تۇركىستان وبلىسىنا جۇمىس ساپارى بارىسىندا قر پرەمەر-ءمينيسترى ءاليحان سمايىلوۆ «كەرۋەن-ساراي» كەشەنىنە بارىپ, ينۆەستورلارمەن جانە وڭىردە جۇمىس ىستەپ جاتقان تۋريستىك سالا وكىلدەرىمەن كەزدەستى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
پرەمەر-مينيسترگە گاز جانە كۇن ەلەكتر ستانتسيالارىنىڭ قۇرىلىسى, كومىر-حيميا, مۇناي-حيميا جانە كۇكىرت قىشقىلى زاۋىتتارىن, كاۋستيكالىق سودا, پۆح, كالتسي كاربيدى مەن تسەمەنت وندىرەتىن حيميا كەشەنىن, وگەم وزەنىندەگى گەس كاسكادى بار سۋ قۇبىرىن, جىلىجاي كەشەنىن, بورداقىلاۋ الاڭىن سالۋ بويىنشا جانە ت. ب. جاڭا ينۆەستيتسيالىق جوبالار تانىستىرىلدى.
«بۇلاردىڭ بارلىعى دا وبلىس ءۇشىن الەۋمەتتىك جانە ەكونوميكالىق ماڭىزى جوعارى جوبالار. ولار تۇراقتى جۇمىس ورىندارىن قۇرۋعا مۇمكىندىك بەرەدى جانە ونەركاسىپ ونىمدەرىنىڭ كولەمىن ەداۋىر ارتتىرادى. وبلىس اكىمدىگى جوبالاردىڭ ۋاقىتىلى ىسكە اسىرىلۋىن ەرەكشە باقىلاۋعا الىپ, قاجەتتى ينفراقۇرىلىممەن قامتاماسىز ەتۋى ءتيىس», دەدى ءاليحان سمايىلوۆ.
ونىڭ ايتۋىنشا, جاڭا ەلەكتر ستانتسيالارىن ىسكە قوسۋ وڭتۇستىك وڭىردەگى ەنەرگيا تاپشىلىعىن ازايتۋعا مۇمكىندىك بەرەدى, ال جاڭا اگرارلىق نىساندار ەلدىڭ ازىق-ت ۇلىك قاۋىپسىزدىگىن قامتاماسىز ەتۋ تۋرالى پرەزيدەنت تاپسىرمالارىن جۇزەگە اسىرۋعا ىقپال ەتەتىن بولادى.
ءوز كەزەگىندە ينۆەستورلار جوبالارمەن جۇمىس ىستەۋ كەزىندە تۋىنداعان بىرقاتار پروبلەمالىق ماسەلەلەردى كوتەردى. ءاليحان سمايىلوۆ مەملەكەتتىك ورگاندارعا ولاردى مۇقيات قاراپ, زاڭناما شەڭبەرىندە جاردەم كورسەتۋدى تاپسىردى.
سونىمەن قاتار پرەمەر-مينيسترگە ءوڭىردىڭ نەگىزگى باعىتتارى تاريحي-تانىمدىق, قاجىلىق, ەمدىك-ساۋىقتىرۋ, ەكو جانە ەتنوتۋريزم بولىپ تابىلاتىن تۋريستىك سالاسىنىڭ دامۋ قارقىنى تۋرالى باياندالدى. اتاپ ايتقاندا, ءاليحان سمايىلوۆقا «قاسقاسۋ» تۋريستىك-رەكرەاتسيالىق كەشەنىنىڭ جوباسى تانىستىرىلدى, وندا كۇنىنە 4 مىڭعا جۋىق ادام دەمالاتىن بولادى.
«جىل بويىنا ساپالى قىزمەت كورسەتەتىن تۋريزم نىساندارىنىڭ ەكونوميكالىق تيىمدىلىگى قاشاندا جوعارى بولماق. مەنىڭشە, تۇركىستان وبلىسىنىڭ وسى باعىتتا الەۋەتى زور», دەدى ءاليحان سمايىلوۆ.
سونداي-اق ول تۋريستەرمەن جۇمىس ىستەۋ ءۇشىن بىلىكتى كادرلاردى دايارلاۋ ساپاسىنا دا نازار اۋدارۋ كەرەكتىگىن اتاپ كورسەتتى.
پرەمەر-مينيستر جۇمىس ساپارى اياسىندا قوجا احمەت ياساۋي كەسەنەسىنە بارىپ, «ازىرەت سۇلتان» مەملەكەتتىك تاريحي-مادەني مۋزەي-قورىعىن اباتتاندىرۋ جۇمىستارىنىڭ بارىسىمەن تانىستى.