قازاقستان اسكەرىنىڭ ەكى بوكسشىسى ازيا چەمپيوناتىنىڭ اقتىق سىنىنا جولداما الدى, دەپ جازادى Egemen.kz.
قورعانىس مينيسترلىگى ورتالىق سپورت كلۋبىنىڭ اتىنان قازاقستان قۇراماسىنىڭ كاپيتانى اسلانبەك شىمبەرگەنوۆ پەن ەڭبەك سىڭىرگەن سپورت شەبەرى ساكەن بيبوسىنوۆ يوردانيا استاناسى امماندا ءوتىپ جاتقان بوكستان ازيا بىرىنشىلىگىنىڭ جارتىلاي فينالدىق كەزدەسۋلەرىندە جەڭىسكە جەتتى.
51 كەلىگە دەيىنگى سالماقتا ساكەن بيبوسىنوۆ تورەشىلەردىڭ ءبىراۋىزدان شەشىمىمەن الەم چەمپيونى اتاعى بار جاپوندىق توموي تسۋبويدان باسىم ءتۇستى.
ال 71 كەلىگە دەيىنگى سالماقتا اسلانبەك شىمبەرگەنوۆ موڭعول بوكسشىسى بيامبەردەن وتگونبااتاردى جەڭدى.
الداعى اقتىق سايىستا اسكەر سپورتشىلارى ءبىرىنشى جۇلدە ءۇشىن جۇدىرىقتاسپاق.
ساكەن بيبوسىنوۆقا 2016 جىلى وليمپيادا چەمپيونى اتانعان وزبەكستاندىق حاسانبوي دۋسماتوۆ, ال اسلانبەك شىمبەرگەنوۆكە – يوردانيالىق زەياد يشايش قارسىلاس بولماق. شەشۋشى جەكپە-جەكتەر 12 قاراشادا وتەدى.