الەمدىك برەندتىڭ اينىماس فيلوسوفياسى

جاقىندا وسى كورپوراتسيانىڭ ۇيىت­قى بولۋىمەن كورەيا رەسپۋبليكاسىنا ءباسپاسوز ساپارىمەن بارىپ قايت­تىق. قازاقستاندىق بىرنەشە باق وكىلى­نىڭ باسىن قوسقان ساپار بارىسىندا دۇنيە­جۇزىلىك ەكسپو-2030 كورمەسىنىڭ پۋسان قالاسىندا وتۋىنە ۇلەس قوسىپ جۇر­گەن اتالعان كومپانيانىڭ ءوز قا­لاسى – Samsung Digital City-گە ارنايى ات باسىن بۇر­دىق. رەسمي تۇردە ايت­ساق, Samsung كوم­پا­نياسىنىڭ سۋۆون قالاسىندا ورنا­لاس­قان شتاب پاتەرىنە باردىق.

سەۋلدەن 65 شاقىرىم قاشىقتا جات­قان قالاشىقتى Samsung-ءتىڭ «جۇرەگى» دەۋگە دە بولادى. سەبەبى مۇندا كومپانيا قىزمەتكەرلەرى ءۇشىن سالىنعان ەمحانا, ساياباق, تۇرعىن ءۇي, فۋتبول, گولف الاڭدارى, مۋزەيدەن بولەك, ەڭ ماڭىزدىسى – ءىرى زەرتتەۋ كەشەنى بار. كەشەن بىرنەشە كوپقاباتتى ءۇيدى, سونىڭ ىشىندە R4 زەرتتەۋ ورتالىعىن قامتيدى.

37 قاباتتى جەرۇستى جانە 5 قاباتتى جەراستى بيىك عيماراتتىڭ تىك كولەمى كوزدى شاعىلىستىراتىن شىنى پانەلدەرمەن قاپتالعان. الەمنىڭ سەن تۇر, مەن اتايىن دەگەن مىقتى ساۋلەتشىلەرى­نىڭ وزدەرى بۇل عيماراتتى كولەمى مەن كە­ڭىستىگى, سونداي-اق سىرتقى ارلەۋىنە قولدانعان ساپالى ماتەريالدارىنا قا­راپ «Samsung-ءتىڭ ۇستەمدىگىن ايشىقتاي­تىن كەشەن» دەپ جوعارى باعالاعان.

Samsung City-گە كەز كەلگەن ادام كىرە المايدى. كىرگەندەردىڭ وزدەرى تىڭ­­عىلىقتى ءارى جان-جاقتى تەكسەرۋدەن وتەدى. ونىڭ سەبەبى دە تۇسىنىكتى. شتاب پاتەر – الەمگە ايگىلى Samsung-ءتىڭ وت­كەنىن عانا ەمەس, بولاشاعىن دا جال­عاي­تىن تاريحي مەكەن. ءدال وسى قالا­شىق ورنالاسقان جەردە – سۋۆون قالا­سىن­دا كومپانيانىڭ العاشقى زاۋىتى ورنالاسقان. باستاپقىدا, ناقتىراق ايت­ساق, 1970 جىلى وسى زاۋىتتان اق-قارا, سودان كەيىن ءتۇرلى-ءتۇستى تەلەديدارلار قۇراستىرىلىپ, شىعارىلا باستايدى. العاش رەت وسىنداي ۇلكەن جەتىستىككە قول جەتكىزگەننەن بەرى كومپانيا تۇرمىستىق تەحنيكا مەن ەلەكترونيكا سالاسىندا كوش باستاپ كەلەدى. كومپانيانىڭ قارقىن­دى دامۋى جاڭا تەحنولوگيالاردى ەنگىزۋ جانە ءارتۇرلى تۇرمىستىق تەحنيكانى شىعارۋمەن, جوعارى تەحنولوگيالىق ەلەكترونيكاعا قاراي كەڭەيۋمەن قاتار ءجۇر­دى. الەمدىك تەحنولوگيا تاريحىنداعى ناعىز سەنساتسيا جەدەل جاد چيپتەرىن, سكد مونيتورلارىن, جالپاق ەكراندى تەلەديدارلاردى جاساۋمەن تىعىز بايلانىستى. قازىرگى ۋاقىتتا سۋۆونداعى ءبىر كەزدەگى الاقانداي عانا جەردى الىپ جاتقان زاۋىت – ۇلكەن كەشەن, جۇمىس ىستەۋگە جانە دەمالۋعا قاجەتتىنىڭ بارلىعى بار شاعىن قالا.

