گەندەرلىك ساياسات – مەملەكەتتىك ساياساتتىڭ ماڭىزدى باعىتتارىنىڭ ءبىرى. استانادا ەلىمىزدەگى ايەلدەر مەن قىزداردىڭ ساياسي مۇمكىندىكتەرىن ارتتىرۋ جانە كوشباسشىلىق الەۋەتىن دامىتۋ بويىنشا جاتتىقتىرۋشىلارعا ارنالعان ترەنينگ باستالدى.
«Tomiris» اقپاراتتىق-ءبىلىم بەرۋ باعدارلاماسى اياسىندا باستالعان ترەنينگ ماقساتى – گەندەرلىك تەڭدىك ارقىلى قازاقستان ەكونوميكاسىن جاقسارتۋ, سونداي-اق ايەلدەر مەن قىزداردىڭ باسقارۋشىلىق الەۋەتى مەن ساياسي مادەنيەتىن دامىتۋ جانە اسەرىن زەرتتەۋ. جوبا اقپارات جانە قوعامدىق دامۋ مينيسترلىگى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا جانە قازاقستانداعى «بۇۇ-ايەلدەر» قۇرىلىمىنىڭ قولداۋىمەن ءوتتى.
پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى, پارلامەنت ءماجىلىسىنىڭ دەپۋتاتى ءلاززات رامازانوۆا ءار وڭىردەن ءبىلىم, جاڭا سەرپىن ىزدەپ كەلگەن بولاشاق جاس ساياساتكەرلەرگە ترەنينگتەر كەشەندى تۇردە وتكىزىلە باستاعانىن ايتتى.
ء«بىز ساياساتقا كەلگەندە مۇنداي دۇنيەلەر جوق ەدى. اركىم ءوز بىلگەنىمەن ءجۇردى. مەنىڭ ويىمشا, بۇل شىنىمەن دە ەرەكشە جوبا. بىرىنشىدەن, بۇل ارەكەت زاڭنامالىق تۇرعىدا نەگىز بولدى. مەملەكەت باسشىسى پارتيالاردىڭ سايلاۋ تىزىمىندە ايەلدەر مەن جاستار ءۇشىن 30 پايىزدىق كۆوتا قاراستىرۋدى ۇسىنعانى ۇتىمدى ۇسىنىس, ساياسي ەركىندىكتىڭ ارقاسىندا ايەلدەرگە بەرىلگەن مول مۇمكىندىك دەپ بىلەمىن. ەڭ ءتيىمدى دەموكراتيا ەڭ جاقسى قۇرالداردى قولدانۋ ارقىلى قۇرىلادى. ساياسي دامۋ تۋرالى ءسوز بولعاندا, مۇندا مۇلدە باسقا مەحانيزم ەنگىزىلەدى. ءسىزدىڭ كاسىبيلىگىڭىز ارقاشان سوڭعى نۇكتەنى قويا بەرمەيدى. قازاقستاننىڭ ستاتيستيكاسى ايەلدەردىڭ 52 پايىزىن قۇرايدى. ايەلدەردىڭ مىندەتى اتا-اناعا قاراۋ, بالانى بالاباقشاعا اپارۋ دەگەن سياقتى سىندى ءجيى ەستيمىن. بىراق وعان قوسىمشا قاراجات سۇرامايمىز عوي. بۇل ماسەلەدە ءبىزدىڭ كاسىبي قىزمەتىمىز بار. ەگەر ءسىز ءبىر ماقساتقا جەتۋدى قالاساڭىز, ونىڭ جولىن مىندەتتى تۇردە تاباسىز», دەگەن ول ترەنينگ قاتىسۋشىلارىنا ساتتىلىك تىلەدى.
اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ توراعاسى قايرات بايمۋلدينوۆ «Tomiris» اقپاراتتىق-ءبىلىم بەرۋ باعدارلاماسىنىڭ باستى مىندەتتەرىنىڭ ءبىرى ايەلدەر مەن قىزداردىڭ كوشباسشىلىق جانە ساياسي بەلسەندىلىگىن ارتتىرۋ ەكەنىن جەتكىزدى. «بۇل ترەنينگ ارقىلى ايەلدەردىڭ كوشباسشىلىق قاسيەتتەرىن جوعارىلاتىپ, ساياسي ناۋقانداردا بەلسەندى بولۋىنا ىقپال ەتەمىز. ياعني قازاقستاننىڭ ساياسي الەۋەتىن ارتتىرۋعا ىقپال جاساۋ», دەدى ول.
