مەملەكەت باسشىسى پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى يگور روگوۆتى قابىلدادى. كەزدەسۋ بارىسىندا قاسىم-جومارت توقاەۆقا پرەزيدەنت جانىنداعى ادام قۇقىقتارى جونىندەگى كوميسسيانىڭ قىزمەتى جونىندە ەسەپ بەرىلدى, دەپ حابارلايدى Egemen.kz.
يگور روگوۆ مەملەكەت باسشىسىنا كوميسسيانىڭ وتىرىستارىندا ادام قۇقىقتارىن قورعاۋ سالاسىنداعى ۋاكىلەتتى مەملەكەتتىك ورگانداردىڭ قىزمەتى, سونداي-اق قۇقىق قورعاۋ ورگاندارى مەن ارنايى ورگانداردىڭ قىزمەتىندە ازاپتاۋ فاكتىلەرىنىڭ الدىن-الۋ ماسەلەسى قارالعانىن حابارلادى.
مەملەكەت باسشىسى ادام قۇقىقتارىن قورعاۋ مەملەكەتتىك ساياساتتىڭ ماڭىزدى بولىگى ەكەنىن اتاپ ءوتتى. قازاقستان كونستيتۋتسياسىنا سايكەس, ادام ءومىرى - ەڭ جوعارى قۇندىلىق.مەملەكەت باسشىسىنا ەۋروپا كەڭەسى ۆەنەتسيا كوميسسياسىنىڭ جۇمىسى جونىندە مالىمەت بەرىلدى. يگور روگوۆ – قازاقستاننىڭ اتىنان وسى كوميسسيانىڭ مۇشەسى جانە ومبۋدسمەن ينستيتۋتى جونىندەگى شاعىن كوميسسيانىڭ پرەزيدەنتى. پرەزيدەنتتىڭ ايتۋىنشا, جۋىردا كونستيتۋتسيالىق تۇزەتۋلەردى پىسىقتاۋ بارىسىندا ۆەنەتسيا كوميسسياسىنىڭ ومبۋدسمەن مارتەبەسىن كوتەرۋ جونىندەگى ۇسىنىستارى ەسكەرىلدى. بۇل ادام قۇقىقتارىن ساقتاۋ سالاسىنا باقىلاۋدى كۇشەيتەدى جانە مەملەكەتتى حالىقتىڭ سۇرانىسىنا جەدەل جاۋاپ بەرۋگە ىقپال ەتەدى.سونداي-اق يگور روگوۆ ۆەنەتسيا كوميسسياسى ەلىمىزدە جۇرگىزىلىپ جاتقان قۇقىقتىق جانە ساياسي رەفورمالارعا وڭ باعا بەرگەنىن ايتتى. ايتا كەتسەك, قازان ايىندا ۆەنەتسيا كوميسسياسى, پارلامەنت ءماجىلىسى مەن ادىلەت مينيسترلىگى «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» كونستيتۋتسيالىق زاڭ جوباسىن تالقىلاۋدى جوسپارلاپ وتىر.