قۇرلىقتىق حوككەي ليگاسىنداعى (قحل) كەلەسى كەزدەسۋىن استانانىڭ «بارىسى» وفەدە جەرگىلىكتى «سالاۆات يۋلاەۆپەن» وتكىزدى.
«شىعىس» كونفەرەنتسياسىنىڭ تۋرنير كەستەسىندە ەكىنشى ورىندا كەلە جاتقان «سالاۆات يۋلاەۆ» وتكەن تۋردا ءوز ايدىنىندا ومبىنىڭ «اۆانگاردىنا» بۋلليتتە ەسە جىبەرگەن بولسا, بۇل جولى «بارىستان» باسىم تۇسە المادى. كەيىنگى ءتورت ماتچتىڭ تەك بىرەۋىندە عانا جەڭىسكە جەتكەن جەرلەستەرىمىز وفەدە ءتاۋىر ويىن كورسەتتى. باسەكەنىڭ العاشقى كەزەڭىندە ەسەپ اشىلماسا دا, «بارىس» حوككەيشىلەرى بەلسەندى وينادى.
ۇزىلىستەن كەيىن دە قارقىنىن جوعالتپاعان ەلوردالىقتار ەكىنشى كەزەڭنىڭ سوڭعى مينۋتىندا گول سوعىپ, ەسەپتە العا شىقتى. كانادالىق قورعاۋشى دجەسسي گرەمنەن تاماشا پاس العان ەگور پەتۋحوۆ نىسانانى ءدال كوزدەدى. ءۇشىنشى كەزەڭدە دە باسىمدىققا يە بولعان جەرلەستەرىمىز ماتچتىڭ سوڭعى مينۋتىندا ەكىنشى شايبانى سوقتى. گولدىڭ اۆتورى – اركادي شەستاكوۆ. «بارىس» وسى جەڭىسىنەن كەيىن تۋرنير كەستەسىندە پلەي-وفف ايماعىنا قايتا ورالدى.
استانالىقتار كەلەسى كەزدەسۋىن بۇگىن سىرت ايدىندا ەكاتەرينبۋرگتىڭ «اۆتوموبيليست» كلۋبىمەن وتكىزەدى.