قازاقستان بويىنشا 100-دەن استام قاتىسۋشىنىڭ بارلىعى ءوز وڭىرلەرىندە اۋديتورياسى اۋقىمدى جاندار ەكەنىن ايتا كەتەلىك. ماسەلەن, استانالىق ايەلدەر كۇشتەرى اليانسى توراعاسىنىڭ ورىنباسارى بايان تويكەباەۆانىڭ ايتۋىنشا, ايەلدەردىڭ قوعامداعى ءرولىن ارتتىرۋعا, ايەلدەردىڭ الەۋمەتتىك جاعدايىن جاقسارتۋعا, ەكونوميكالىق مۇمكىندىكتەرىن كەڭەيتۋگە بۇل ترەنينگتىڭ بەرەرى مول. «ايەلدەردىڭ ساياسي كوشباسشىلىق مەكتەبىن رەسپۋبليكانىڭ 16 وڭىرىندە باستاپ جاتىرمىز. بۇل جوبا اياسىندا مەكتەپ, كوللەدج, جوعارعى وقۋ ورىندارى قىزدارىن دا كوشباسشىلىققا دايىنداۋ مەكتەبىنىڭ جوسپارى قۇرىلادى», دەيدى ول.
ال KASIP كونسالتينگ ورتالىعىنىڭ باسشىسى, ايەلدەر كاسىپكەرلىگىن دامىتۋ ورتالىعىنىڭ مەنتورى, ورالدىق ترەنەر, زاڭگەر زۋلفيا تىنىمگەرەيقىزى كوپ جىلدان بەرى ىسكەر ايەلدەر كەڭەسىمەن جۇمىس ىستەۋىنىڭ ناتيجەسىندە كونكۋرستان ءوتىپ جوباعا كەلگەن. ول ايەلدەردى ساياساتقا قالاي دايارلاۋ كەرەك, قانداي قۇرالدار بار, العا كانداي ماقسات قويۋ كەرەك, ەلىمىزگە كانداي ليدەرلەر كەرەك, ساياساتتا ايەلدەردىڭ ءرولى قانداي ەكەنىن تۇسىنۋگە ترەنينگتىڭ سەپتىگى تيەتىنىن جانە ونى ءوز وڭىرىندەگى ايەلدەرگە جەتكىزەتىنىن ايتادى.
ترەنينگ بۇگىندە قازاقستاننىڭ بارلىق وڭىرىنەن 25 ترەنەردى وقىتۋ ارقىلى پۋلىن قالىپتاستىرادى. سونداي-اق جوبا وڭىرلەردەگى ساياسي بەلسەندى ايەلدەردى الداعى ۋاقىتتا وقىتۋ جانە ولاردى سۇيەمەلدەۋ مۇمكىندىگىن ارتتىرادى.
– باتىس وڭىرىندە ءوتىنىم بەرۋشىلەر كوپ بولدى. بىراق ترەنينگكە قابىلدانعاندار سانى – 25. ىرىكتەۋدى اقپارات مينيسترلىگى وتكىزىپ, بۇۇ ۇسىنىلعان كانديداتتاردى ىرىكتەپ, بەكىتتى. باستى تالاپ كانديداتتىڭ ترەنەرلىك تاجىريبەسىنىڭ جانە سايلاۋ ناۋقانىنا قاتىسۋ تاجىريبەسىنىڭ بار بولۋى بولدى. مەن – ترەنەرمىن. ياعني مەنىڭ قىزمەتىم ءبىلىم بەرۋ, داعدى قالىپتاستىرۋ, كەڭەس بەرۋ جانە سۇيەمەلدەۋدەن تۇرادى. ال قالعانى ۋاقىت ەنشىسىندە, – دەيدى باتىسقازاقستاندىق بيزنەس-ترەنەر اسەمگۇل قادىرحانوۆا.
اتالعان ترەنينگ 1 قاراشادا باستالىپ, 5 قاراشاعا دەيىن وتكىزىلەدى.