ستاتيستيكالىق مالىمەتكە سۇيەنسەك, قازىر اتىراۋ وبلىسىندا 668 090 ادام تۇرادى. ونىڭ ىشىندە 18-35 جاس ارالىعىندا 111 776 (17%) ادام بار. جاستار اراسىندا باسپاناعا مۇقتاج جاندار جەتكىلىكتى. سول سەبەپتى وبلىس اكىمدىگى مەن «وتباسى بانك» اق «اتىراۋ جاستارى» تۇرعىن ءۇي باعدارلاماسىن ىسكە قوسۋعا قادام جاسادى.
بىرلەسكەن باعدارلاما 35 جاسقا دەيىنگى جاستارعا ارنالىپ وتىر. ماقسات – جاستاردىڭ بارىنشا ءتيىمدى شارتتارمەن باسپانا ساتىپ الۋىنا جول اشۋ. بۇل باعدارلاماعا دارىگەرلەر, مۇعالىمدەر, مادەنيەت جانە سپورت سالاسىنىڭ وكىلدەرى, جوعارى وقۋ ورىندارىنىڭ پروفەسسورلارى, عىلىمي-زەرتتەۋ ينستيتۋتتارىنىڭ عىلىمي قىزمەتكەرلەرى, جۋرناليستەر, الەۋمەتتىك سالا مەن كوممۋنالدىق كاسىپورىندا جۇمىس ىستەيتىندەر, سونداي-اق جەتىم بالالار ساناتىمەن تۇرعىن ءۇي كەزەگىندە تۇرعان ازاماتتار قاتىسا الادى. باعدارلامانى ىسكە اسىرۋ جونىندەگى ەكىجاقتى كەلىسىمگە اتىراۋ قالاسىنىڭ اكىمى مەيىرىم قالاۋي مەن «وتباسى بانك» اق اتىراۋ وبلىستىق فيليالىنىڭ ديرەكتورى نۇربول قۇرمان قول قويدى.
– ءبىزدىڭ بانكتىڭ باستى ۇستانىمى – قازاقستاندىقتاردى جايلى باسپانامەن قامتاماسىز ەتۋ. جاڭادان ىسكە قوسىلاتىن «اتىراۋ جاستارى» باعدارلاماسى تابىسى جوعارى ەمەس جاستاردىڭ باسپانا ماسەلەسىن وڭ شەشۋگە باعىتتالىپ وتىر. ويتكەنى جاستار دا پاتەر الۋ ءۇشىن «وتباسى» بانكتەگى شوتتارىنا قاراجات جيناپ جۇرگەنىن بىلەمىز. الايدا تۇرعىن ءۇي ساتىپ الۋعا بارلىعىنىڭ بىردەي مۇمكىندىگى جەتە بەرمەيدى. ال جاڭا باعدارلاما ىسكە قوسىلعان سوڭ جاستاردىڭ بۇل ارمانى جاقىن ارادا جۇزەگە اسا باستايدى. بۇل جوباعا وبلىس اكىمدىگى 1 ملرد تەڭگە بولسە, «وتباسى بانك» اق 600 ملن تەڭگە سالادى, – دەيدى اتالعان بانكتىڭ اتىراۋ وبلىستىق فيليالىنىڭ ديرەكتورى نۇربول قۇرمان.
ونىڭ ايتۋىنشا, اتىراۋ وبلىسى – جاستاردى تۇرعىن ۇيمەن قامتاماسىز ەتۋ باعدارلاماسى قولعا الىنعان جەتىنشى ءوڭىر. بۇعان دەيىن مۇنداي جوبا الماتى مەن استانا قالاسىندا, قاراعاندى, تاراز, قوستاناي جانە الماتى وبلىستارىندا جۇزەگە اسىرىلعان. قازىر وبلىس اكىمدىكتەرى مەن «وتباسى بانك» اق-نىڭ جاستاردىڭ نەسيە الۋىنا جۇمساعان ورتاق بيۋدجەتىنىڭ كولەمى 60 ملرد تەڭگەدەن اسقان. ال «اتىراۋ جاستارى» باعدارلاماسىنا قاتىساتىن الەۋەتتى نەسيە الۋشىلاردىڭ ءتىزىمىن جەرگىلىكتى اكىمدىك ۇسىنادى. اكىمدىك باعدارلاماعا قاتىسۋ ءۇشىن ءوتىنىشتى قابىلداۋ جانە بايقاۋ كەزەڭىن دايىنداپ جاتىر.
