9 قاراشادا قازاقستاندا باستالعان «قۇقىقتىق ءتارتىپ» جەدەل-پروفيلاكتيكالىق ءىس-شاراسى كەزىندە سولتۇستىكقازاقستاندىق پوليتسەيلەر مىڭنان استام ۇيلەردى, ساياجايلار مەن قاراۋسىز قالعان عيماراتتاردى ارالاپ شىقتى, 200-گە جۋىق جالدامالى پاتەردى تەكسەردى, دەپ حابارلايدى Egemen.kz.
پروفيلاكتيكالىق ەسەپتە تۇرعان 1330-دان استام ادام, ونىڭ ىشىندە 164 قولايسىز وتباسىنىڭ جاي-كۇيى بارلاندى. ناتيجەسىندە مىڭعا جۋىق ءتۇرلى اكىمشىلىك قۇقىق بۇزۋشىلىق انىقتالدى. ولاردىڭ باسىم بولىگى – تىركەۋسىز نەمەسە جەكە باسىن كۋالاندىراتىن قۇجاتتارسىز تۇرعان. ولاردىڭ جالپى سانى - 222. بۇلاردان باسقا پوليتسەيلەر الكوگولدى ىشىمدىكتەردى ءىشۋدىڭ جانە قوعامدىق ورىنداردا ماس كۇيدە ءجۇرۋدىڭ 199, ۇساق بۇزاقىلىقتىڭ 88 فاكتىسىن تىركەدى.
جول قاۋىپسىزدىگىن قامتاماسىز ەتۋگە دە ەرەكشە ءمان بەرىلدى. ءىس-شارا شەڭبەرىندە 180 بۇزۋشىلىق جاياۋ جۇرگىنشىلەر تاراپىنان انىقتالدى. جىلدامدىقتى اسىرۋدىڭ 58 فاكتىسى تىركەلدى. تەكسەرىس جۇرگىزگەن 2 كۇندە 11 جۇرگىزۋشىنىڭ رولگە ىشىمدىك ءىشىپ الىپ وتىرعانى انىقتالدى. قانداي قاتاڭ شارالار قولدانىلىپ, جۇرگىزۋشىلىك كۋالىكتەرىنەن ايرىلىپ, ءتىپتى باس بوستاندىعى شەكتەلىپ جاتسا دا جۇرگىزۋشىلەر رولگە ءىشىپ الىپ وتىرۋىن توقتاتار ەمەس.