2022 جىلدىڭ باسىنان بەرى كامەلەتكە تولماعانداردىڭ قاتىسۋىمەن بولعان جول-كولىك وقيعالارىنىڭ كورسەتكىشى وسكەن. بۇل تۋرالى قر ءىىم اكىمشىلىك پوليتسيا كوميتەتى توراعاسىنىڭ ورىنباسارى جاندوس مۇراتاليەۆ ايتتى, دەپ حابارلايدى Egemen.kz.
«بالالار جول قوزعالىسىنا قاتىسۋشىلاردىڭ ەڭ وسال ساناتتارىنىڭ ءبىرى. ادەتتە, بالالار وتە اۋىر جاراقات الادى. بالالاردىڭ جول ەرەجەسىن بىلمەۋى نەمەسە ولاردى ەلەمەۋ سالدارى جول اپاتىنىڭ سەبەبى بولىپ وتىر», دەدى ج.مۇراتاليەۆ.
بايانداماشى بيىلعى توعىز ايدا كامەلەتكە تولماعانداردىڭ قاتىسۋىمەن بولعان جول-كولىك وقيعالارىنىڭ كورسەتكىشى وسكەنىن ايتتى. ماسەلەن, بالالاردىڭ قاتىسۋىمەن 2378 جول-كولىك وقيعاسى تىركەلدى, وندا 181 بالا قازا تاۋىپ, 2826 بالا جاراقات الدى.
جاندوس مۇراتاليەۆ مىسال رەتىندە بيىلعى جىلدىڭ 13 قازانىندا الماتى وبلىسىندا ورىن العان جول-كولىك وقيعاسىن كەلتىردى.
«جۇرگىزۋشى «الماتى-كوكپەك-كوكتال» تاس جولىندا «مەرسەدەس» كولىگىن باسقارىپ كەلە جاتىپ, قارسى جولاققا شىعىپ كەتىپ, «سۋبارۋ لەگاسي» كولىگىمەن جاناما سوقتىعىستى. سوسىن جول جيەگىنەن شىعىپ كەلە جاتىپ, كەدەرگىگە سوعىلىپ, ناتيجەسىندە التى ادام وقيعا ورنىندا قازا تاپتى, ولاردىڭ تورتەۋى كامەلەتكە تولماعاندار ەدى», دەدى جاندوس مۇراتاليەۆ.