«قاڭتار قاسىرەتى» بىزگە سىناق قانا ەمەس, ۇلكەن ساباق بولدى - پرەزيدەنت

«ۋاقىت – ەمشى» دەيدى حالقىمىز. قاسىرەتتى كۇندەر الىستاعان سايىن بىرتىندەپ كومەسكى تارتا بەرەتىنى انىق. قارۋلى توپتاردىڭ قالاي ويران سالعانى دا ەستەن شىعۋى مۇمكىن. بىراق, ءبىز ەل ىشىنە جىك سالعىسى كەلەتىن ارانداتۋشىلاردىڭ جەتەگىندە كەتپەۋىمىز كەرەك. كوشەگە شىعىپ, بۇزاقىلىق جاساعان ادامداردى دارىپتەپ, قولدان قاھارمان جاساۋعا بولمايدى. قاستاڭدىق ۇيىمداستىرعان قاراقشىلاردىڭ قىلمىسىن اقتاۋعا جول بەرىلمەيدى. ولاردىڭ ءبارى لايىقتى جازاسىن الادى», دەدى پرەزيدەنت.

ءسوزىن جالعاي كەلە, مەملەكەت باسشىسى قاڭتار ايىنداعى قارالى كۇندەردە قايتىس بولعان ادامداردىڭ وتباسىلارىنا تاعى دا كوڭىل ايتتى.

«وسى تۇستا قىلمىسكەرلەردىڭ قولشوقپارى بولعان, ارانداپ قالعان جاندار دا بار. مەن اۋىر قىلمىس جاساماعان وسىنداي ازاماتتارعا كەشىرىممەن قاراعان ءجون دەپ شەشتىم. وسىعان وراي, راقىمشىلىق تۋرالى زاڭ قابىلداندى. بۇل – ادامگەرشىلىك تۇرعىدان دۇرىس قادام. ويتكەنى, كەشىرىم – ىزگىلىكتىڭ بەلگىسى. قاجەتتى زاڭدىق راسىمدەر كەيىن راقىمشىلىق جاسالعان ادامدار بوساتىلىپ, وتباسىنا ورالادى. بۇدان بىلاي مۇنداي قاسىرەت قايتالانبايدى دەپ سەنەمىن. سول ءۇشىن ءبىز قولدان كەلگەننىڭ ءبارىن جاسايمىز. قايعىلى كۇندەردە قازا بولعان جانداردىڭ جاقىندارىنا تاعى دا كوڭىل ايتامىن», دەپ اتاپ ءوتتى قاسىم-جومارت توقاەۆ.

بۇل رەتتە پرەزيدەنت قيىن ساتتەردە وتانىنا ادال بولعان قۇقىق قورعاۋ ورگاندارىنىڭ قىزمەتكەرلەرىنە العىسىن ءبىلدىردى.

«سىن ساعاتتا انتقا ادال بولعان قۇقىق قورعاۋ جانە كۇشتىك قۇرىلىمداردىڭ قىزمەتكەرلەرىن ەرەكشە اتاپ وتكىم كەلەدى. قوعامدىق ءتارتىپتى قالپىنا كەلتىرۋگە قالا تۇرعىندارى دا اتسالىستى. وسىنداي جاناشىر ازاماتتاردىڭ بارىنە ريزاشىلىعىمدى بىلدىرەمىن. «قاڭتار قاسىرەتى» بىزگە سىناق قانا ەمەس, ۇلكەن ساباق بولدى. تىنىشتىق پەن تۇراقتىلىقتىڭ قادىرىن جۇرتىمىز جەتە ءتۇسىندى. ال, قوعامعا ىرىتكى سالۋدى كوزدەگەن قاراقشىلاردىڭ, لاڭكەستەردىڭ ماقساتى ورىندالعان جوق. كەرىسىنشە, حالقىمىزدىڭ بىرلىگى نىعايا ءتۇستى. ۇيىسىپ, جان-جاقتى جاڭعىرۋ جولىنا قادام باستى», دەپ تۇيىندەدى مەملەكەت باسشىسى.