بۇگىن Astana Media Week حالىقارالىق فورۋمىنىڭ ەكىنشى كۇنىندە سىرتقى ىستەر مينيسترلىگىنىڭ رەسمي وكىلى ايبەك سمادياروۆ پاندەميا باستالعان كەزدە قازاقستاندىق ستۋدەنتتەر قىتايدان قالاي ەۆاكۋاتسيالانعانىن ايتىپ بەردى, دەپ حابارلايدى Egemen.kz.
«وزدەرىڭىز بىلەتىندەي, كوروناۆيرۋس انىقتالعان ساتتەن باستاپ, ۋحان قالاسى تولىق جابىلدى. وعان ەشكىم كىرە دە, شىعا دا المادى. قيىن جاعدايدا قالعان 200-300 قازاقستاندىق ستۋدەنتتى قالادان قالاي الىپ شىعامىز دەپ كۇنى-ءتۇنى تولعاندىق. ءبىزدىڭ تاراپ ۇشاقتاردى دا, اقشانى دا دايىنداپ قويعان, ال ستۋدەنتتەر ءبىر قوناقۇيگە جينالىپ, ءبىزدى كۇتىپ وتىرعان. الايدا جەرگىلىكتى بيلىك قالادان ەشكىمدى شىعارماي قويدى. سوندا بۇل ىسكە قىتايدىڭ قازاقستانداعى ەلشىلىگىن جۇمىلدىرىپ, بەيجىڭدەگى بيلىكپەن ماسەلەنى شەشتىك. بىراق ستۋدەنتتەردى ەۆاكۋاتسيالاۋعا تىم از ۋاقىت بەرىلدى», دەپ ەسكە الدى ايبەك سمادياروۆ.
ونىڭ ايتۋىنشا, قازاقستاندىق ستۋدەنتتەردى الىپ شىعۋ ءۇشىن نەبارى 3 ساعات بەرىلگەن.
«باستاپقىدا كوروناۆيرۋس تۋرالى مالىمەت جەتكىلىكسىز بولعاندىقتان, ۋحانعا اتتانعان ەكيپاج مۇشەلەرىندە ۇرەي بولدى. ۇشاق بەلگىلەنگەن جەرگە قونعاننان كەيىن ەكيپاج دالاعا شىققىسى كەلمەدى. سول كەزدە سىرتقى ىستەر مينيسترلىگىنەن قىتايشا بىلەتىن ادامدى ىزدەدىك. ءبىر ادام شىعىپ, تىزىمدەگى ستۋدەنتتەردى تۇگەندەۋگە, جەرگىلىكتى بيلىك وكىلدەرىمەن كەلىسسوز جۇرگىزۋگە, ستۋدەنتتەردىڭ ۆيزالارىن دۇرىستاۋعا كومەكتەستى», دەپ قوستى ءسىم وكىلى.