بۇل كۇندەرى ازەربايجاننىڭ باس شاھارى – باكۋدە پارادزيۋدودان الەم چەمپيوناتى ءوتىپ جاتىر. ءدۇبىرلى دودادا 41 مەملەكەتتەن كەلگەن 270 بالۋان باق سىناۋدا.
اتالعان جارىستا قازاقستان قۇراما كومانداسى وتە جاقسى ونەر كورسەتۋدە. العاشقى كۇنى اسا جەڭىل سالماقتا بەلدەسكەن اقمارال ناۋاتبەك (J-2) ءوز جانكۇيەرلەرىن قۋانتتى. بارلىق قارسىلاستارىن سىپىرا ۇتقان ول اقتىق سىندا پاراليمپيا ويىندارىنىڭ ەكى دۇركىن جۇلدەگەرى, كوپتەگەن اسا ءىرى حالىقارالىق جارىستىڭ جەڭىمپازى فرانتسيالىق اۋرەريەس مارتينەت ءساندريندى سان سوقتىردى. وسىلايشا, اقمارالدىڭ ەسىمى سپورتتىڭ وسى ءتۇرى بويىنشا ايەلدەر اراسىندا الەم چەمپيونى اتانعان قازاقستاننىڭ تۇڭعىش بالۋانى رەتىندە تاريحتا قالدى. كوماندالىق ارىپتەسىنىڭ جەڭىستى جولىن ەرعالي شامەي (J1) جالعاستىردى. 73 كيلو سالماق دارەجەسىندە كۇش سىناسقان قانداسىمىز فينالدا گەرمانيالىق ساسس لەنارتتىڭ اياعىن كوكتەن كەلتىرىپ, باس جۇلدەنى قانجىعاسىنا بايلادى.
سونداي-اق كوماندامىزدىڭ قورجىنىندا تاعى ءۇش قولا مەدال بار. ونىڭ يەگەرلەرى – دايانا فەدوسوۆا (J2 – 57 كيلو), ولجاس ورازالى ۇلى (J2 – 73 كگ) جانە جانبوتا امانجول (J2 -90 كيلو). باكۋدەگى باسەكەلەر بۇگىن ءوز مارەسىنە جەتەدى.