توتەنشە جاعدايعا بايلانىستى «ارسەلورميتتال تەمىرتاۋ» اق كومىر دەپارتامەنتىنىڭ بارلىق سەگىز شاحتاسىنىڭ جۇمىسى ۋاقىتشا توقتاتىلدى, دەپ حابارلايدى Egemen.kz قاراعاندى وبلىسى اكىمىنىڭ ءباسپاسوز قىزمەتىنە سىلتەمە جاساپ.
ۇكىمەتتىك كوميسسيا قاراعاندى وبلىسىنداعى لەنين اتىنداعى شاحتادا جۇمىس ىستەپ جاتىر. وندا بەس ادام قازا تاۋىپ, تورتەۋى زارداپ شەكتى. مەتاننىڭ كەنەتتەن شىعۋى 3 قاراشاعا قاراعان ءتۇنى گازدى درەناجدى ۇڭعىمالاردى بۇرعىلاۋ كەزىندە ورىن العان. توتەنشە جاعدايعا بايلانىستى «ارسەلورميتتال تەمىرتاۋ» اق كومىر دەپارتامەنتىنىڭ بارلىق سەگىز شاحتاسىنىڭ جۇمىسى ۋاقىتشا توقتاتىلدى.
ءوڭىر باسشىسى جەڭىس قاسىمبەك پەن تج ءمينيسترى يۋري يلين وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگتە ءسوز سويلەدى. ولار قازا تاپقان جەراستى جۇمىسشىلارىنىڭ وتباسىلارىنا كوڭىل ايتتى.
– بۇل ۇلكەن تراگەديا. قازىر ماقاجانوۆ اۋرۋحاناسىندا جاتقان زارداپ شەككەندەرگە بارلىق قاجەتتى مەديتسينالىق كومەك كورسەتىلەدى. اكىمدىك تاراپىنان ولارعا بارلىق قاجەتتى كومەك كورسەتىلەدى. سونىمەن قاتار كومپانيا ەڭبەك كودەكسى مەن ۇجىمدىق شارتتىڭ بارلىق تالاپتارىن ورىنداۋعا مىندەتتى. ونىڭ ىشىندە 10 جىل كولەمىندە جالاقى مولشەرىندە ماتەريالدىق وتەماقى تولەنۋى ءتيىس, – دەدى جەڭىس قاسىمبەك.
ۇكىمەتتىك كوميسسياعا تجم, ەڭبەكتى قورعاۋ, الەۋمەتتىك قورعاۋ, دەنساۋلىق ساقتاۋ, سونداي-اق «ارسەلورميتتال تەمىرتاۋ» كومپانياسىنىڭ وكىلدەرى كىردى. يۋري ءيليننىڭ ايتۋىنشا, جارىلىس تەحنيكاسىنىڭ ماماندارى مەن بىرنەشە تاۋەلسىز ۇيىمدار دا تارتىلعان.
ول دابىلدان كەيىن شاحتا ديسپەتچەرى دەرەۋ ەۆاكۋاتسيالاۋ جوسپارىن ەنگىزۋ تۋرالى شەشىم قابىلداعانىن اتاپ ءوتتى. اپات شامامەن 800 مەتر تەرەڭدىكتە بولدى.
– پرەمەر-ءمينيستردىڭ بۇيرىعىمەن باسقاراتىن مەملەكەتتىك كوميسسيا تاعايىندالدى. كوميسسيا العاشقى جۇمىس كەڭەسىن وتكىزدى. قازىر ىزدەۋ-قۇتقارۋ بولىمشەلەرى شاحتا ىشىندەگى جۇمىستارىن جالعاستىرۋدا. بارلىعى دەرلىك جويىلدى, ءتۇتىن بار. قازىر شاحتانى بەلسەندى جەلدەتۋ جانە ۋچاسكەلەردى بارلاۋ جۇمىستارى جۇرگىزىلۋدە. قابىلداۋ مۇمكىندىگىنە قاراي كوميسسيا بۇگىن تۇندە وقيعا بولعان جەردى تەكسەرۋگە كىرىسەدى. گاز تاراۋىنىڭ سەبەبىن كوميسسيا انىقتايدى, – دەپ ءتۇسىندىردى يۋري يلين.
مينيستر قازىرگى ۋاقىتتا «ارسەلورميتتال تەمىرتاۋ» كد بارلىق شاحتالارىنىڭ جۇمىسى قوسىمشا نۇسقاما جۇرگىزۋ, ۋچاسكەلەردى تەكسەرۋ جانە شاحتاعا تۇسەتىن قىزمەتكەرلەردىڭ سىناقتارىن قابىلداۋ ءۇشىن ءبىر تاۋلىككە توقتاتىلعانىن حابارلادى.
– لەنين اتىنداعى شاحتا بويىنشا زارداپتاردى جويۋ جونىندەگى بارلىق ءىس-شارالار, سونداي-اق ساراپتاما كوميسسياسىنىڭ جۇمىسى اياقتالعاننان كەيىن كوميسسيالىق شەشىم قابىلدانادى, - دەپ تولىقتىردى تجم باسشىسى.
قر قك 277-بابىنىڭ 3-بولىگى بويىنشا سوتقا دەيىنگى تەرگەۋ باستالدى.