جاڭا ماۋسىم باستالعالى بەرى ەلىمىزدىڭ تۇكپىر-تۇكپىرىندەگى مادەني وشاقتار قىزۋ شىعارماشىلىققا كىرىسىپ كەتتى. جاڭا ماۋسىم – تىڭ جاڭالىق, سونى لەپ. كۇنى كەشە عانا ەلوردا جۇرتى ەركەعالي راحماديەۆ اتىنداعى مەملەكەتتىك اكادەميالىق فيلارمونيا ساحناسىنا بارىپ, اۋەزدى ءان تىڭداپ قايتتى. سيمفونيالىق وركەستر ۇسىنعان «viva musica!» كونتسەرتى XIX عاسىرداعى شەتەلدىك مۋزىكا جاۋھارلارىنا ارنالدى.
سازدى كەشتە دج. ءروسسينيدىڭ «ۆيلگەلم تەل» وپەراسىنا ۋۆەرتيۋرا, س.تانەەۆتىڭ وركەسترمەن كلارنەتكە ارنالعان «كانتسونا», ف.دوپپلەردىڭ وركەسترمەن فلەيتاعا ارنالعان «ۆەنگەرسكايا پاستورالنايا فانتازيا», گ.ۆەنياۆسكيدىڭ شارل گۋنونىڭ وركەسترمەن سكريپكاعا ارنالعان «فاۋست» وپەراسىنداعى تاقىرىپتارعا فانتازياسى جانە ا.دۆورجاكتىڭ «يز نوۆوگو سۆەتا» №9 سيمفونياسى ورىندالدى. ال ساحنادا سيمفونيالىق وركەستردىڭ جەكە ورىنداۋشىلارى – حالىقارالىق جانە رەسپۋبليكالىق بايقاۋلاردىڭ لاۋرەاتتارى داۋلەت سەيداحمەتوۆ (كلارنەت), گۇلناز جولدانوۆا (فلەيتا), مايا مەدەتبەك (سكريپكا) ونەر كورسەتتى. ديريجەرلىك پۋلتتە – باس ديريجەر ەرنار نۇرتازين. سيمفونيالىق وركەستردىڭ كوركەمدىك جەتەكشىسى – حالىقارالىق جانە رەسپۋبليكالىق بايقاۋلاردىڭ لاۋرەاتى بەرىك باتىرحانوۆ.
كونتسەرتتە ورىندالعان «ۆيلگەلم تەلل» وپەراسىنىڭ ۋۆەرتيۋراسى – اۆتوردىڭ (دجواككينو روسسيني) الەمگە ايگىلى ءھام شىعارماشىلىعىندا جۇلدىزدى ساتكە اينالعان وركەسترلىك مۋزىكاسى. ول ءتۇرلى سيمفونيالىق وركەسترلەردىڭ ورىنداۋىندا, كوركەم جانە انيماتسيالىق فيلمدەردە, سونىڭ ىشىندە ۋولت ديسنەيدىڭ ايگىلى «فانتازيا» تۋىندىسىندا ورىندالعانىن بىلەمىز.
جالپى, ءروسسينيدىڭ شەبەرلىگى وپەرانىڭ درامالىق دامۋىنىڭ ۋۆەرتيۋراسىنداعى قىسقاشا كورسەتىلىمنەن, پاستورالدىق-يديلليالىق بەينەلەردەن قاھارماندىققا بىرتىندەپ كوشۋدەن تۇرادى.
ال وركەسترمەن كلارنەتكە ارنالعان «كانتسونا» شىعارماسىن سەرگەي تانەەۆ جاس كەزىندە جازعان. پەسا جانردىڭ تاريحىن باياندايدى – ورتاعاسىرلىق پروۆانس ترۋبادۋرلارىنىڭ ليريكالىق مۋزىكاسىنان باستاپ فرەسكوبالدي مەن يوگانن سەباستيان باحتىڭ اسپاپتىق كانتسوندارىنا دەيىن جانە كەمەلدەنگەن تانەەۆتىڭ دانتەنىڭ سوزىنە جازىلعان «كانتسونا XXXII» رومانسىمەن ۇندەسەدى.
رومانتيزم داۋىرىندە اتاقتى ۆيرتۋوزدار كوپتەگەن كونتسەرتتىك شىعارما جازدى, بىراق قازىرگى ساحناعا تەك ناعىز ونەر تۋىندىلارى عانا ساقتالىپ جەتتى. ماسەلەن, فرانتس دوپپلەردىڭ وركەسترمەن فلەيتاعا ارنالعان «ۆەنگەرسكايا پاستورالنايا فانتازيا» جانە اتالعان كەشتە ورىندالعان گەنريك ۆەنياۆسكيدىڭ شارل گۋنونىڭ وركەسترمەن سكريپكاعا ارنالعان «فاۋست» وپەراسىنداعى تاقىرىپتارعا فانتازياسى بار. بۇل شىعارمالار, ءسوزسىز كوركەمدىك دەڭگەيىمەن, جارقىن ۇلتتىق ناقىشىمەن, اسپاپتاردىڭ ۆيرتۋوزدىق مۇمكىندىكتەرىن تاماشا قولدانۋىمەن تانىمال.
كلاسسيكالىق مۋزىكا كەشى كومپوزيتوردىڭ شىعارماشىلىق شىڭدارىنىڭ ءبىرى انتونين دۆورجاكتىڭ №9 سيمفونياسىمەن جابىلدى. اۆتوردىڭ ءوزى مويىنداعانداي, «تۇسىنە بىلەتىن ادام سيمفونياداعى امەريكا اسەرىن سەزىنۋى كەرەك». شىعارما مازمۇننىڭ تەرەڭدىگىمەن, باي اۋەزدىلىگىمەن ءھام ەرەكشە ليريكاسىمەن باۋراپ الادى. ءتورت بولىمنەن تۇراتىن تسيكل انتونين دۆورجاكتىڭ سيمفونيالىق وركەسترلىك مۋزىكاسىنا ءتان درامالىق شارىقتاۋ شەگى دەسەدى.