– باعدارلاماعا قاتىسۋشىلار پۋلى قۇرىلادى. سودان سوڭ قاتىسۋشىلارعا «وتباسى بانك» ارقىلى تۇرعىن ءۇي زاەمىن الۋعا جولداما ۇسىنىلادى. ۇمىتكەرلەر وزدەرىنىڭ تولەم قابىلەتىن راستاعاننان كەيىن جىلدىق 5 پايىزبەن زايم الادى. مۇندا العاشقى جارنا 10% عانا بولادى. باعدارلاما قاتىسۋشىلارىنا بەرىلەتىن نەسيەنىڭ ەڭ كوپ سوماسى – 18 ملن تەڭگە. بۇل قارجى اتىراۋ قالاسىنان ءۇي ساتىپ الۋشىلارعا بەرىلەدى. ال وبلىس اۋماعىنان باسپانا ساتىپ الۋ ءۇشىن 13 ملن تەڭگەگە دەيىن نەسيە بەرۋ كوزدەلىپ وتىر. نەسيە مەرزىمى – 25 جىل, – دەيدى ن.قۇرمان.
اتالعان بانكتىڭ وبلىستىق فيليالى 2006 جىلى اشىلعان. وندا 34 مامان جۇمىس ىستەيدى. فيليالدا 7 كەڭەس بەرۋ ورتالىعى مەن 82 كەڭەسشى بار. بيىل دەپوزيت اشقان اتىراۋلىقتاردىڭ سانى 85 837-گە جەتكەن. ولاردىڭ دەپوزيتتەگى قارجىسى 70 ملرد 799 ملن 807 مىڭ تەڭگەنى قۇرايدى.
«اتىراۋ جاستارى» باعدارلاماسىنىڭ قاتىسۋشىلارىنا قويىلاتىن بىرنەشە تالاپ بار. بىرىنشىدەن, ءوتىنىم بەرگەن كەزدە قاتىسۋشىنىڭ جاسى 35-تەن اسپاۋى كەرەك. ەكىنشىدەن, قاتىسۋشىنىڭ اتىراۋ وبلىسىندا نەمەسە اتىراۋ قالاسىندا كەمىندە سوڭعى ءبىر جىل تۇراقتى تىركەۋى جانە ءوتىنىش بەرگەن كەزدە وزىمەن بىرگە تۇراتىن وتباسى مۇشەلەرىنىڭ اتىراۋ وبلىسىندا تىركەۋى بولۋعا ءتيىس. ۇشىنشىدەن, باعدارلاماعا قاتىسۋشىنىڭ جانە ونىڭ وتباسى مۇشەلەرىنىڭ سوڭعى 5 جىل ىشىندە قازاقستان اۋماعىندا ساتىپ الۋ قۇقىعىمەن جالعا بەرىلەتىن نەمەسە مەنشىك قۇقىعىنداعى تۇرعىن ءۇيىنىڭ جوقتىعى ەسكەرىلەدى. تورتىنشىدەن, اتىراۋ قالاسىندا نەمەسە اتىراۋ وبلىسىندا تاڭداعان ماماندىعى بويىنشا رەسمي جۇمىس ءوتىلى بولعانى ءجون. بەسىنشىدەن, باعدارلاماعا ەرلى-زايىپتى جاستاردىڭ بىرەۋى عانا قاتىسا الادى.
اتىراۋ وبلىسى