وبلىستىق ىشكى ساياسات باسقارماسىنىڭ ۇيىمداستىرۋىمەن قوعامدىق سانانى جاڭعىرتۋ باعدارلاماسىنىڭ باسىمدىقتارىن جۇزەگە اسىرۋ ماقساتىندا ءوڭىرىمىزدىڭ ءبىر توپ جاستارى ەلىمىزدىڭ ەجەلگى قالالارىنىڭ ءبىرى ساناتىنداعى – تارازدىڭ تاريحي نىساندارىمەن تانىسىپ قايتتى.
جاس كوكىرەكتەگى رۋحاني بايلىقتىڭ ەسەلەنگەنى, كوكجيەگىنىڭ كەڭىگەنى قانداي تاماشا. بىلمەككە قۇمار توپتىڭ قۇرامىندا جاستار ۇيىمدارىنىڭ كوشباسشىلارى, بەلسەندىلەر مەن ەرىكتىلەر, جاستارمەن جۇمىس ىستەيتىن ارقيلى مەكەمەلەردىڭ قىزمەتكەرلەرى بولدى. ولار ەكى مىڭ جىلدىق تاريحى بار كونە تاراز قالاسىنىڭ ۋاقىت شىمىلدىعى كولەگەيلەگەن قيساپسىز مادەني ەسكەرتكىشتەرىمەن تانىسىپ, ەستە جوق ەسكى كەزەڭنىڭ سان-سالالى سورابىن ارالاپ, زامانانىڭ جارقىن بەينەسىن كوڭىلدەرىنە توقىپ ورالدى. قازىر ەرەكشە ەستەرىندە قالعان ايشا ءبيبى كەسەنەسى تۋرالى اۋىزدارىنىڭ سۋى قۇرىپ اڭگىمەلەپ ءجۇر. ايشا ءبيبى كەسەنەسى – ورتا ازيا اۋماعىندا عانا ەمەس, يۋنەسكو-نىڭ ادامزاتتىڭ اسا قۇندى جانە ساۋلەت ەسكەرتكىشىنىڭ تىزىمىنە ەنگەن جالعىز ەسكەرتكىش.
جوبا بارىسىندا اقمولا وبلىسىنىڭ دەلەگاتسيالارى «اقىرتاس», «تەكتۇرماس» ەتنو-تاريحي كەشەندەرى مەن «شاحريستان» تاريحي-مادەني كەشەنىندە, اۋليە اتا مەشىتى مەن قاراحان كەسەنەسىندە بولىپتى. عاشىقتار اللەياسىن ارالاپ, جەڭىس ساياباعىندا تىنىستاعان. قازاق حاندىعىنىڭ 550 جىلدىعى قۇرمەتىنە ورناتىلعان مونۋمەنت تۇبىندە ويعا شومىپ, ەل ەرتەڭىن تۇيسىنگەن. جالعىز وتكەننىڭ ونەگەسىن عانا ەمەس, بولاشاقتىڭ باعدارىن دا باعامداعان. قالاي بولعان كۇندە دە يگى ساپاردان تاريحي تانىمدارىن كەڭەيتىپ, كوكىرەكتەرىندە تۋعان جەرگە دەگەن سۇيىسپەنشىلىكتى مولايتىپ ورالعاندارى انىق. بۇل ءبىر رۋحاني الەمىمىزدى نۇرلاندىرعان, جان-دۇنيەمىزدى ەلىمىزدىڭ وتكەن تاريحىمەن كەمەلدەندىرگەن ءساتتى ساپار بولدى دەسەدى ولار.
اقمولا وبلىسى