ەلوردانىڭ شۇبار شاعىن اۋدانى 2023 جىلدان باستاپ گازداندىرىلا باستايدى. وسى جىلدىڭ سوڭىنا دەيىن ساراپتامانىڭ وڭ قورىتىندىسىن الۋ جوسپارلانىپ وتىر. قازىرگى ۋاقىتتا جوبالاۋ-ىزدەستىرۋ جۇمىستارى جۇرگىزىلۋدە, دەپ حابارلايدى Egemen.kz استانا اكىمدىگىنە سىلتەمە جاساپ.
سارىارقا جانە الماتى اۋداندارىندا ۇيلەردى گازعا قوسۋ مۇمكىندىگى تولىق قامتاماسىز ەتىلگەن. ياعني 10 تۇرعىن الابى مەن 4 شاعىن اۋدانعا (اقبيداي, قازاقاۋىل, نۇر-بەسىك, پوتانين كوشەسى اۋدانىنداعى شاعىن اۋدان) وسىنداي مۇمكىندىك جاسالدى. وسى ماقساتتا قالادا 680 شاقىرىمنان استام گاز تاراتۋ جەلىسى سالىنىپ, كۆارتالىشىلىك جەلىلەر تارتىلدى. اتالعان اۋدانداردا 6,5 مىڭعا جۋىق تۇرعىن ۇيلەرىن گازعا قوستى.
قازىرگى ۋاقىتتا بايقوڭىر جانە ەسىل اۋداندارىندا گاز قۇبىرىن سالۋ جۇمىسى ءجۇرىپ جاتىر. بيىل اۋداندىق تۇران, تەلمان قازاندىقتارىنا, سول سياقتى يلينكا (ۇركەر), ءوندىرىس, تەلمان, پريگورودنىي ەلدى مەكەندەرىنە جانە «Family Village» جانە «Garden Village» شاعىن اۋداندارىنا گاز جەتكىزۋ جەلىلەرىنىڭ قۇرىلىسى باستالىپ كەتتى.
«گازداندىرۋ بويىنشا ىنتالاندىرۋ جانە كومەك كورسەتۋ ءۇشىن بىرقاتار الەۋمەتتىك شارا قابىلداندى: ۇيلەردى گازعا قوسۋعا ارنالعان قۇجاتتار ءتىزىمى ەكى ەسە قىسقارتىلدى, مۇقتاج جاندارعا بولىنەتىن سوما 2 ەسەدەن اسا ۇلعايتىلدى (430 مىڭعا دەيىن), تەگىن نەگىزدە گازدى ەسەپكە الۋ اسپاپتارى (ەسەپتەگىشتەر) بەرىلەدى, گازداندىرۋ ءۇشىن بانكتەر ارقىلى ءبولىپ تولەۋ جانە پايىزسىز كرەديتتەۋ بار», دەلىنگەن حابارلامادا.
ايتا كەتسەك, جەو-1 جانە جەو-2-دە سۋ جىلىتۋ قازاندىقتارى تولىقتاي گازعا اۋىستىرىلدى. سونداي-اق الەۋمەتتىك نىسانداردى گازعا قوسۋ جۇمىسى جۇرگىزىلىپ جاتىر. وسىلايشا, 20 الەۋمەتتىك نىساننىڭ (الماتى جانە سارىارقا اۋدانى) 13-ءى گازعا اۋىستىرىلدى, قالعان 7 نىسان بويىنشا ىسكە قوسۋ-جوندەۋ جۇمىستارى جۇرگىزىلۋدە. بۇرىن ولار اۆتونومدى جىلۋ كوزدەرى ارقىلى جىلىتىلىپ كەلگەن. اتالعان وبەكتىلەردى گازعا اۋىستىرۋ ەسەبىنەن جالپى ۇنەمدەۋ جىلىنا 1 ملرد تەڭگەدەن اسادى.