ۇلت ۇستازىنىڭ 150 جىلدىق مەرەيتويىنا وراي ءتۇرKسوي اياسىندا ىستامبۇل قالاسىندا «احمەت بايتۇرسىن ۇلى جانە تۇركى وركەنيەتى» اتتى عىلىمي كونفەرەنتسيا ءوتتى. القالى جيىنعا تۇركى مەملەكەتتەرى ۇيىمىنىڭ باس حاتشىسى باعدات امىرەەۆ, تۇركسوي باس حاتشىسى سۇلتان راەۆ, حالىقارالىق تۇركى اكادەمياسى پرەزيدەنتىنىڭ مىندەتىن اتقارۋشى مادجيدلي فيزۋلي, قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ەركەبۇلان ساپيەۆ, قازاقستان رەسپۋبليكاسىنىڭ ىستامبۇلداعى باس كونسۋلى ءالىم بايەل, ىستامبۇل ۋنيۆەرسيتەتىنىڭ رەكتورى ماحمۋت اك, سونداي-اق وسى شارانى حالىقارالىق دەڭگەيگە كوتەرۋگە اتسالىسىپ جۇرگەن ۆەلوشەرۋشى, اۋدارماشى ەرنات مەلس ۇلى قاتىستى.
كونفەرەنتسيانىڭ مودەراتورى عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ ەڭ الدىمەن تۇلعانىڭ تۇركى دۇنيەسىنە ورتاق مۇراسىنا توقتالدى. «احمەت بايتۇرسىن ۇلى – تۇركى حالىقتارىنا ورتاق تۇلعا. ونىڭ ءىلىمى حالىقارالىق عىلىمي كەڭىستىكتە, اسىرەسە, تۇركى الەمىندەگى گۋمانيتارلىق عىلىمداردا رەفورماتورلىق يدەيالارىمەن ەرەكشەلەنەدى», دەدى ول.
جيىن بارىسىندا وتاندىق جانە تۇركيا, ازەربايجان, وزبەكستان, قىرعىزستاننىڭ الاشتانۋشى, احمەتتانۋشى عالىمدارى بايانداما جاسادى. فيلولوگيا عىلىمدارىنىڭ دوكتورى, پروفەسسور تۇرسىن جۇرتباي بايانداماسىندا الاشتىقتاردىڭ ۇلت رۋحانياتىنداعى وراسان ەڭبەگىن اتاپ ءوتتى.
«ۇلتتىق تاۋەلسىز سانا تۋرالى يدەيانىڭ تۇعىرىن ءاليحان بوكەيحان ساياسي تۇرعىدان قالىپتاستىرسا, احمەت بايتۇرسىن ۇلى سونىڭ يدەيالىق نەگىزىن تىكەلەي ورنىقتىردى دەپ ەسەپتەيمىن», دەدى عالىم.
ال فيلولوگيا عىلىمدارىنىڭ دوكتورى, پروفەسسور ايگۇل ىسماقوۆا «احمەت بايتۇرسىن ۇلى – وتارلاۋعا قارسى تۇرعان ۇلت ۇستازى» اتتى بايانداماسىندا: «جازعان ءسوز جانىم اشىپ الاشىما!» دەپ ءوزىنىڭ ومىرلىك ۇستانىمىن ايقىنداپ العان احمەت بايتۇرسىن ۇلى وتانعا ادال قىزمەت ەتۋدىڭ ۇلگىسىن كورسەتىپ كەتكەن بىرەگەي عالىم» ەكەنىن ايتتى.
سونىمەن قاتار اتالعان كونفەرەنتسيادا ە.بوكەتوۆ اتىنداعى قاراعاندى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى جاندوس سماعۇلوۆ «احمەت بايتۇرسىن ۇلى – ۇلتتىق ادەبيەتتانۋ عىلىمىنىڭ نەگىزىن قالاۋشى», ا.بايتۇرسىن ۇلى اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى الماسبەك ابسادىق «ۇستاز جولى: اۋىل مۇعالىمىنەن ءبىلىم مينيسترىنە دەيىن», وزبەك مەملەكەتتىك الەم تىلدەرى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى (وزبەكستان رەسپۋبليكاسى) ماحانبەت ءجۇسىپوۆ «احمەت بايتۇرسىن ۇلى – قازاق جانە جالپى ءتىلتانىمىندا ءتىل, تىلدەسىم, تىلدەسىمدىك قىزمەت, ءتىل ماتەريالى عىلىمي ۇعىمدارى كونتسەپتسياسىنىڭ نەگىزىن قالاۋشى», ق.قاراساەۆ اتىنداعى بىشكەك مەملەكەتتىك گۋمانيتارلىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى (قىرعىز رەسپۋبليكاسى) تاشپولات سادىقوۆ «ا.بايتۇرسىن ۇلى جانە قىرعىز ءتىلتانىم تەرمينولوگياسىنىڭ قالىپتاسۋى», باكۋ سلاۆيان ۋنيۆەرسيتەتى تۇركولوگيا كافەدراسىنىڭ دوتسەنتى, فيلولوگيا عىلىمدارىنىڭ دوكتورى (ازەربايجان رەسپۋبليكاسى) نۋريدا نوۆرۋزوۆا «احمەت بايتۇرسىن ۇلى جانە تۇركى تىلدەرىندەگى تەرمينولوگيا پرينتسيپتەرى تۋرالى» تاقىرىپتارىندا بايانداما جاسادى.
كونفەرەنتسيا اياسىندا احمەت بايتۇرسىن ۇلىنىڭ ەڭبەكتەرىن تانىتۋعا ارنالعان كىتاپ كورمەسى, ۇلت ۇستازىنىڭ ءومىرى مەن قىزمەتىنە ارنالعان فوتوكورمە ۇيىمداستىرىلىپ, «قازاق وركەنيەتى جانە احمەت بايتۇرسىن ۇلى» تاقىرىبىندا بەينەروليك كورسەتىلدى.
سونداي-اق جيىن بارىسىندا «احمەت بايتۇرسىن ۇلى. تاڭدامالى شىعارمالارى» (قازاق, تۇرىك, اعىلشىن, ورىس تىلدەرىندە) جانە حالىقارالىق تۇركى اكادەمياسى تاراپىنان ۇسىنىلعان رايحان يماحانبەتتىڭ «عاسىر ساڭلاعى» كىتاپتارى تانىستىرىلدى.