قازاقستاندىقتار ەلىمىزدەگى ەڭ ءىرى مۇناي-گاز كومپانياسى «قازمۇنايگازدىڭ» اكتسيالارىن ساتىپ الۋعا مۇمكىندىگى بار. كومپانيانىڭ اكتسيالارى باستاپقى جاريا ۇسىنىلىمعا قويىلادى, دەپ جازادى Egemen.kz.
ينۆەستورلاردان وتىنىمدەردى قابىلداۋ 2022 جىلدىڭ 9 قاراشاسىندا باستالىپ, ينستيتۋتسيونالدىق ينۆەستورلار ءۇشىن 30 قاراشادا, ال بولشەك ينۆەستورلار ءۇشىن 2 جەلتوقساندا اياقتالادى.
سونىمەن قاتار جەكە ينۆەستورلار – قازاقستان ازاماتتارىنا باسىمدىق بەرىلەدى. وسىلايشا, حالىقتىق IPO فورماتىن قامتاماسىز ەتەدى. IPO بارىسىندا «قازمۇنايگازدىڭ» قاراپايىم اكتسياسىنىڭ باعاسى 8 406 تەڭگەنى قۇرايدى.
اكتسيالار ەكى پلاتفورماعا – Astana International Exchange (AIX) جانە قازاقستان قور بيرجاسىندا (KASE) قويىلادى.
«AIX ساۋدا قىزمەتىنىڭ ءتورت جىلى ىشىندە ءبىز شەتەلدىك جانە جەرگىلىكتى ينۆەستورلار وزدەرىن جايلى سەزىنەتىن الەمدىك دەڭگەيدەگى ينتەگراتسيالانعان كاپيتال نارىعىن قۇرا الدىق. قازاقستاندىق ءىرى كومپانيالاردىڭ IPO-سىن تابىستى وتكىزىپ, تاجىريبە جيناقتادىق. 2018 جىلى وتكەن ليستينگ پەن «قازاتومونەركاسىپتىڭ» كەيىنگى ەكى SPO-سىنىڭ ناتيجەسىندە ونىڭ اكتسيالارى قۇنىنىڭ ءوسىمى 383%-دى قۇرادى. KASPI-ءدى قوسارلى ورنالاستىرۋ دا وتە ءساتتى جۇزەگە استى. قازىر ماكسيمال ءوسىم 252%-دى قۇرادى», دەيدى AIX باسقارما توراعاسى رەنات بەكتۇروۆ.
سونداي-اق ول AIX-تە ساۋدا جاساۋ ارقىلى ينۆەستور اشىق, ءادىل جانە رەتتەلگەن نارىقتا جۇمىس ىستەيتىنىن, ءادىل باعا بويىنشا ساۋدا-ساتتىققا سەنىم ارتا الاتىنىن دا اتاپ ءوتتى.
ايتا كەتەيىك, قازىر AIX جۇيەسىندە 30-عا جۋىق قازاقستاندىق جانە شەتەلدىك بروكەرلەر تىركەلگەن. ولار ارقىلى IPO-عا قاتىسۋعا جانە قور بيرجاسىندا باعالى قاعازدارمەن ساۋدا جاساۋعا بولادى. AIX ەۋروپالىق, امەريكاندىق, ازيالىق جانە قازاقستاندىق ەسەپ ايىرىسۋ بانكتەرىمەن جۇمىس ىستەيدى, بۇل گەوساياسي جاعدايعا قاراماستان بيرجانىڭ ۇزدىكسىز جۇمىسىن قامتاماسىز ەتۋگە مۇمكىندىك بەرەدى.
ء«بىزدىڭ ماقساتىمىز – تابىس دەڭگەيى مەن قارجىلىق ساۋاتىنا قاراماستان, قازاقستاننىڭ بارلىق ازاماتتارىنىڭ بيرجادا ساۋدا جاساۋىن جەڭىلدەتۋ», دەيدى رەنات بەكتۇروۆ.
«حالىقتىق IPO» اياسىندا قازاقستاندىقتار «قازمۇنايگاز» ۇك اق اكتسيالارىن استانا حالىقارالىق بيرجاسىندا ءۇش جولمەن ساتىپ الا الادى:
بارىنشا قاراپايىم ءارى جىلدام ءادىس – Tabys قوسىمشاسىندا تىكەلەي جازىلۋ ارقىلى. سىزگە بار بولعانى تەك سمارتفون, ينتەرنەتكە قولجەتىمدىلىك, جەكە كۋالىك پەن بانك كارتاسى قاجەت. بۇل رەتتە تىكەلەي جازىلۋ ءۇشىن كوميسسيا ۇستالمايدى – تەك ترانزاكتسيا ءۇشىن بانكتىك تولەم الىنادى. «قازپوچتا» اق مەن AIX ينتەگراتسياسىنىڭ ارقاسىندا ءسىز بۇكىل قازاقستان بويىنشا 1000-نان استام بولىمشەلەر ارقىلى تىكەلەي جازىلىمعا ءوتىنىش بەرە الاسىز. تىكەلەي جازىلىم اكتسيالاردى بىردەن ساتۋدى جوسپارلامايتىن نەمەسە بروكەردى تاڭداۋعا اسىقپايتىن, بۇنىڭ ءبارىن كەيىنىرەك جاساۋدى جوسپارلايتىن جاندارعا وتە قولايلى. بروكەرلەر – AIX جانە KASE بيرجالارىنىڭ ساۋدا مۇشەلەرى ارقىلى.