شىمكەنتتەگى جاستار رەسۋرستىق ورتالىعىندا رەسپۋبليكا كۇنىنە وراي قازاقستان حالقى اسسامبلەياسىنىڭ «قايىرىمدىلىق كەرۋەنى» اتتى رەسپۋبليكالىق فورۋمى مەن گالا-كونتسەرتى ءوتتى.
اتالعان ءىس-شارا قازاقستان حالقى اسسامبلەياسى, اقپارات جانە قوعامدىق دامۋ مينيسترلىگى «قوعامدىق كەلىسىم» رمم جانە شىمكەنت قالاسى اكىمدىگىنىڭ قولداۋىمەن ۇيىمداستىرىلدى.
فورۋم جىل سايىن بالالار شىعارماشىلىعىن دامىتۋ, مۇمكىندىگى شەكتەۋلى بالالاردىڭ جەتىستىكتەرىن پاش ەتۋ, تۇلعا رەتىندە قالىپتاستىرۋ جانە قازىرگى قوعامعا, الەۋمەتتىك ورتاعا بەيىمدەۋ ماقساتىندا قولعا الىنادى.
جيىندا تىرەك-قيمىل اپپاراتى بۇزىلعان, كورۋ, ەستۋ قابىلەتى ناشار جانە ءتۇرلى جانرلاردا شىعارماشىلىقپەن اينالىساتىن بالالار (اسپاپتىق مۋزىكا, حالىقتىق, اكادەميالىق, ەسترادالىق جەكە ءان ايتۋ, اۆتورلىق ءان, پوەزيا, كوركەمسوز, ەرەكشە جانر, پانتوميما, حورەوگرافيا, بەينەلەۋ جانە ساندىك-قولدانبالى ونەر) مەن بالالار ۇجىمدارى ونەر كورسەتتى.
ءىس-شاراعا وڭىرلەردەن كەلگەن ارنايى دەلەگاتسيالار, شىمكەنت قالاسىنىڭ دەپۋتاتتارى مەن كاسىپكەرلەرى, مەتسەناتتار, قايىرىمدىلىق ۇيىمدارى مەن قورلار, قازاقستان حالقى اسسامبلەياسىنىڭ مۇشەلەرى, ەتنومادەني بىرلەستىك وكىلدەرى, ۇكىمەتتىك ەمەس ۇيىمدار, ەرىكتىلەر قوزعالىسىنىڭ كوشباسشىلارى قاتىستى.
سونىمەن بىرگە فورۋم قازاقستان رەسپۋبليكاسى پرەزيدەنتىنىڭ 2022 جىلعى 15 قىركۇيەكتەگى №1014 جارلىعىمەن بەكىتىلگەن قازاقستان حالقى اسسامبلەياسىنىڭ 2022-2026 جىلدارعا ارنالعان دامۋ تۇجىرىمداماسىن جۇزەگە اسىرۋ جونىندەگى ءىس-قيمىل جوسپارىنىڭ 8.1 تارماعىن ىسكە اسىرۋ ماقساتىندا جانە بالالار جىلى شەڭبەرىندە ۇيىمداستىرىلدى.
جيىن باعدارلاماسىنىڭ اياسىندا جۇزگە جۋىق بالا شىمكەنت قالاسىنىڭ كورىكتى جەرلەرىن ارالاپ, حايۋاناتتار باعىن تاماشالادى.
ءوز كەزەگىندە قالامىزداعى ەتنومادەني بىرلەستىكتەر بالاقايلارعا كوتەرىڭكى كوڭىل كۇي سىيلاۋعا اتسالىسىپ, ءوز تاراپىنان كادەسىيلارىن تابىستادى.
