چەرنوگوريانى ءسۇرىندىردى

فيفا رەيتينگىندە ءتورتىنشى ورىندا تۇرعان قازاقستان قۇرا­ما­سىنىڭ فۋتزالشىلارى وسىدان ءبىر اي بۇرىن عانا چەرنو­گوريامەن شەبەرلىك بايقاسىپ, پودگوريتساداعى Verde Complex سپورت كەشەنىندە وتكەن ماتچتا الاڭ يەلەرىن 5:1 ەسەبىمەن تىزە بۇكتىرگەن بولاتىن. سول ويىندا جەر­لەستەرىمىزدەن لەو, ەدسون, ال­بەرت اقبالىقوۆ, تاينان جانە ارنولد كناۋب ءبىر-ءبىر مارتەدەن مەرگەندىگىمەن كوزگە تۇسكەن ەدى.

اراعا اي سالىپ, ەكى ەلدىڭ فۋت­زالشىلارى الماتىداعى با­لۋان شولاق اتىنداعى سپورت سارايىندا قايتا كەزدەستى. ءبىرجان ورازوۆ, داۋرەن تۇرساعۇلوۆ باس­تاعان قازاقستان قۇراماسىنىڭ جىگىت­تەر قارىمتا ماتچتا قارسى­لاستارى قاقپاسىنا جاۋاپسىز جەتى گول سوعىپ, ەكىنشى مارتە چەر­نو­گوريانىڭ تاس-تالقانىن شىعاردى.

ءبىر قۋانارلىعى, پودگو­ري­تساداعى باسەكەدە قازاقستان قۇرا­ماسى چەرنوگوريانى قازاقى­لانعان لەگيونەرلەردىڭ كومەگىمەن جەڭگەن بولسا, ءوز ەلىمىزدەگى باسەكەدە الاڭعا تۇگەلدەي قازاق جىگىتتەرى شىعىپ, قارسىلاستاردى ابدەن تىعىرىققا تىرەپ, ماتچ سوڭىندا ءىرى ەسەپپەن باسىم ءتۇستى. بۇل كەزدەسۋدە لەگيونەرلەردەن تەك دۋگلاس قانا الاڭعا شىقتى.

ال وزگە لەگيونەرلەر جارا­قاتتارىنا جانە باسقا دا سەبەپ­تەرگە بايلانىستى ۇلتتىق قۇرا­مانىڭ بۇل جولعى ويىنىنا شا­قىر­تىلعان جوق. ماسەلەن, تەك «قايراتتىڭ» عانا ەمەس, ۇلتتىق قۇرامانىڭ دا بەدەلدى ويىنشىلارى سانالاتىن قاقپاشى يگيتا مەن الاڭداعى ويىنشىلارى ەدسون جانە داۋرەن نۇرعوجين جاراقاتتارىنا بايلانىستى بۇل ماتچقا قاتىسا العان جوق. لەو مەن تايناننىڭ قۇراماعا نە ءۇشىن شاقىرىلماعانىن باس جاتتىقتىرۋشى كاكا بىلاي ءتۇ­سىندىردى: «لەوعا كەلەر بولساق, ول برازيليادان قازاقستانعا ۇشىپ كەلەمىن دەگەنشە ويىن ۋاقىتى ءوتىپ كەتەدى. سوندىقتان ونى اسىق­تىرعان جوقپىز. تايناننىڭ دا ءوز چەمپيوناتىنداعى ويىنى بار (ول قازىرگى تاڭدا يسپانيانىڭ «ەل-پوسو» كلۋبىنىڭ نامىسىن قورعايدى – ءا.ب.). ونىڭ دا قازاق­ستانعا جەتۋى ۇزاق جولدى قاجەت ەتەدى. ءتىپتى تاينان قازاقستانعا كەلگەن كۇننىڭ وزىندە دە تەك ويىن كۇنى جەتەدى. سول سەبەپتى ونىڭ دا قۇراماعا كەلگەنىن قاجەت ەمەس دەپ شەشتىك. وسى كەزدەسۋدە الاڭعا شىعاتىن باسقا دا جاس ويىنشىلار بار. بارلىعى ءوز مۇمكىندىگىن كۇتەتىنى انىق».

كاكا ول فۋتزالشىلاردىڭ ورنىنا «قايراتتان» نارۋن سە­رى­كوۆتى, «اياتتان» ءابدىراسۋل ءاب­دى­ماناپ ۇلىن, «كاسپيدەن» رايىمبەك جۇمانى, «راحمەتتەن» نۇرابەك قابىلباەۆتى, سونداي-اق اقتوبە فۋتبولىنىڭ تۇلەگى, بيىلعى چەمپيوناتتىڭ ۇزدىك سۇرمەرگەنى رينات تورەعازيندى ۇلتتىق قۇراماعا شاقىرتتى. بۇل ويىنشىلار بۇعان دەيىن دە ءار­تۇرلى كەزدەسۋلەردە ۇلتتىق قۇرا­مانىڭ جەيدەسىن كيگەن بولاتىن. ال 17 جاستاعى باتىرحان كەن­جەعالي («اقتوبە») العاش رەت نەگىزگى قۇراماعا شاقىرتۋ العانىن ايتا كەتەيىك.

