قفف ماگومەد اديەۆپەن كەلىسىمشارتتى ۇزارتتى, دەپ حابارلايدى Egemen.kz.
«قازاقستان قۇراماسىنىڭ ۇلتتار ليگاسىنداعى جەڭىسى وتاندىق فۋتبولدىڭ تاريحىنا ەندى. تاجىريبەلى باپكەر ماگومەد مۇسا ۇلىن شاقىرىپ, العاشقى مىندەتتەردى ورىنداي الدىق. ءبىزدىڭ باستى ماقسات ءالى جۇزەگە اسىرىلعان جوق. الدا 2024 جىلعى ەۋروپا چەمپيوناتىنىڭ ىرىكتەۋ كەزەڭى مەن وتپەلى ويىندار كۇتىپ تۇر. باستالعان جۇمىستى ءارى قاراي جالعاستىرعىمىز كەلەدى. ول ءۇشىن ءبىزدىڭ فۋتبولدى جاقسى جۇيەگە قويۋ قاجەت», دەپ اتاپ ءوتتى قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ.
م. اديەۆ قازاقستان فۋتبول فەدەراتسياسىنا سەنىم بىلدىرگەنى ءۇشىن, كومانداعا جانكەشتى ويىن كورسەتكەنى ءۇشىن, ال جانكۇيەرلەرگە قولداۋ كورسەتكەنى ءۇشىن العىسىن ايتتى.
ء«بىز ماۋسىمنىڭ باستى مىندەتى - «ۆ» ليگاسىنا شىعۋ جوسپارىن ورىندادىق. 2024 جىلعى ەۋروپا چەمپيوناتىنىڭ الداعى ويىندارىندا جاڭا جەتىستىكتەرگە جەتۋ ءۇشىن كوماندامەن جۇمىستى جالعاستىرعىم كەلەدى. العا قويىلعان مىندەتتەردى جۇزەگە اسىرۋ ءۇشىن بار كۇشىمىزدى سالامىز», دەيدى قازاقستان قۇراماسىنىڭ باس باپكەرى ماگومەد اديەۆ.
ايتا كەتەيىك, ماگومەد اديەۆ قازاقستان ۇلتتىق قۇراماسىنىڭ باس باپكەرى بولىپ بيىل مامىر ايىندا تاعايىندالعان. ونىڭ جەتەكشىلىگىمەن قازاقستان قۇراماسى ءوز توبىندا ءبىرىنشى ورىن الىپ, ۋەفا ۇلتتار ليگاسىنىڭ ۆ ليگاسىنا شىقتى.
وسىلايشا, وتاندىق فۋتبول جانكۇيەرلەرىنىڭ كوڭىلىنەن شىققان باپكەر ۇلتتىق قۇرامادا قالاتىن بولدى.