بىلتىر شىلدە ايىندا skills.enbek.kz ونلاين كاسىپتىك وقىتۋ پلاتفورماسى ىسكە قوسىلعان ساتتەن باستاپ 133 مىڭ ازامات, ونىڭ ىشىندە 24,9 مىڭ جۇمىسسىز ادام كۋرستان وتكەنى تۋرالى سەرتيفيكات الدى. پلاتفورمادا جالپى 167,6 مىڭ قازاقستاندىق تىركەلدى, ونىڭ 154,1 مىڭى 2022 جىلى تىركەلگەن.
كۋرسقا قاتىسقان 24,9 مىڭ جۇمىسسىزدىڭ 7,6 مىڭى – نەگىزىنەن اقتوبە, الماتى, قىزىلوردا, تۇركىستان وبلىستارى مەن الماتى قالاسىنىڭ جاستارى. پلاتفورما ىسكە قوسىلعان ساتتەن باستاپ اۆتورلار وندا ءارتۇرلى باعىت بويىنشا 162 كۋرس جاريالادى, ونىڭ 107-ءسى تەگىن. كۋرستاردىڭ ۇزاقتىعى 1-دەن 72 ساعاتقا دەيىن. ەڭ تانىمال كۋرستار – ء«سۇتتى ءىرى قارا ءوسىرۋ», «قىزمەتكەرلەردى باسقارۋ», «قۇلپىناي ءوسىرۋ», «كاسساشى» جانە «ۇننان جاسالعان كونديتەر ونىمدەرى, جىكتەلۋى جانە دايىندالۋ تەحنولوگياسى».
پلاتفورما حالىقتىڭ ءبىلىم دەڭگەيى مەن كاسىبيلىگىن ارتتىرۋعا, مانساپتىق دامۋدى ىنتالاندىرۋعا جانە ء«ومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. بۇل ماركەتپلەيس – قىزمەتتەر نارىعى قاعيداتى بويىنشا ونلاين كۋرستارعا قول جەتكىزۋدى ۇسىناتىن حالىقارالىق وقىتۋ الاڭدارىنا ۇقساس قۇرىلعان. وقۋعا تىكەلەي (https://skills.enbek.kz/) سىلتەمە ارقىلى نەمەسە ەلەكتروندىق ەڭبەك بيرجاسىندا (enbek.kz) «ونلاين وقىتۋ» ءبولىمىن تاڭداۋ ارقىلى وتۋگە بولادى. پلاتفورمادا ءبىلىم الۋشى وقىتۋدىڭ قولايلى قارقىنى مەن ءتىلدى, ماتەريالدى بەرۋدىڭ ىڭعايلى قاعيداتىن ءوز بەتىنشە تاڭدايدى, ءبىلىم بەرۋ پروتسەسىندەگى ءوزىنىڭ پروگرەسىن باقىلاي الادى.
وقۋ اياقتالعاننان كەيىن ءبىلىم الۋشى 70% شەكتى دەڭگەيمەن تەستىلەۋ تاپسىرۋعا ءتيىس. ونلاين كۋرستى ءساتتى اياقتاعان جاعدايدا داعدىلاردى يگەرۋ تۋرالى سەرتيفيكات بەرىلەدى. كۋرستى اياقتاۋدىڭ مىندەتتى شارتى – ستۋدەنت تاراپىنان كۋرستى باعالاۋ. بۇل سەرتيفيكات ەلەكتروندىق ەڭبەك بيرجاسىندا (enbek.kz) تىركەلگەن كەزدە ءبىلىم الۋشى جاساعان تۇيىندەمەدە اۆتوماتتى تۇردە كورسەتىلەدى. قىزمەتكەرلەردى ىزدەۋ كەزىندە الەۋەتتى جۇمىس بەرۋشى skills.enbek.kz-تە تابىستى وقۋدان كەيىن الىنعان سەرتيفيكاتتاردى كورە الادى.
2022 جىلعى ناۋرىزدان باستاپ پلاتفورمادا قولدانىستاعى فۋنكتسيونال وڭتايلاندىرىلىپ, جاڭا سەرۆيستەر ىسكە قوسىلعانىن ەسكە سالا كەتەيىك. اتاپ ايتقاندا, كۋرستاردى ىزدەۋ جەتىلدىرىلدى, ساباقتاردىڭ تۇسىنىكتى قۇرىلىمى جاسالدى, وقۋ پروتسەسىن باقىلاۋ جانە كۋرس اۆتورلارىمەن جىلدام ءوزارا ارەكەتتەسۋ مۇمكىندىگى پايدا بولدى. كۋرس اۆتورلارى ءۇشىن ىڭعايلى ساباق قۇراستىرۋشى قولجەتىمدى, جاريالانعان كۋرستاردىڭ ستاتيستيكاسى مەن تيىمدىلىگىن قاراۋ, سەرتيفيكاتتاردىڭ ءارتۇرلى ديزاينى قاراستىرىلعان, سونىمەن قاتار وقۋ قۇنىن الدىن-الا ەسەپتەۋگە ارنالعان ونلاين-كالكۋلياتور بار.
اۆتورلار مەن ازىرلەۋشىلەرگە ارنالعان پلاتفورمادا ونلاين كۋرستاردى ورنالاستىرۋ تەگىن. كۋرستار مەملەكەتتىك جانە ورىس تىلدەرىندە ورنالاستىرىلۋى مۇمكىن, اقپارات بەرۋدىڭ ءارتۇرلى فورماتى: ءماتىن, پرەزەنتاتسيا, بەينە جانە اۋديو ماتەريالدار, ينفوگرافيكا جانە باسقا تۇرلەرى بولۋعا ءتيىس. پلاتفورمانىڭ ەرەكشە قاجەتتىلىكتەرى بار ستۋدەنتتەر ءۇشىن ينتەرفەيستى بەيىمدەۋ مۇمكىندىگى بار.
ينفوگرافيكانى جاساعان امانگەلدى قياس, «EQ»