ءسويتىپ, تەك قانا قازاقستاندىق فۋتزالشىلار ويناعان ماتچتا جەرلەستەرىمىز كەزدەسۋدىڭ ەسەبىن جىلدام اشتى. ماتچتىڭ نەبارى ەكىنشى مينۋتىندا وسى ويىنداعى جالعىز لەگيونەر – دۋگلاس كوزگە ءتۇسىپ, كەزدەسۋدەگى گولدار شوۋىن باستاپ بەردى. ارادا ءبىر مينۋت وتكەندە جاس ويىنشى ءابدىراسۋل ءابدىماناپ ۇلى ەسەپتى ەسەلەپ, ۇلتتىق قۇراماداعى العاشقى گولىن سوقتى. ءبىرىنشى تايمنىڭ اياقتالۋىنا بەس مينۋت قالعاندا ارنولد كناۋب مەرگەندىك تانىتىپ, ەسەپتى 3:0-گە جەتكىزدى.

ۇزىلىستەن كەيىن دە ريكاردو كاكا شاكىرتتەرى جىلدام گول سوعىپ, بالۋان شولاق سپورت كە­شەنىنە جينالعان جانكۇيەرلەردى قۋانىشقا بولەدى. 25-مينۋتتا البەرت اقبالىقوۆ نىسانانى ءدال كوزدەسە, ءتورت مينۋتتان كەيىن ەۋرو-2022 دوداسىنىڭ ۇزدىك سۇرمەرگەنى ءبىرجان ورازوۆ 12 سەكۋند ىشىندە قارسىلاستارىنىڭ قاقپاسىنان ەكى مارتە ساڭىلاۋ تاۋىپ, جىلدام سوعىلعان ءدۋبلدىڭ اۆتورى اتاندى. كەيىننەن ماتچ ءبىراز سايابىرسىپ قالعانداي بولدى. دەگەنمەن, 39-مينۋتتا شابۋىلشى ازات ۆاليۋللين ۇلتتىق قۇرامانىڭ جەتىنشى گولىن سوعىپ, ماتچتىڭ نۇكتەسىن قويدى – 7:0.

وسىلايشا, ىرىكتەۋ كەزەڭىندە قاتارىنان ءۇشىنشى ويىندا جەڭىسكە جەتكەن قازاقستان قۇراماسى توعىز ۇپايمەن ءوز توبىندا جەكە-دارا كوش باستادى. كەيىنگى ورىنعا ءۇش ۇپايى بار سلوۆەنيا جايعاسسا, بىردە-ءبىر ۇپايى جوق چەرنوگوريا سوڭعى ورىندا قالىپ قويدى. جەرلەستەرىمىز ىرىكتەۋدەگى كەلەسى كەزدەسۋىن 2023 جىلدىڭ 8 ناۋرىزىندا سىرت الاڭدا سلوۆەنيامەن وتكىزەدى. ەگەر, قازاقستان قۇراما­سى وسى ويىندا كەم دەگەندە تەڭ نا­تي­جەگە قول جەتكىزەتىن بولسا, وندا ەليتالى كەزەڭگە تىكەلەي جولداما الادى.

ەۋروپا فۋتبول قاۋىمداس­تىقتارى وداعىنىڭ (ۋەفا) ەرە­جەسى بويىنشا, كارى قۇرلىق­تاعى الەم چەمپيوناتىنىڭ ىرىكتەۋ باسەكەلەرى بەس ساتىدان تۇرادى. قازىر ەكىنشى ىرىكتەۋ كەزەڭىنىڭ ويىندارى ءوتىپ جاتىر. توپتىق كەزەڭنىڭ قورىتىندىسى بويىنشا, ءار توپتىڭ جەڭىمپازى مەن ەكىنشى ورىن العان ءتورت ۇزدىك كوماندا ەليتالى كەزەڭگە تىكەلەي جولداما الادى. ءسويتىپ, ىرىكتەۋدىڭ ەلي­تالى كەزەڭىنە 20 قۇراما قا­تىسىپ, ولار ءتورت-تورتتەن بەس توپ­قا ءبولىنىپ وينايدى. ءار توپتا جە­ڭىمپاز اتانعان قۇراما الەم چەمپيوناتىنا تىكەلەي جولداما جەڭىپ السا, ەكىنشى ورىن العان قۇرامالار ءبىر-بىرىمەن ويناپ, قوسىمشا تاعى ەكى جولداماعا تالاساتىن بولادى.