بيىلعى «مەرەيلى وتباسى» كونكۋرسىنا قاتىسۋعا شىمكەنت قالاسىنان 128 وتباسى ءوتىنىم بەرگەن. ولاردىڭ قاتارىندا كوپبالالى وتباسىلار, التىن القا, كۇمىس القا يەگەرلەرى, جاس وتباسىلار, مادەنيەت پەن سپورت سالاسىنىڭ ۇزدىكتەرى, كاسىپكەرلەر, مەتسەناتتار جانە ۇزاق جىلدار بويى ۇرپاققا ءتالىم-تاربيە بەرىپ, ەڭبەك سىڭىرگەن ۇستازدار اۋلەتى دە بار.
سونىڭ ىشىندە شىمكەنت قالاسىنىڭ ءار اۋدانىنان 4 وتباسىدان ىرىكتەپ الىنىپ, قالالىق كەزەڭگە 16 وتباسى قاتىسقان. ارنايى كوميسسيانىڭ شەشىمىمەن بوكستان حالىقارالىق دارەجەدەگى سپورت شەبەرى, الەم چەمپيونى ءبىرجان جاقىپوۆتاي اپتال ازاماتتى تاربيەلەپ وسىرگەن قۇتتىبەكوۆتەر وتباسى جەڭىمپاز دەپ تانىلىپ, بايقاۋدىڭ رەسپۋبليكالىق كەزەڭىنە جولداما الدى.
– حالقىمىزدا «وتان – وتباسىنان باستالادى» دەگەن ۇعىم بار. سەبەبى وتباسى قاي زاماندا دا ەل بولاشاعى – جاستاردى تاربيەلەيتىن شاڭىراق بولعان. سوندىقتان وتباسى ينستيتۋتىنىڭ ىرگەسىن نىعايتۋ – قازاقستاننىڭ كەلەشەگىن كەمەلدى ەتۋدىڭ بىردەن ءبىر كەپىلى. «مەرەيلى وتباسى» ۇلتتىق بايقاۋىنىڭ ماقساتى دا سول, ۇلگىلى وتباسىلاردى انىقتاپ, ولاردىڭ ونەگەسىن وزگەلەرگە كورسەتۋ جانە دە ۇلتتىق سالت-ءداستۇرىمىز بەن وتباسى قۇندىلىقتارىن ناسيحاتتاپ, وتانسۇيگىش, ىزگى ۇرپاق تاربيەلەۋ, – دەدى ۇلتتىق بايقاۋدىڭ قالالىق كەزەڭىنىڭ ماراپاتتاۋ راسىمىندە ءسوز سويلەگەن شىمكەنت قالالىق ىشكى ساياسات جانە جاستار ىستەرى جونىندەگى باسقارماسىنىڭ باسشىسى مۇراتجان شوتانوۆ.
باسقارما باسشىسىنىڭ ايتۋىنشا, حالقىمىز ەجەلدەن ۇلتتىق جانە وتباسىلىق داستۇرلەرگە بەرىك. بۇل قوعامداعى رۋحاني قۇندىلىقتاردىڭ ساقتالۋىنا وڭ ىقپال ەتەدى. سوندىقتان اتالعان ءىس-شارانى قازاقستاننىڭ الەۋمەتتىك ساياساتىنىڭ ماڭىزدى بولىگى دەۋگە تولىق نەگىز بار.
سونىمەن بىرگە «مەرەيلى وتباسى» ۇلتتىق بايقاۋى – ءبىر شاڭىراق استىندا بەرەكەلى ءومىر ءسۇرۋدىڭ قانشالىقتى ماڭىزدى ەكەنىن تۇسىنۋگە, وتباسىلىق ءومىر سالتى, اتا-انالىق پارىز, جاۋاپكەرشىلىك سەكىلدى ۇعىمداردى ەل ساناسىنا سىڭىرۋگە, اسىرەسە جاستارعا جەتكىزۋگە مۇمكىندىك بەرەدى.
ەندەشە جەڭىمپاز وتباسىنىڭ ءوزى تۋرالى قىسقاشا ماعلۇمات بەرە كەتسەك, بوكستان الەم چەمپيونى, حالىقارالىق سپورت شەبەرى «قۇرمەت» وردەنىنىڭ يەگەرى, ءۇش وليمپيادا ويىندارىنىڭ قاتىسۋشىسى, الەم بىرىنشىلىگىنىڭ قولا جۇلدەگەرى, ازيا چەمپيوناتىنىڭ ەكى مارتە كۇمىس جۇلدەگەرى, قازاقستاننىڭ بىرنەشە دۇركىن چەمپيونى ءبىرجان جاقىپوۆتىڭ اكەسى 69 جاستاعى جاقىپ قۇتتىبەكوۆ بۇگىندە جەكەمەنشىك سپورت مەكتەبىنىڭ ديرەكتورى قىزمەتىن اتقارادى. ال اناسى قارلىعاش زاۋىربەكوۆا سانالى عۇمىرىن جاس ۇرپاققا ءبىلىم بەرۋگە ارناعان ۇلاعاتتى ۇستاز. قىرىق جىلدان استام ۋاقىت بويى شاكىرتتەرگە ماتەماتيكا پانىنەن ساباق بەرگەن قارلىعاش اپاي بۇگىندە قۇرمەتتى ەڭبەك دەمالىسىندا. ەكەۋىنىڭ وتاسقانىنا بيىل – 45 جىل. باقىتتى اتا-انا ءتورت پەرزەنت تاربيەلەپ, ولاردان 15 نەمەرە ءسۇيىپ وتىر.
ماراپاتتاۋ راسىمىندە جەڭىمپازدار مەن قاتىسۋشىلارعا قالا اكىمىنىڭ العىس حاتى مەن باعالى سىيلىقتار تاپسىرىلدى. ال ءىس-شارا سوڭى مەرەكەلىك كونتسەرتكە ۇلاستى.
شىمكەنت