قازاقستانعا ءومىر جولىن عىلىمعا ارناعان, ناقتى عىلىمي جەتىستىگى بار ادامدار كەرەك. بۇل تۋرالى مەملەكەت باسشىسى قاسىم-جومارت توقاەۆ الماتى جۇرتشىلىعىمەن وتكەن جيىندا ايتتى, دەپ حابارلايدى Egemen.kz.
زاماناۋي قوعامدا وتاندىق عىلىمدى دامىتۋ - وزەكتى ماسەلەلەردىڭ ءبىرى. الايدا عىلىم سالاسىندا جاس ماماندار وتە از. پرەزيدەنتتىڭ ايتۋىنشا, عىلىم اكادەمياسىنا عىلىمعا جانى اشيتىن, عىلىمي الەۋەتى زور ازاماتتاردى كوپتەپ تارتۋ قاجەت.
«الماتى – عىلىم مەن ءبىلىمنىڭ ورداسى. وتاندىق عىلىمدى دامىتۋ ماسەلەسى – ۇنەمى مەنىڭ جەكە نازارىمدا. بۇل سالانىڭ ەلىمىز ءۇشىن ايرىقشا ءمانى بار. سەبەبى, عىلىمنىڭ بۇگىنگى دامۋى – ەلدىڭ ەرتەڭگى تابىسىنىڭ كەپىلى. وكىنىشكە قاراي, بىزدە عىلىمدى باسقارۋ ءىسى جولعا قويىلماعان. مەن بۇل تۋرالى ۇلتتىق اكادەميانىڭ 75 جىلدىعىنا ارنالعان جيىندا ايتتىم. بۇگىندە وتاندىق عىلىمدا جاس عالىمداردىڭ سانى كوپ ەمەس. دامۋعا سەرپىن بەرەتىن الەۋەتتى عىلىمي ينستيتۋتتار دا وتە از. ەگەر الەمدىك دامۋدا كوش سوڭىندا قالمايمىز دەسەك, ەڭ الدىمەن, عىلىمدى دامىتۋىمىز كەرەك. سوندىقتان, ۇلتتىق عىلىمدى جاڭا دەڭگەيگە كوتەرەتىن مەزگىل جەتتى. جاسىراتىنى جوق, قازىر عىلىمي اتاعى بار, بىراق ءىلىم-بىلىمگە مۇلدە قاتىسى جوق ادامدار كوبەيىپ كەتتى. ەلىمىزگە ءومىر جولىن عىلىمعا ارناعان, ناقتى عىلىمي جەتىستىگى بار ادامدار كەرەك. وتاندىق عالىمدار قۇرامىن جاڭارتۋ قاجەت. بۇل – ۋاقىت تالابى. ناعىز عىلىمعا مۇلدەم قاتىسى جوق ادامداردان ارىلۋىمىز قاجەت. ولاردان ەشقانداي پايدا جوق, عىلىمعا كەرى اسەرى تيەدى. سوندىقتان, عىلىم اكادەمياسىنا عىلىمعا جانى اشيتىن, عىلىمي الەۋەتى زور ازاماتتاردى عانا كوپتەپ تارتۋ قاجەت», دەپ اتاپ ءوتتى مەملەكەت باسشىسى.
جيىن بارىسىندا قاسىم-جومارت توقاەۆ وتاندىق عىلىمدى دامىتۋ ماقساتىندا پرەزيدەنت جانىنان عىلىم مەن تەحنولوگيا ماسەلەلەرى جونىندە ۇلتتىق كەڭەس قۇرىلاتىنىن مالىمدەدى.
ء«بىز عىلىم مەن ءوندىرىستى ۇشتاستىرۋ تۋرالى ءجيى ايتامىز. بىراق ونداي بايلانىس ءالى دە ورنىققان جوق. اششى بولسا دا, مۇنى مويىنداۋىمىز كەرەك. وتاندىق ءوندىرىستى وركەندەتۋ ءۇشىن عىلىمي يننوۆاتسيالار, جاڭالىقتار قاجەت. عالىمدارىمىزدىڭ ەڭبەگى ساپالى ءونىم شىعارۋعا نەمەسە ءوندىرىستى ءتيىمدى ەتۋگە ءتيىس. سوندا عانا ەكونوميكامىز داميدى. وسى ورايدا, مەن تاعى ءبىر ماڭىزدى باستاما – پرەزيدەنت جانىنان عىلىم مەن تەحنولوگيا ماسەلەلەرى جونىندە ۇلتتىق كەڭەس قۇرۋ جونىندە شەشىم قابىلدادىم. وعان ەڭبەكتەرى جۇرتشىلىققا كەڭ تانىمال, عىلىمي ورتادا وتە بەدەلدى عالىمدارىمىز مۇشە بولادى. بۇل قۇرىلىم عىلىم مەن تەحنولوگيا سالاسىنداعى ساياساتتىڭ باسىمدىقتارىن ايقىندايدى. پرەزيدەنت اكىمشىلىگى, عىلىم جانە جوعارعى ءبىلىم مينيسترلىگى ءتيىستى جۇمىستى ۇيىمداستىرۋى قاجەت. بۇل ماسەلە مەنىڭ ءجىتى نازارىمدا», دەپ تۇيىندەدى ەل پرەزيدەنتى.