالى مەديتسينالىق كەشەننىڭ كومەگىنە ءزارۋ. وسى ورايدا قالادان الىس ورنالاسقان اۋىل تۇرعىندارىنا ساپالى مەديتسينالىق كومەك كورسەتۋ ماقساتىندا بەيىندى مامانداردان قۇرىلعان توپ 10 ايدا 62 066 ادامدى تەكسەرۋدەن وتكىزگەن. ونىڭ ىشىندە 7 604-ءى بالا ەكەن.
اق جەلەڭدىلەر 158 اۋدان مەن اۋىلداردى ارالاپ, تۇرعىنداردىڭ دەنساۋلىعىن باقىلاپ قايتقان. ءتىپتى, قولدا بار ەم-دوم امالدارىن دا جاساعان. قۇرامىندا تەراپەۆت, گينەكولوگ, نەۆروپاتولوگ, لور جانە ۋلترادىبىستىق زەرتتەۋ جۇرگىزۋ ماماندارى بار جىلجىمالى مەديتسينالىق كەشەن اۋىل تۇرعىندارىنا 24 700 دياگنوستيكالىق, 21 805 زەرتحانالىق زەرتتەۋ جانە 52 206 كونسۋلتاتسيالىق كومەك كورسەتكەن.
وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەڭگىروۆتىڭ ايتۋىنشا, بۇل شارالار اۋرۋدىڭ الدىن الۋ ماقساتىندا ۇيىمداستىرىلىپ كەلەدى.
«جىلجىمالى مەديتسينالىق كەشەن ازاماتتاردىڭ دەنساۋلىعىن كەڭ سپەكترلى تەكسەرۋدەن وتكىزۋگە ارنالعان. بۇل جوبانىڭ باستى ەرەكشەلىگى, كەز كەلگەن اۋىل تۇرعىنى مامانداردىڭ تەكسەرۋىنەن ءوتىپ, كەڭەس الۋعا مۇمكىندىگى بار. ياعني ماقساتىمىز – اۋرۋدى باستاپقى كەزەڭىندە انىقتاپ, ەمدەۋ. ءبىر ايتا كەتەرلىگى, اتالعان كەشەن قىستا اۋا رايىنىڭ قولايسىزدىعىنا بايلانىستى كوكتەم مەن كۇز مەرزىمدەرى ارالىعىندا جولعا شىعىپ, تۇرعىنداردى تەكسەرۋدەن وتكىزەدى», دەيدى ا.جانسەڭگىروۆ.
جۇرگىزىلگەن تەكسەرۋلەر ناتيجەسىندە وبلىستا 949 ادامنان ءارتۇرلى اۋرۋ بەلگىلەرى انىقتالىپ, تولىق تەكسەرۋگە جولداما بەرىلگەن. ايتا كەتەيىك, وڭىردە 8 جىلجىمالى مەديتسينالىق كەشەن بار. جالپى, كەشەن تالداۋلاردى قابىلداۋ ايماعى, فۋنكتسيونالدى دياگنوستيكا, اكۋشەر-گينەكولوگ, سونداي-اق ساۋلەلىك دياگنوستيكا كابينەتتەرىنەن تۇرادى.
جەتىسۋ وبلىسى