ارينە, كومپانيانىڭ بۇكىل سىر-قۇ­پياسى ساقتالعان بۇل كەشەندەرگە ءبىزدى كىرگىزگەن جوق. بۇل قالاشىقتا جۋرنا­ليستەرگە ەسىگىن ايقارا اشقان ءبىر عانا مەكەمە بار. ول – SIM – Samsung Innovation Museum – Samsung يننوۆاتسيالىق مۋزەيى.

مۋزەيدە قازاقستاندىق باق وكىلدە­رىن Samsung Electronics-ءتىڭ كورپورا­تيۆ­تىك ۆيتسە-پرەزيدەنتى كيم حەن دجە مىرزا قارسى الدى. العىسوزىندە كومپا­نيا وكىلى پۋسان قالاسىندا ەكسپو-2030 دۇنيەجۇزىلىك كورمەسىن وتكىزۋدىڭ ما­ڭىز­دىلىعى مەن تاريحي مانىنەن كەڭى­نەن توقتالدى.

«ارينە, ءبىز پۋسان قالاسىندا ەكسپو-2030 كورمەسىن وتكىزۋدى قول­دايمىز. ويتكەنى كورەيا دا «بولاشاق ­ەنەرگياسى» دەگەن تاقىرىپپەن 2017 جىلى حالىقارالىق مامانداندىرىل­عان كورمە وتكىزگەن قازاقستان سياقتى ءوز تاجىريبەسى مەن يننوۆاتسيالارىن الەممەن بولىسە الادى دەپ سانايمىز», دەيدى كيم حەن دجە مىرزا. ال ءبىزدىڭ «كورەيادا كورمەنى وتكىزۋدىڭ سام­سۋنگ ءۇشىن قانداي پايداسى بار؟» دەگەن سۇ­را­عىمىزعا كومپانيانىڭ ۆيتسە-پرە­زيدەنتى: «Samsung Electronics IT تەحنولوگيالارىندا تاجىريبەسى مول, جان-جاقتى ساراپتاماعا دا يە. دۇنيەجۇزىلىك ەكسپو-2030 كورمەسىن ەلىمىزدە وتكىزۋ ارقىلى كورپوراتسيا جاھاندىق قوعام­نىڭ دامۋىنا ءوز ۇلكەن ۇلەسىن قوسىپ, وزىن­دىك قولتاڭباسىن قالدىرۋعا مۇمكىندىك الادى. ال بۇل ماقساتتى جۇزەگە اسىرۋدا Samsung ونىمدەرى مەن قىزمەتتە­رىن كورسەتە الاتىن تاماشا الاڭ بولىپ ­سانالادى. سەبەبى بۇل – ءبىزدىڭ باستى ميسسيامىز»», دەپ جاۋاپ بەردى.

Samsung-ءتىڭ تۋعان جەرى – سۋۆوندا ورىن تەپكەن مۋزەي الىپ كەشەننىڭ 5-قاباتتى عيماراتىندا ورنالاسقان. مۇندا ەلەكتروندىق يننوۆاتسيالار تاريحىنداعى ەڭ ۇزدىك ۇلگىلەر ۇسى­نىل­عان. مۋزەي قىزمەتكەرلەرىنىڭ وزدەرى بۇل ونەرتابىستاردى «ادامزات ءومىرىن جاقسارتاتىن ونىمدەردى دامىتۋعا جانە جەتىلدىرۋگە مۇمكىندىك بەرەتىن تەحنولوگيا» دەپ تانىستىردى. مۋزەي تا­بالدىرىعىن اتتاعان ءار كەلۋشىگە ادامزات وركەنيەتىنىڭ قايدان جانە قالاي ومىرگە كەلگەنىن ءتۇسىندىرىپ قانا قويمايدى, ءارتۇرلى ساناتتاعى Samsung ونىمدەرىن جاساۋ ۇدەرىسىندە قايدان شابىت العانىن كورسەتەدى.

