الداعى پرەزيدەنت سايلاۋى «BIR TOLQYNDA» جاستار ديالوگ الاڭىنىڭ وتىرىسىندا تالقىلاندى.
استانا قالاسى ءماسليحاتىنىڭ دەپۋتاتى, ەندوحيرۋرگيا كلينيكاسىنىڭ باسشىسى سالتانات جانالاەۆا ەل بولاشاعى جاستاردىڭ قولىندا ەكەنىن اتاپ ءوتتى. «قاي زاماندا بولسىن, جاستار قاۋىمى رەفورمالاردى جۇزەگە اسىرۋ ءىسىنىڭ نەگىزگى قوزعاۋشى كۇشى بولدى. سەبەبى جاستاردىڭ بويىندا جاڭا وي, جاڭا كوزقاراس, جاڭا ماقسات پەن ۇمتىلىس بار. ءبىز وزگەرىستەر داۋىرىندە ءومىر ءسۇرىپ جاتىرمىز. ەرتەڭگى ەل تاعدىرى – بۇگىنگى جاستاردىڭ قولىندا», دەدى دەپۋتات.
ءوز كەزەگىندە, استانا قالاسى ءماسليحاتىنىڭ دەپۋتاتى, №6 ەمحانانىڭ باس دارىگەرى دينارا بايسەركينا جاستار قاۋىمىن داۋىس بەرۋ كۇنى ازاماتتىق ۇستانىم تانىتۋعا شاقىردى. «دامۋدىڭ بارلىق ستراتەگيالىق جوسپارى, جاھاندىق بارلىق ماسەلەنى شەشۋ مىندەتى – جاستار قاۋىمىنىڭ يىعىنا ارتىلعان جۇك. ولاردىڭ ىزدەنۋگە, جەتىلۋگە, دامۋعا مول مۇمكىندىگى بار. ەلىمىز جاستاردىڭ دامۋىنا بار جاعدايدى جاسايدى. جاستارىمىز كەزەكتەن تىس پرەزيدەنت سايلاۋىنا بەلسەندى قاتىساتىنىنا تولىق سەنىمدىمىن», دەدى ول.
كەزدەسۋ سوڭىندا ديالوگ الاڭىنىڭ مودەراتورى, حالىقتىق كواليتسيا بەلسەندىسى ارسلانبەك ماعزۇم الداعى سايلاۋ تۋرالى ءوز پىكىرىن ءبىلدىردى.
ء«بارىمىز ءبىر شاڭىراق استىندا – ورتاق ءۇيىمىز قازاقستاندا ءومىر ءسۇرىپ جاتىرمىز. مەملەكەتىمىزدىڭ يگىلىگى ءۇشىن جان اياماي ەڭبەك ەتەمىز. سوندىقتان 20 قاراشادا ءار جاس ازامات ءوزىنىڭ سايلاۋ ۋچاسكەسىنە كەلەدى دەپ ۇمىتتەنەمىن. سەبەبى بۇل كۇنى ءبىز كانديداتقا داۋىس بەرىپ قانا قويماي, ەل تاعدىرىن شەشەمىز. ەلدىڭ بولاشاعىن ويلاعان ءاربىر جاس بۇل سايلاۋعا قاتىسىپ, ءوز كانديداتىنا داۋىس بەرۋى كەرەك. ەلىمىزدىڭ دامۋىنا ءوز ۇلەسىن قوسۋ ءار جاستىڭ باستى ماقساتى, ساياسي قۇندىلىعى بولۋ كەرەك دەپ ويلايمىن. ەڭ ماڭىزدىسى – تۇراقتىلىقتى ساقتاۋدا, تاريحي قۇنىدىلىقتاردى ناسيحاتتاۋدا, دەموكراتيالىق پرينتسيپتەردى قالىپتاستىرۋدا جاستار الدىڭعى قاتاردا بولۋ كەرەك دەپ ەسەپتەيمىن. بۇل سايلاۋ جاستاردىڭ بەلسەنە قاتىسىپ, ءوز بولاشاقتارىنا نىق قادام جاساۋىنا زور مۇمكىندىك», دەپ تۇيىندەدى ول.