كۇنى كەشە كاسىبي تەننيسشىلەر قاۋىمداستىعى (ATP) مەن ايەلدەر تەننيس قاۋىمداستىعى (WTA) سپورتشىلاردىڭ رەيتينگىن جاريالادى. قازان ايىنداعى ناتيجە بويىنشا قازاقستان ەرلەر قۇراماسىنىڭ وكىلدەرى رەيتينگتە جوعارىلاپ كەلەدى.
ماسەلەن, ەرلەر اراسىنداعى ەلىمىزدىڭ ءبىرىنشى راكەتكاسى الەكساندر بۋبليك بازەلدەگى ءتۋرنيردىڭ شيرەك فينالىنا جەتكەنى ءۇشىن 70 رەيتينگتە ۇپاي جيناپ, 38-ورىننان 36-ساتىعا كوتەرىلدى. سونىمەن قاتار «چەلەندجەر» تۋرنيرلەرىندە ءتاۋىر ونەر كورسەتكەن تيموفەي سكاتوۆ پەن بەيبىت جۇقاەۆ تا ءوز رەيتينگتەرىن جاقسارتىپ الدى. قازىرگى تاڭدا سكاتوۆ 141-ءشى, جۇقاەۆ 321-ورىندا تۇر. وكىنىشكە قاراي, ميحايل كۋكۋشكين (235), دەنيس ەۆسەەۆ (287), دميتري پوپكو (324) جانە گريگوري لوماكين (938) ءار اپتا سايىن رەيتينگتە تومەندەپ بارادى.
ال ايەلدەر اراسىنداعى رەيتينگتە قازاقستاندىقتاردان ەلەنا رىباكينا ءوز ورنىن ساقتاپ قالعان بولسا, قالعان تەننيسشىلەرىمىز تومەن قاراي سىرعىدى. اتاپ ايتقاندا, گۆادالاحاراداعى (مەكسيكا) ءتۋرنيردىڭ ەكىنشى اينالىمىندا سۇرىنگەن رىباكينا 22-ورىندا قالسا, يۋليا پۋتينتسەۆا ءبىر ساتى تومەندەپ, 54-ورىنعا جايعاستى. جىبەك قۇلامباەۆا (442) العاشقى توپ-500 تەننيسشىنىڭ قاتارىندا قالسا, زارينا دياس توپ-1000 تەننيسشىنىڭ ىشىنەن شىعىپ قالدى. جاراقاتىنا بايلانىستى جارتى جىلدان اسا كورتقا شىقپاعان دياس 1040-ورىندا تۇر.