اۋدانى 11 مىڭ شارشى مەترگە جەتە عابىل مۋزەيگە كىرە سالعاندا ءسىزدى جىلجىمالى ەكران رەتىندە جابدىقتال­عان تانىستىرۋ قابىرعاسى قارسى الادى. ۇلكەندىگى ەكىقاباتتى ۇيدەي بولاتىن ەكراننان كورسەتىلگەن كومپانيا ميسسيا­سى مەن تاريحى تۋرالى بەينەباياندى تاماشالاپ تۇرىپ, ءوزىڭىزدى قۇددى ءبىر سول الەمنىڭ ىشىندە جۇرگەندەي سەزىنە­سىز. تەك تانىستىرىلىم اياقتالعاننان كەيىن قابىرعا بىرنەشە بولىككە جارىلىپ, اينالما ەسىككە اينالعاندا عانا يننوۆاتسيالىق تەحنولوگيالار مۋزەيىنە كەلگەنىڭىز ەسىڭىزگە تۇسەدى. جالپى مۋزەيگە كەلۋشىلەردى ىشتە وسىنداي 30-دان استام ەكران قارسى الادى.

مۋزەيدە كومپانيانىڭ 200-گە جۋىق ونەرتابىسى مەن ءونىمى قويىلعان. ءبىز­دى تاڭعالدىرعان ءبىر فاكت – مۇندا Samsung-تەن بولەك وزگە دە كومپانيالاردىڭ ­ەكس­پو­ناتتارى كەزدەسەدى. مىسالى, ەكس­­پو­ناتتاردىڭ قاتارىنان العاشقى Apple iPhone نەمەسە Sony Trinitron تەلە­ديدارىن كەزدەستىردىك. مۋزەي قىز­مەتكەرلەرىنىڭ ايتۋىنشا, ءدال وسى ونىم­دەر «Samsung-كە ءوز ونىمدەرىن دامىتۋدىڭ جانە پايدا تابۋدىڭ سەنىمدى جولىن كورسەتىپ بەرگەن». ياعني بۇل دا باسەكەگە قابىلەتتى ورتانى قۇرۋدىڭ ءبىر جولى دەپ تۇسىنگەن دۇرىس بولار. ال مۋزەيگە قويىلعان ونىمدەر مەن ولاردىڭ دامۋ تاريحىنا سۇيەنسەك, سمارت­فونداردىڭ قازىرگى ءداۋىرى Samsung Galaxy S II-دەن باستالادى.

«ونەرتاپقىشتار ءداۋىرى», «يندۋس­تريالدى يننوۆاتسيالار عاسىرى» جانە «قۇرۋ كەزەڭى» – مۋزەيدىڭ ءۇش نەگىزگى كور­مە زالى وسىلاي اتالادى. ياعني كومپانيا ونىمدەرىنىڭ تاريحى ءۇش نەگىزگى تاقىرىپقا بولىنگەن – «يننوۆاتسيا تۇ­­قىمدارى», «يننوۆاتسيانىڭ وزەگى» جانە «شابىتتاندىراتىن يننوۆاتسيا». العاشقى زالدا ەلەكتر شامىن ويلاپ تاپقان توماس ەديسون, «تەلەفوننىڭ ءتۇپ اتاسى» گرەيام بەلل مەن ەلەكتر قوز­­عالتقىشىنىڭ العاشقى مودەلىن جاساپ شىعارعان فيزيك مايكل فارادەي ونەرتابىستارىنىڭ تۇپنۇسقا ۇلگىلەرى ساقتالعان. ماسەلەن, وسى زالداعى ينتەر­اكتيۆتى ءمولدىر ەكراننان 1875 جىلى الەكساندر گرەيام بەلل جاساعان تەلەفوندى كورە الاسىز.

ەكىنشى زالعا Samsung پەن وزگە با­سە­كەلەس كومپانيالاردىڭ قىزىقتى, بىراق ەسكى ونىمدەرى قويىلعان. مۇندا Samsung-ءتى تۇرمىستىق تەحنيكا ءبولىمىن قۇرۋعا شابىتتاندىرعان Maytag ەلەكتر كىر جۋعىش ماشيناسى مەن Hoover شاڭ­سورعىشى دا تابىلادى. بۇل جەردە, ءتىپ­تى وتكەن عاسىردىڭ تاريح ەنشىسىندە قال­عان كومپانيانىڭ العاشقى قالتا تەلەفون­دارى, سونىڭ ىشىندە IBM Simon personal Communicator قالتا كوم­پيۋ­تەرى, Samsung SCH-V200 كامەراسى مەن Motorola Startac فليپ-فلوپىن دا كە­زىكتىرەسىڭ. 1999 جىلى Samsung شىعارعان Watch Phone فۋنكتسيونالدى ساعاتىن تاعۋ ءبىر كەزدەرى قازاقستاندا دا ەرەكشە ءسان بولىپ ەدى.

