مەملەكەت باسشىسى اتىراۋ وبلىسىنىڭ جۇرتشىلىعىمەن كەزدەسۋ بارىسىندا اپاتتى جاعدايدا تۇرعان جانە ءۇش اۋىسىممەن وقىتاتىن مەكتەپتەردىڭ ماسەلەسىنە, سونداي-اق بالاباقشالاردىڭ جەتىسپەۋشىلىگىنە توقتالىپ ءوتتى, دەپ حابارلايدى Egemen.kz.
ء«بىلىم بەرۋ جانە مادەنيەت سالاسىن دامىتۋ قاجەت. وبلىستا اپاتتى جاعدايدا تۇرعان جانە ءۇش اۋىسىممەن وقىتاتىن مەكتەپتەر ماسەلەسى ءالى شەشىمىن تاپپاي وتىر. بالاباقشالار دا جەتىسپەيدى. قازىر 17 مىڭعا جۋىق بالا كەزەكتە تۇر. بۇل ماسەلەنى شەشۋگە قاجەتتى قارجى قاراستىرىلعان», دەدى پرەزيدەنت.
مەملەكەت باسشىسىنىڭ ايتۋىنشا, كەلەسى جىلى «جايلى مەكتەپ» ۇلتتىق جوباسىمەن 11 مەكتەپ سالىنادى. بۇعان رەسپۋبليكالىق بيۋدجەتتەن قارجى بولىنەدى. ءبىلىم بەرۋ ينفراقۇرىلىمىن جاڭعىرتۋعا قاتىستى جوسپاردى تولىق ورىنداۋ كەرەك. ۇكىمەت جانە اكىمدىك ونىڭ ۋاقتىلى جانە ساپالى جۇزەگە اسىرىلۋىن قاتاڭ باقىلاۋعا ءتيىس.
«اتىراۋ وبلىسىندا كاسىپتىك جانە تەحنيكالىق ءبىلىم بەرەتىن 24 مەكەمە بار. وندا 16 مىڭ ستۋدەنت ءبىلىم الىپ جاتىر. بىراق, وسى كوللەدجدەردىڭ تۇلەكتەرى كوبىنە جۇمىس تابا الماي قينالادى. بۇل ماسەلە ءار وبلىستا بار. وقۋ-اعارتۋ مينيسترلىگىنە وبلىس اكىمدەرىمەن بىرلەسىپ, كاسىپتىك-تەحنيكالىق وقۋ ورىندارىن ەڭبەك نارىعىنا بەيىمدەۋ ءۇشىن ناقتى شارا قابىلداۋدى تاپسىرامىن», دەدى ق.توقاەۆ.
سونداي-اق پرەزيدەنت جوعارى ءبىلىمنىڭ قولجەتىمدى بولۋى, ءبىلىم ساپاسىن ارتتىرۋ, جاراتىلىستانۋ جانە تەحنيكالىق باعىتتاعى ۋنيۆەرسيتەتتەردى دامىتۋدىڭ ماڭىزدىلىعىنا توقتالىپ ءوتتى.
«مەن قىركۇيەكتەگى ءوز جولداۋىمدا وسىعان قاتىستى بىرقاتار مىندەت جۇكتەدىم. مەنىڭ باستاماممەن اتىراۋدا رەسەيدىڭ گۋبكين اتىنداعى مۇناي-گاز ۋنيۆەرسيتەتىنىڭ فيليالى اشىلدى. اتالعان ۋنيۆەرسيتەتتىڭ تۇلەكتەرىنە ەڭبەك نارىعىندا سۇرانىس كوپ بولادى دەپ سەنەمىن. مەنىڭ تاپسىرماممەن قازاقستاننىڭ ىرگەلى جوعارى وقۋ ورىندارىندا ءبىلىم الۋ ءۇشىن باتىس ايماعىنداعى جاستارىنا 10 مىڭ گرانت ءبولىندى. بىراق, وسى گرانتتارمەن وقۋعا تۇسكەن بالا كوپ ەمەس. مەن بۇل تۋرالى كەشە اقتاۋدا دا ايتتىم. اتىراۋ وبلىسىنا بولىنگەن 4 مىڭ گرانتتىڭ 800-گە جۋىعى عانا يگەرىلگەن. بۇل – وتە تومەن كورسەتكىش. اكىمدىك قۇزىرلى مينيسترلىكتەرمەن بىرلەسىپ, وسى ماسەلە بويىنشا اقپاراتتىق ءتۇسىندىرۋ جۇمىستارىن جۇرگىزۋى قاجەت», دەپ اتاپ ءوتتى مەملەكەت باسشىسى.
ق.توقاەۆ اتىراۋ قالاسىندا دارىندى جاستار ءۇشىن مادەنيەت جانە شىعارماشىلىق ورتالىعىن سالۋدى تاپسىردى.
«وبلىستاعى مادەنيەت سالاسىن دامىتۋعا ەرەكشە نازار اۋدارۋ قاجەت. قالادا مادەنيەت ورىندارىنىڭ كوبىرەك بولعانى ءجون. مەن اتىراۋ قالاسىندا دارىندى جاستار ءۇشىن مادەنيەت جانە شىعارماشىلىق ورتالىعىن سالۋدى تاپسىرامىن. ونى قازاق كۇي ونەرىنىڭ الىبى –قۇرمانعازىنىڭ اتىمەن اتاۋدى ۇسىنامىن», دەدى ەل پرەزيدەنتى.
سونىمەن قاتار ول وبلىس ورتالىعىندا وتباسىلىق دەمالىس ورىندارى جانە جاستاردىڭ بوس ۋاقىتىن پايدالى وتكىزەتىن ورتالىقتاردىڭ از ەكەنىن ايتتى.
«وبلىس ورتالىعىندا وتباسىلىق دەمالىس ورىندارى جانە جاستاردىڭ بوس ۋاقىتىن پايدالى وتكىزەتىن ورتالىقتار كوپ ەمەس. جايىق جاعالاۋى اباتتاندىرىلدى, «جاستار ساياباعى» سالىندى. بۇل ورىن جەرگىلىكتى جۇرت ءجيى باراتىن دەمالىس ورىندارىنىڭ بىرىنە اينالدى. اكىمدىك وسىنداي جاڭا جوبالاردى قولعا الۋى قاجەت. قالاداعى بارلىق نىساندار مۇمكىندىگى شەكتەۋلى ازاماتتارعا ىڭعايلى بولۋى كەرەك. ءبىزدىڭ قوعام ءۇشىن ەڭ ماڭىزدى تالاپتىڭ ءبىرى – وسى.
اتىراۋ ءاربىر تۇرعىنعا قولايلى, تازا, زاماناۋي قالاعا اينالۋعا ءتيىس. قالادا كەيبىر نىسانداردىڭ قۇرىلىسى كوپ جىلدان بەرى توقتاپ تۇر. مىسالى, 10 جىل بۇرىن سالىنا باستاعان كونتسەرت زالى ءالى پايدالانۋعا بەرىلگەن جوق. ءتىپتى, ونىڭ عيماراتى جارامسىز كۇيگە ءتۇستى. ۇكىمەت اكىمدىكپەن بىرلەسىپ, وسىنداي نىسانداردى سالىپ ءبىتىرۋ ماسەلەسىن ءبىرجولا شەشۋگە ءتيىس. قاجەت بولسا, ينۆەستورلاردى تارتىڭىزدار. حالىق مۇنداي عيماراتتاردىڭ يگىلىگىن كورۋى قاجەت», دەدى مەملەكەت باسشىسى اتىراۋ جۇرتشىلىعىمەن كەزدەسۋ بارىسىندا.