قازاقستاننىڭ حالىق جازۋشىسى شەرحان مۇرتازانىڭ 90 جىلدىعىنا وراي تاراز توپىراعىندا كوپتەگەن اۋقىمدى ءىس-شارا ۇيىمداستىرىلسا, ونىڭ ەڭ ءىرىسى – قالامگەرلەر اراسىندا وتكەن «اقيقاتتىڭ اق تۋى» اتتى بايقاۋ. شەراعانىڭ كوزىن كورگەن, قاسىندا جۇرگەن قازاقتىڭ يگى جاقسىلارىنىڭ بارلىعى قاتىسقان بايقاۋ جوعارى دەڭگەيدە ءوتتى. قاتىسۋشىلاردىڭ بارلىعىنىڭ ەستى ەستەلىكتەرى وبلىستىق «Aq jol» گازەتىندە بىرنەشە اي بويى تۇراقتى تۇردە جاريالاندى.
بايقاۋ قورىتىندىسىندا «Egemen Qazaqstan» گازەتىنىڭ ارداگەرى, تانىمال جۋرناليست گۇلزەينەپ سادىرقىزى باس جۇلدەگە لايىق دەپ تانىلسا, بەلگىلى جازۋشى قۋاندىق تۇمەنباي ءبىرىنشى ورىن بيىگىنەن كورىندى. اباي اتىنداعى مەملەكەتتىك سىيلىقتىڭ لاۋرەاتى, اقىن سەرىك اقسۇڭقار ۇلى مەن حالىقارالىق «الاش» ادەبي سىيلىعىنىڭ يەگەرى, قالامگەر كوسەمالى ءساتتىباي ۇلىنا ەكىنشى ورىن بۇيىرسا, جازۋشى-دراماتۋرگ, حالىقارالىق «الاش» ادەبي سىيلىعىنىڭ لاۋرەاتى ەلەن ءالىمجان مەن انار قونىس ۇزدىك ۇشتىكتەن كورىندى.
ۇيىمداستىرۋشىلار جۇلدەگە لايىقتى شىعارمالاردىڭ كوپتىگىن ەسكەرگەن بولۋى كەرەك, وزگە دە بىرنەشە اۆتور جۇلدەگەرلەر قاتارىنان كورىندى. اتاپ ايتار بولساق, ءۇمىت بيتەنوۆا, كايىم-مۇنار تابەەۆ, اقىلجان مامىت, كوشكىنباي ەلىكباەۆ سىندى ءتورت اۆتورعا ىنتالاندىرۋ جۇلدەسى تابىستالدى. جۇلدەگەرلەردىڭ بارلىعى قوماقتى قارجىلاي سىيلىققا يە بولدى.
سونىمەن قاتار شەرحان مۇرتازا اتىنداعى «رۋحانيات جانە تاريحتانۋ» ورتالىعى ۇيىمداستىرعان رەسپۋبليكالىق «شىننىڭ ءجۇزى – شەراعا» اتتى اقىندار ءمۇشايراسى قورىتىندىلانىپ, ۇزدىك شىققان شىعارما اۆتورلارى باعالى سىيلىقتارمەن ماراپاتتالدى.
مۇشايراعا ەلىمىزدىڭ ءار قيىرىنان جالپى سانى وتىز توعىز اۆتوردان شىعارمالار كەلىپ تۇسكەن بولاتىن. قازىلار القاسىنىڭ سۇرىپتاۋىنان وتكەن بەس اقىننىڭ ولەڭدەرى جۇلدەگە لايىق دەپ تانىلعان ەكەن. ناتيجەسىندە, باس جۇلدە ارداگەر جۋرناليست, اقىن بايحامانبەت احمەتكە بۇيىرسا, «Egemen Qazaqstan» گازەتىنىڭ جامبىل وبلىسىنداعى مەنشىكتى ءتىلشىسى تابيعات ابايلداەۆ ءبىرىنشى ورىن يەگەرى اتاندى. ارايلى جاقسىلىق ەكىنشى ورىنعا, ءبىرجان احمەر مەن بالتابەك نۇرعاليەۆ ءۇشىنشى ورىنعا تابان تىرەدى.