پارلامەنت سەناتىنىڭ توراعاسى ماۋلەن اشىمباەۆ «كوركەمونەر اكادەمياسى» قوعامدىق قورىنىڭ 15 جىلدىعىنا وراي ۇلتتىق مۋزەيدىڭ باستاماسى بويىنشا ۇيىمداستىرىلعان « ۇلى دالا سازى» كورمەسىنە باردى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
ماۋلەن اشىمباەۆ مۇراجايدى ارالاۋ بارىسىندا اكادەميا مۇشەلەرىمەن اڭگىمەلەسىپ, جاڭا جادىگەرلەرمەن تانىستى. ەكسپوزيتسيادا 150-دەن استام كەسكىندەمە, 30-دان استام گرافيكالىق جۇمىس جانە ءمۇسىن بار. ولاردىڭ كوپشىلىگى سوڭعى جىلدارى دۇنيەگە كەلگەن جانە ءالى دە ونەرسۇيەر قاۋىمىنىڭ نازارىنا ۇسىنىلماعان تۋىندىلار.
سەنات توراعاسى مادەنيەت پەن ونەر ۇلتتىق ەرەكشەلىكتى ساقتاۋداعى اسا ماڭىزدى ماسەلەلەردىڭ ءبىرى ەكەنىن اتاپ ءوتتى.
«كوشپەندىلەردىڭ ەستەتيكاسى مەن دۇنيەتانىمى وتە تەرەڭ جانە ەرەكشە. كوشپەندىلەردە ادام تابيعاتپەن ەتەنە جاقىن بولىپ, الەمنىڭ ۇيلەسىمدى بولىگىنە اينالدى. قورشاعان ورتاعا جاناشىرلىقپەن قاراۋ – نومادتاردىڭ دۇنيەتانىمىنداعى ماڭىزدى ەرەكشەلىكتەردىڭ ءبىرى بولدى. وسىنىڭ ءبارى كوشپەلى حالىقتاردىڭ بەينەلەۋ ونەرىندە دە كورىنىس تاپتى», دەپ اتاپ ءوتتى ماۋلەن اشىمباەۆ.
سەنات توراعاسىنىڭ پىكىرىنشە, بۇگىندە كوپتەگەن وتاندىق سۋرەتشىلەر كوشپەندىلەردىڭ ونەرىن زاماناۋي تۇرعىدا زەردەلەپ, ونى الەمدىك مادەنيەتتىڭ ماڭىزدى بولىگىنە اينالدىرۋ جولىندا ەسەلى ەڭبەك ەتىپ كەلەدى.
«سۋرەتشىلەر اراسىنداعى ءبىزدىڭ قۇرمەتتى اقساقالىمىز اماندوس اقاناەۆ نومادتاردىڭ ەستەتيكاسى تۋرالى ءوز تۇيگەن تانىمدى بەينەلەۋگە بۇكىل ءومىرىن ارنادى. ونىڭ بۇل باعىتتا قول جەتكىزگەن جەتىستىكتەرى اۋقىمدى, لايىقتى شاكىرتتەر شوعىرىن تاربيەلەدى», دەگەن ماۋلەن اشىمباەۆ ونەر قايراتكەرىنە العىسىن ءبىلدىردى.
سەنات توراعاسى سونىمەن قاتار « ۇلى دالا سازى» كورمەسى ۇلتتىق كودتى ساقتاۋ تۇرعىسىنان اسا ماڭىزدى ءرول اتقاراتىنىن اتاپ ءوتتى.
«قر ونەر اكادەمياسى» قوعامدىق قورى» قازاقستان اۋماعىندا دا, ودان تىس جەرلەردە دە ءتۇرلى كورمەلەر وتكىزۋدە بەلسەندى قىزمەت اتقارىپ كەلەدى.
« ۇلى دالا سازى» كورمەسى قازاقستاننىڭ بەينەلەۋ ونەرىن كەڭىنەن قانات جايۋى جانە اكادەميا مۇشەلەرىنىڭ شىعارماشىلىعىن دارىپتەۋ ماقساتىندا وتكىزىلىپ وتىر.
كورمەنىڭ اشىلۋ سالتاناتىنا مادەنيەت جانە سپورت ءمينيسترى داۋرەن اباەۆ, استانا قالاسىنىڭ اكىمى التاي كولگىنوۆ, ديپلوماتيالىق كورپۋس پەن شىعارماشىلىق زيالى قاۋىم وكىلدەرى, مەملەكەت جانە قوعام قايراتكەرلەرى, مادەنيەتتانۋشىلار قاتىستى.