قازاقستان فۋتبول فەدەراتسياسى ۇلتتىق قۇرامانىڭ باس جاتتىقتىرۋشىسى ماگومەد اديەۆپەن كەلىسىمشارتتىڭ ۇزارتىلعانىن مالىمدەدى. جاڭا كەلىسىم 2024 جىلدىڭ سوڭىنا دەيىن جوسپارلانعان.
رەسەيلىك ماماننىڭ ءساۋىر ايىندا عانا باس كوماندانىڭ تىزگىنىن ۇستاپ, ساناۋلى ايدىڭ ىشىندە قازاقستان قۇراماسىن تولايىم تابىسقا جەتكىزگەنىن جانكۇيەر جۇرت جاقسى بىلەدى. سوندىقتان دا قفف باسشىلىعى تاجىريبەلى ماماننان وڭاي ايىرىلعىسى كەلمەي, اديەۆپەن كەلىسىمشارتىن تاعى ەكى جىلعا ۇزارتتى. جىل باسىندا قالت-قۇلت ەتىپ ۇلتتار ليگاسىنىڭ «س» ديۆيزيونىنداعى ورنىن ارەڭ ساقتاپ قالعان قازاقستان قۇراماسىن ول ءتورت ايدىڭ ىشىندە «ۆ» ليگاسىنا الىپ شىقتى.
اتالعان تۋرنيردە قازاقستان ۇلتتىق قۇراماسى التى ويىن وتكىزىپ, سونىڭ تورتەۋىندە جەڭىسكە جەتتى. ءبىر ويىندا قارسىلاستارىمەن تەڭ تۇسسە, تاعى ءبىر ماتچتا جەڭىلىپ قالدى. توپتىق كەزەڭنىڭ التى ماتچىندا جەرلەستەرىمىز قارسىلاستارى قاقپاسىنا سەگىز گول سوعىپ, ءوز قاقپاسىنا التى گول وتكىزىپ العان.
ايتا كەتەيىك, ماگومەد اديەۆ باسشىلىعىنداعى قازاقستان قۇراماسى بۇگىن تاشكەنتتە وزبەكستانمەن, 19 قاراشادا بىرىككەن اراب امىرلىكتەرىمەن جولداستىق ماتچ وتكىزەدى.