– قازاقستان حالقى اسسامبلەياسىنىڭ ۇيىتقى بولۋىمەن ءوتىپ جاتقان يگى شارانىڭ باستى ماقساتى – مۇمكىندىگى شەكتەۋلى بالالاردىڭ شىعارماشىلىعىن قولداۋ ارقىلى جاس بۋىندى دامىتۋ مەن تاربيەلەۋ. حالقىمىزدىڭ «كەڭ بولساڭ, كەم بولمايسىڭ» دەيتىن ناقىل ءسوزىن بويىنا سىڭىرگەن ەتنوبىرلەستىكتەر قايىرىمدىلىق كورسەتۋدى وزدەرىنە ازاماتتىق پارىز دەپ ءبىلىپ, مۇقتاج جاندارعا ءاردايىم قولۇشىن سوزىپ كەلەدى. قايىرىمدىلىق سىندى قاسيەتتى قۇندىلىقتى دارىپتەۋدى كوزدەگەن «قايىرىمدىلىق كەرۋەنى» فورۋمى – قوعامدىق كەلىسىم مەن جالپىۇلتتىق بىرلىكتىڭ باستى فاكتورى رەتىندە قوعامدا مەيىرىمدىلىك پەن ءوزارا رياسىز كومەك جاساۋعا ىقپالداسۋدى ابىرويمەن اتقارىپ كەلەدى. «كەڭ پەيىلدى كەمىمەس, تار پەيىلدى كەڭىمەس» دەگەن قاناتتى سوزبەن بۇگىنگى فورۋمعا اتسالىسقاندارعا شىنايى العىس ايتامىن. ەل يگىلىگى جولىنداعى جۇمىستارىڭىزعا تابىس, وتباسىلارىڭىزعا باق-بەرەكە, اماندىق تىلەيمىن! – دەدى شىمكەنت قالاسىنىڭ ىشكى ساياسات جانە جاستار ىستەرى جونىندەگى باسقارماسىنىڭ باسشىسى م.شوتانوۆ.
جالپى, مەگاپوليستە ەل بىرلىگىن ارتتىرۋ, شاھاردى رياسىز دوستىق مەكەنىنە اينالدىرۋ باعىتىندا اسسامبلەيا جانىنداعى قوعامدىق قۇرىلىمدار مەن 17 ەتنومادەني بىرلەستىك مۇشەلەرى ايانباي ەڭبەك ەتىپ كەلەدى.
سونىمەن قاتار شىمكەنت قالالىق قازاقستان حالقى اسسامبلەياسى مۇشەلەرى قايىرىمدى ىستەر جاساۋدا كوش باستاپ تۇر. قازىرگى تاڭدا ساۋاپتى ءىس اسسامبلەيا جۇمىسىنىڭ ءبىر باعىتى بولىپ قالىپتاستى. بۇعان دالەل رەتىندە كەشەگى قوستاناي وبلىسىنداعى ءورت سالدارىنان تۋىنداعان جاعدايعا بايلانىستى شىمكەنتتىك اسسامبلەيا مۇشەلەرى تاراپىنان 2 ملن 265 مىڭ تەڭگە كولەمىندە گۋمانيتارلىق كومەك كورسەتىلگەنىن, جالپى جىل باسىنان بەرى قحا 8,7 ملن تەڭگە مولشەرىندە قايىرىمدىلىق ءىس جاساعانىن اتاپ وتكەن ءجون.
قالالىق اسسامبلەيا جانىنداعى كاسىپكەرلەر قاۋىمداستىعى بيىل ءىىى توقساننىڭ وزىندە «مەكتەپكە جول» اكتسياسى اياسىندا 150 وقۋشىنى قاجەتتى وقۋ-قۇرالدارمەن, كيىم-كەشەكپەن قامتاماسىز ەتتى.
بۇدان بولەك, قازاقستان حالقى اسسامبلەيا مۇشەلەرى ءتۇرلى قايىرىمدىلىق ءىس-شارالاردان, كوپبالالى جانە جالعىز باستى انالاردى, مۇمكىندىگى شەكتەۋلى بالالاردى ومىرگە يكەمدەۋ, كومەك كورسەتۋ سياقتى يگى ىستەردەن شەت قالماۋدا.
شىمكەنت