بۇل تۋرالى مەملەكەت باسشىسى اتىراۋ وبلىسىنىڭ جۇرتشىلىعىمەن كەزدەسۋ بارىسىندا ايتتى, دەپ حابارلايدى Egemen.kz.
«بىرىنشىدەن, ايماقتىق ەكونوميكانى ءارتاراپتاندىرۋ قاجەت. اتىراۋ وبلىسى مۇناي مەن گازدى تەرەڭ وڭدەيتىن ورتالىققا اينالۋعا ءتيىس. پوليپروپيلەن وندىرەتىن كەشەننىڭ ىسكە قوسىلۋى – وسى باعىتتاعى ماڭىزدى قادام. ايماقتا مۇناي-حيميا كلاستەرىن قۇرۋدىڭ ءبىرىنشى كەزەڭى وسىلاي جۇزەگە اسىرىلىپ جاتىر», دەدى پرەزيدەنت.
مەملەكەت باسشىسىنىڭ قازاقستان كومىرسۋتەگى شيكىزاتىنىڭ قورى ەڭ كوپ جيىرما مەملەكەتتىڭ قاتارىنا كىرەتىنىن ەسكە سالدى. سوعان قاراماستان, ەلىمىز مۇناي-حيميا ونىمدەرىنىڭ 95 پايىزىنا جۋىعىن يمپورتتاپ وتىر. توقاەۆ مۇنىڭ دۇرىس ەمەستىگىن ەسكەرتتى. ويتكەنى, قازاقستان ىشكى سۇرانىستى تولىق قامتاماسىز ەتە الادى. پرەزيدەنت ءتىپتى, سىرتقى نارىقتارعا شىعۋعا مۇمكىندىك بار ەكەنىن اتاپ ءوتتى.
«مۇناي-حيميا كاسىپورىندارى ينۆەستيتسيا سالۋعا وتە قولايلى. الەمدە ولاردىڭ ونىمىنە سۇرانىس جوعارى جانە بۇل سۇرانىس ارتا بەرەدى. سوندىقتان, وسى وبلىستا «ۇلتتىق يندۋستريالىق مۇناي-حيميا تەحنوپاركى» ارنايى ەكونوميكالىق ايماعى قۇرىلدى. وندا جۇمىس ىستەيتىن كومپانيالارعا سالىق جانە كەدەن جەڭىلدىكتەرى بەرىلەدى», دەدى ق.توقاەۆ.