پرەزيدەنت قاسىم-جومارت توقاەۆ بيىل ناۋرىز ايىندا جاريالانعان ساياسي باستامالاردى جۇزەگە اسىرۋعا باعىتتالعان بىرقاتار زاڭنامالىق اكتىگە قول قويدى. بۇل زاڭداردىڭ ايتارلىقتاي بولىگى ازاماتتاردىڭ قۇقىقتارى مەن بوستاندىقتارىن كونستيتۋتسيالىق قورعاۋ ينستيتۋتتارىن نىعايتۋعا, ونىڭ ىشىندە «پروكۋراتۋرا تۋرالى» كونستيتۋتسيالىق زاڭعا قاتىستى.
قۇقىقتارىمىز بەن بوستاندىقتارىمىزدى قورعاۋ تۋرالى ايتار بولساق, بيلىكتى ءبولۋ جۇيەسىندە سوتتاردان باسقا بۇل ماڭىزدى فۋنكتسيانى پروكۋراتۋرا دا اتقاراتىنىن ءتۇسىنۋ كەرەك. ەندىگى جەردە پروكۋراتۋرانىڭ قۇقىق قورعاۋ الەۋەتى كونستيتۋتسيالىق زاڭمەن نىعايتىلدى. اتاپ ايتقاندا, باس پروكۋرورعا كونستيتۋتسيا نورمالارىن ءتۇسىندىرۋ, حالىقارالىق شارتتار مەن نورماتيۆتىك قۇقىقتىق اكتىلەردىڭ كونستيتۋتسياعا سايكەستىگى ماسەلەلەرى بويىنشا كونستيتۋتسيالىق سوتقا جۇگىنۋ قۇقىعى بەرىلدى.
سونداي-اق زاڭدا ادام, ازاماتتاردىڭ قۇقىقتارى مەن بوستاندىقتارىن قورعاۋ, قالپىنا كەلتىرۋ بويىنشا پروكۋراتۋرانىڭ ادام قۇقىقتارى جونىندەگى ۋاكىلمەن, مەملەكەتتىك ورگاندارمەن, جەرگىلىكتى ءوزىن-ءوزى باسقارۋ ورگاندارىمەن جانە باسقا دا ۇيىمدارمەن ءوزارا ءىس-قيمىلى قاراستىرىلعان. ءوزارا ارەكەتتەسۋ مەحانيزمىنىڭ قۇقىقتىق كونسوليداتسياسى ازاماتتاردىڭ قۇقىقتارىن قورعاۋعا ءبىرشاما مۇمكىندىك بەرەدى.
سونىمەن قاتار زاڭ پروكۋراتۋرانىڭ زاڭ شىعارۋشىلىق قىزمەتىنىڭ اشىقتىعىن بەلگىلەيدى. ەندى باس پروكۋروردىڭ ازاماتتاردىڭ قۇقىقتارىنا, بوستاندىقتارى مەن مىندەتتەرىنە قاتىستى نورماتيۆتىك قۇقىقتىق اكتىلەرى مىندەتتى تۇردە جاريالانادى.
بۇگىنگى تاڭدا ازاماتتاردى قۇقىقتىق قورعاۋ سالاسىندا قابىلدانعان زاڭنامالىق اكتىلەر ينستيتۋتتاردىڭ ءوزىن نىعايتۋعا, ازاماتتاردىڭ قۇقىقتارى مەن بوستاندىقتارىن قورعاۋ راسىمدەرىن جەتىلدىرۋگە باعىتتالعان. بۇل ءبىزدىڭ ەلىمىزدە اجىراماس كونستيتۋتسيالىق ازاماتتىق جانە ساياسي قۇقىقتار مەن بوستاندىقتاردىڭ جالپى ساقتالۋىنا وڭ اسەر ەتۋگە ءتيىس.
گۇلميرا توقانوۆا,
پرەزيدەنت جانىنداعى قسزي اعا عىلىمي قىزمەتكەرى