پارلامەنت ءماجىلىسىنىڭ ۇيىمداستىرۋىمەن استانادا شاعىن فۋتبولدا باق وكىلدەرى اراسىندا رەسپۋبليكالىق تۋرنير باستالدى. جارىس رەسپۋبليكا كۇنىنە ارنالىپ وتىر.
ايتا كەتۋ كەرەك, مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءبىرىنشى وتىرىسىندا رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىنعان بولاتىن.
ءىس-شاراعا پارلامەنت ءماجىلىسىنىڭ دەپۋتاتتارى, اقپارات جانە قوعامدىق دامۋ, مادەنيەت جانە سپورت مينيسترلىكتەرىنىڭ باسشىلارى, سونىمەن قاتار استانا قالاسى اكىمدىگىنىڭ وكىلدەرى قاتىستى.
رەسپۋبليكالىق ءتۋرنيردى ءماجىلىس توراعاسىنىڭ ورىنباسارى پ. كازانتسەۆ اشىپ بەردى. ۆيتسە-سپيكەر جارىسقا قاتىسۋشىلاردى رەسپۋبليكا كۇنىمەن قۇتتىقتاپ, مۇنداي ءتۋرنيردىڭ العاش رەت ۇيىمداستىرىلىپ وتىرعانىن ايتىپ, ساتتىلىك پەن جەڭىس تىلەدى.
– رەسپۋبليكا كۇنى مەرەكەسىنىڭ ءاربىر قازاقستاندىق ءۇشىن ماڭىزى ەرەكشە. بۇل كۇن ەل ەگەمەندىگىنىڭ باستاۋى بولدى. بۇگىن وسى مەرەكەگە وراي جارىس وتكىزىپ وتىرمىز. دەپۋتاتتار كورپۋسى مەن جۋرناليستەر حالىقتىڭ ماسەلەسىن بىرگە كوتەرەتىن, كۇندەلىكتى ومىردە بەلسەندى جۇمىس ىستەيتىن وداقتاستار, – دەدى ۆيتسە-سپيكەر.
اقپارات جانە قوعامدىق دامۋ ءمينيسترى د.قىدىرالى ءسوز سويلەپ, رەسپۋبليكا كۇنى قارساڭىندا ۇيىمداستىرىلىپ جاتقان ءىس-شارانىڭ ماڭىزدىلىعىنا توقتالدى.
– ارايلى ازاتتىعىمىزدىڭ, تۇعىرلى تاۋەلسىزدىگىمىزدىڭ سيمۆولى بولعان رەسپۋبليكا كۇنىمەن قۇتتىقتايمىن. وسىنداي ۇلى مەرەكە قارساڭىندا ءتۋرنيردى ۇيىمداستىرۋعا باستاماشىلىق جاساعان ماجىلىسكە, ءماجىلىس توراعاسى ەرلان قوشانوۆقا العىس بىلدىرەمىن. ءبىز جۋرناليستەر قاۋىمى جارىسا وتىرىپ, جاراسامىز. دوپ تالاستىرا وتىرىپ, تابىسامىز. بۇگىنگى تۋرنير دوستىقتىڭ بەلگىسى بولادى, – دەدى د.قىدىرالى.
رەسپۋبليكالىق تۋرنيرگە اتىراۋ, پاۆلودار, سولتۇستىك قازاقستان, قاراعاندى, شىعىس قازاقستان, جەتىسۋ وبلىستارى مەن استانادان كەلگەن 20-دان استام جۋرناليستەر كومانداسى, سونداي-اق ءماجىلىس دەپۋتاتتارى مەن قىزمەتكەرلەرى قاتىسۋدا.
تۋرنير ەلوردامىزدىڭ «استانا-ارەنا» ستاديونىندا ءوتىپ جاتىر.