بۇگىنگى تاڭدا مەملەكەتتىك قىزمەت تۇرلەرىن الۋ قاراپايىم تۇرعىندار ءۇشىن جەڭىلدەي تۇسكەن. مۇنىڭ بارلىعى دا تسيفرلىق تەحنولوگيالاردىڭ رەسپۋبليكادا دامۋىنىڭ ناتيجەسى دەپ بىلگەن ءجون. وسى ورايدا شىمكەنتتە حالىققا قىزمەت كورسەتۋ ورتالىعىنىڭ جۇمىسىن جاڭعىرتۋدا «ازاماتتارعا ارنالعان ۇكىمەت» تاراپىنان اۋقىمدى ىستەر اتقارىلىپ جاتىر. ماسەلەن, تۇرعىندارعا مەملەكەتتىك قىزمەت الۋدىڭ بارلىق ءتۇرى قازىرگى تاڭدا ىڭعايلى ءارى قولجەتىمدى بولا ءتۇستى.
جۋىردا شىم قالادا حقو قىزمەتىن ودان سايىن جەتىلدىرە ءتۇسۋ ماقساتىندا حالىققا زاماناۋي جۇيەدە قىزمەت كورسەتەتىن تسيفرلىق كەڭسە اشىلدى. تسيفرلىق مازمۇنداعى بولىمشەنىڭ رەسمي اشىلۋ سالتاناتى تاۋەلسىز ديرەكتورلار كەڭەسىنىڭ مۇشەلەرى زاعيپا باليەۆا مەن ەرعالي بەگىمبەتوۆ, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسشىسى سۇيەنىش ءابدىلدين جانە شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان مەن فيليال ديرەكتورى بالمەيىر سانسىزباي ۇلىنىڭ قاتىسۋىمەن ءوتتى.
تسيفرلىق فورماتتاعى كەڭسە كايدزەن تۇجىرىمداماسى بويىنشا قىزمەت كورسەتەدى. سونداي-اق شىعىس ادىستەمەسى نەگىزىندە جۇمىس ىستەيدى. ياعني مەملەكەتتىك قىزمەت كورسەتۋ ساپاسىنىڭ, كورپوراتيۆتىك مادەنيەتتىڭ جانە جۇمىس ونىمدىلىگىن ارتتىرۋ ماقساتىن كوزدەيدى. الداعى ۋاقىتتا وسى باعىتتا جۇيەلى جۇمىس اتقارىلاتىن بولادى. جاڭا بولىمشەنىڭ تاعى ءبىر ەرەكشەلىگى, كەلۋشىلەر كەڭسەدەگى قىزمەت كورسەتۋ اۋماعىن ارنايى ديزايندا جاسالعان تۇستەر ارقىلى اجىراتىپ بىلەدى.
«ازاماتتارعا ارنالعان ۇكىمەت» شىمكەنت قالالىق فيليالىنىڭ ديرەكتورى بالمەيىر سانسىزباي ۇلىنىڭ مالىمدەۋىنشە, شىعىس ۇلگىسىندەگى كەڭسەنىڭ قۇجاتتى قابىلداۋ جانە ونى تاپسىرۋ ايماعىندا 38 جۇمىس ورنى بولادى. سونىمەن بىرگە مۇندا 101 ينسپەكتور قىزمەت ەتەدى.
– بۇدان بولەك حالىققا قىزمەت كورسەتۋ تسيفرلىق كەڭسەلەرىندە ءتۇرلى قىزمەت ايماعى قاراستىرىلعان. ولاردىڭ قاتارىندا رەسەپشن, قۇجات بەرۋ, جىلدام قىزمەت كورسەتەتىن ايماعى, كەڭەس بەرۋ, ءوز-وزىنە قىزمەت كورسەتۋ سەكىلدى وزگە دە ورىنداردى اتاۋعا بولادى. زاماناۋي ۇلگىدەگى تسيفرلىق كەڭسە قالاداعى مادەلى قوجا كوشەسىندەگى 1/16 مەكەنجايىنداعى حقو بازاسىندا ورنالاسقان, – دەدى فيليال باسشىسى بالمەيىر سانسىزباي ۇلى.
ەسكە سالا كەتكەن ءجون, بۇگىندە شىمكەنتتە حالىققا قىزمەت كورسەتەتىن 10 ورتالىق جۇمىس ىستەيدى. ونىڭ ىشىندە 3 حالىققا مامانداندىرىلعان قىزمەت كورسەتۋ ورتالىعى دا بار.
سونىمەن قاتار جىل باسىنان بەرى مەگاپوليستەگى حقو-لاردا قالا تۇرعىندارىنا 900 مىڭنان استام قىزمەت كورسەتىلگەن. جالپى, بۇگىنگى تاڭدا ء«بىر تەرەزە» قاعيداتى اياسىندا حالىققا قىزمەت كورسەتۋ ءىسى الدەقايدا جەڭىلدەگەن. ءتىپتى تسيفرلىق مۇمكىندىكتەر ارقىلى ازاماتتار ۇيىندە وتىرىپ-اق كوپتەگەن مەملەكەتتىك قىزمەت ءتۇرىن وزدەرى الا الادى. ماسەلەن, كەيبىر انىقتامالار مەن قۇجاتتاردى الۋ ءۇشىن قازىر حالىققا قىزمەت كورسەتۋ ورتالىعىنا كەلىپ اۋرە بولۋدىڭ قاجەتى جوق. كەز كەلگەن ازاماتتىڭ ونى سمارتفون كومەگىمەن شىعارىپ الۋعا مۇمكىندىگى بار.
وسى رەتتە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا شىمكەنت قالاسىنداعى «تەڭ قوعام» الەۋمەتتىك قورعاۋ ورتالىعىندا وتكەن كەزدەسۋدە دە تسيفرلىق الەۋەتتىڭ مۇمكىندىكتەرى تۋرالى مالىمدەگەن ەدى.
«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس وتباسىنىڭ تسيفرلىق كارتاسى ءتۇزىلدى. ەندى قازاقستاننىڭ ءاربىر وتباسى وزىنە مەملەكەت تاراپىنان قانداي كەپىلدەندىرىلگەن كومەك بار ەكەنىنەن الدىن الا حاباردار بولىپ وتىرادى. ياعني بەلگىلەنگەن ستاتۋسىنا قاراي الەۋمەتتىك كومەكتى جىلدام الاتىن بولادى. سوندىقتان بۇرىنعىداي ءار الەۋمەتتىك ورگانعا جۇگىرىپ اۋرەگە تۇسپەيدى. ماسەلەن, كوپبالالى انا نەمەسە زەينەتكەر بولسا, ء«سىزدىڭ 1 جاسقا تولماعان بالاڭىز بار. وسىعان وراي بالاڭىز 1,5 جاسقا تولعانعا دەيىن الەۋمەتتىك جاردەماقى الا الاسىز» دەگەن سىندى حابارلاما كەلىپ تۇرادى», دەدى مينيستر.
الداعى كەزدە وتباسىنىڭ تسيفرلىق كارتاسىن قالىپتاستىرعان سوڭ, مۇمكىندىگى شەكتەۋلى ازاماتتاردى دا ءار مەملەكەتتىك ورگان اراسىندا اۋرەگە سالماۋ ءۇشىن ء«بىر تەرەزە» قاعيداتى بويىنشا قۇجاتىن راسىمدەۋ قولعا الىنباق. ياعني ەمحاناعا بارعاندا ءتيىستى مالىمەتتەردى الىپ, قۇجاتىن سول جەردە راسىمدەي الادى.
شىمكەنت