تاريحي جادىگەرلەردىڭ اراسىندا دجون لوگي بەرد جاساپ شىعارعان, ەڭ العاش ساتىلىمعا 1930 جىلى شىققان العاشقى كوممەرتسيالىق تەلەديدار دا بار. ال 1975 جىلدان باستاپ شىققان Econo اق-قارا تەلەديدارى Samsung-ءتىڭ ەنەرگيا تيىمدىلىگى ارقاسىندا تەلەديدار نارىعىنداعى العاشقى ءساتتى ونىمدەرى­نىڭ ءبىرى اتانعان. وسىلايشا, ءۇش جىلدان كەيىن كومپانيا كورەيا نارىعىنىڭ ­40 پايىزدان استامىن جاۋلاپ ۇلگەرەدى. ال Samsung Galaxy S II 40 ميلليون دانا­دان استام ساتىلعان كومپانيانىڭ وتە ءساتتى سمارتفونى بولىپ سانالادى.

ءۇشىنشى زال Samsung كومپانياسى­نىڭ B2B شەشىمدەرى مەن «اقىلدى ءۇي» ساناتىنداعى ونىمدەرىنە ار­نال­عان. وڭتۇستىك كورەيانىڭ جەتەكشى كوم­پانياسىنىڭ تاريحى مەن فيلوسوفيا­سى تۋرالى سىر شەرتەتىن تاريحي زال, ءار ەكسپونات تۋرالى اقپارات بەرەتىن ءمولدىر, ينتەراكتيۆتى ەكراندار, 4K اجىراتىمدى جانە 180° كورىنىسى بار اسەرلى پانورامالىق ەكران – وسىنىڭ بارلىعى Samsung-ءتىڭ يننوۆاتسيالار ارقىلى الەمدى قالاي جاقسارتا تۇسكەنى تۋرالى سىر شەرتەدى. سول سەبەپتى دە بولار SIM مەكتەپ وقۋشىلارى ەكسكۋرسيا جاسايتىن جاي عانا مۋزەي ەمەس, بۇكىل كورەي ۇلتىنىڭ ماقتانىشىنا اينالعان مەكەن بولىپ سانالادى. ويتكەنى مۇندا تەحنولوگيا الەمىنىڭ وتكەنى مەن بۇگىنى عانا بەينەلەنبەيدى, مۇندا تۇتاس ءبىر ەل تاريحىنىڭ ءجۇرىپ وتكەنى داڭعىل جولى جاتىر.

ءتۇيىن. بۇگىندە Samsung كورپورا­تسياسىنىڭ 300 مىڭداي قىزمەتكەرى الەمنىڭ 70-تەن استام ەلىندە جۇمىس ىستەيدى. قۇرىلعان ساتتەن باستاپ بۇگىنگى كۇنگە دەيىن ءبىر عانا فيلوسوفيانى ۇستانىپ كەلە جاتقان برەند «الەمدى جاقسارتۋعا كومەكتەسەتىن تاۋارلار مەن قىزمەتتەردى ءوندىرۋ» دەيتىن باعىتىنان الشاقتاپ كەتكەن ەمەس. «بۇل ماقساتقا جەتۋ ءۇشىن تەحنولوگيالىق جانە ادامي رەسۋرستاردى پايدالانۋ قاجەت», دەيدى كورپوراتسيا اكىمشىلىگى. ال ونى جۇزەگە اسىرۋ ءۇشىن قىزمەتكەرلەردىڭ بىلىكتىلىگىن ۇنەمى ارتتىرىپ, ولارعا جاقسى ەڭبەك جاعدايىن جاساۋ, تالانتتى مامانداردى ىزدەۋ ءارى قاتارعا قوسۋ – مىنە, تاريحى شاعىن عانا وتباسىلىق كاسىپورىننان باستالىپ, سا­ناۋلى جىلدا ترانسۇلتتىق كورپورا­تسيا­عا اينالعان Samsung-ءتىڭ باستى كودەكسى وسىنداي.

استانا – سەۋل – پۋسان – استانا