بيىل «ۇزدىك پەداگوگ» اتاعىنا 123 مۇعالىم ۇمىتكەر. ولار بايقاۋعا قاتىسقان 5,5 مىڭ پەداگوگتىڭ اراسىنان ىرىكتەلىپ الىندى. كونكۋرس قورىتىندىسى بويىنشا بارلىعى 64 جەڭىمپاز انىقتالادى, دەپ حابارلايدى Egemen.kz وقۋ-اعارتۋ مينيسترلىگىنە سىلتەمە جاساپ.
ۆەدومستۆو حابارلاعانداي, بيىلعى بايقاۋدىڭ بارلىق كەزەڭى تولىعىمەن تسيفرلاندىرىلعان. سونىڭ ارقاسىندا رەسپۋبليكا بويىنشا بارلىعى 5,5 مىڭنان استام ءوتىنىش كەلىپ تۇسكەن. بۇل - بۇرىن بولماعان رەكوردتىق كورسەتكىش.
قازىر بايقاۋدىڭ اقتىق سىنىنا بالاباقشالار مەن مەكتەپتەردىڭ 103 مۇعالىمى, كوللەدجدەردىڭ 20 مۇعالىمى قاتىسىپ جاتىر. ولار اۋداندىق, قالالىق جانە وبلىستىق كەزەڭدەردىڭ قورىتىندىسى بويىنشا ۇسىنىلعان.
«بيىل العاش رەت وتىنىمدەردى قابىلداۋ, تىركەۋ, كونكۋرس قۇجاتتارىن تاپسىرۋ, باعالاۋ جانە اپەللياتسيا بەرۋ teachercontest.iac.kz پورتالىندا جۇزەگە اسىرىلىپ جاتىر. سونداي-اق ءوتىنىم بەرىلگەن ساتتەن باستاپ بارشا ۇمىتكەر ونلاين رەجيمدە بايقاۋدىڭ بارلىق ديناميكاسىن باقىلاۋ مۇمكىندىگىنە يە بولدى. ياعني قاتىسۋشىلار قاي كەزەڭدە, ولارعا ساراپشىلار قانداي ۇپاي بەردى جانە ت.ب. باقىلاي الدى. بيىلدىڭ تاعى ءبىر جاڭالىعى – ارىپتەستەرىمىز كونكۋرس كوميسسياسى باعالايتىن اشىق ساباقتار وتكىزەدى. جۇلدە قورىن دا كوبەيتتىك. وسىنداي شارالاردىڭ ارقاسىندا قاتىسۋشىلار سانى عانا ەمەس, ولاردىڭ ساپالىق قۇرامى دا ارتىپ كەلەدى», دەدى وقۋ-اعارتۋ مينيسترلىگىنە قاراستى ورتا ءبىلىم كوميتەتىنىڭ توراعاسى گۇلميرا كارىموۆا.
ايتا كەتسەك, «ۇزدىك پەداگوگ» رەسپۋبليكالىق كونكۋرسى 2012 جىلدان بەرى وتكىزىلىپ كەلە جاتىر. وسى ۋاقىت ارالىعىندا مەكتەپكە دەيىنگى جانە ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ 600-گە جۋىق مۇعالىمى «ۇزدىك پەداگوگ» اتاعىنا يە بولدى.