شەمونايحا اۋدانىنىڭ ورتالىعىندا وڭىردەگى ءىرى ۇن تارتۋ جانە قۇراما جەم كومبيناتى اشىلدى. جاڭا كاسىپورىن تاۋلىگىنە 600 توننادان استام استىق وڭدەي الادى. اۋىلداعى 30 ادامعا جۇمىس ورنىن قۇرعان كومبينات الداعى ۋاقىتتا كورشىلەس ەلدەردىڭ نارىعىنا شىعۋدى جوسپارلاپ وتىر.
كاسىپورىندا ءونىمنىڭ 15 ءتۇرى شىعارىلادى. كومبيناتتىڭ باس ديرەكتورى فارمانالي مامەدوۆتىڭ ايتۋىنشا, مۇندا تاۋىق پەن بالاپانعا, ءىرى قارا مەن شوشقاعا ارنالعان ازىقتىق جەم وندىرىلەدى.
بۇگىندە ايماقتا وزگە وبلىستاردان جانە شەتەلدەردەن جەم ساتىپ الۋعا ءماجبۇر بولىپ وتىرعان شارۋاشىلىقتار جەتەرلىك. سوندىقتان بۇل جوبا كوپتەگەن جەرگىلىكتى اگرووندىرىستىك كەشەندەر ءۇشىن ءتيىمدى بولماق. كومبينات تولىق قۋاتىندا جۇمىس ىستەي باستاعان كەزدە ونىمدىلىك دەڭگەيى ساعاتىنا 25 تونناعا دەيىن ارتادى دەپ كۇتىلۋدە. بۇل ءوڭىردى عانا ەمەس, كورشىلەس ەلدەردى دە مال ازىعىمەن قامتاماسىز ەتۋگە جول اشادى.
ءوندىرىس ورنىنىڭ جۇمىسىمەن تانىسقان ءوڭىر باسشىسى ب.ساپارباەۆ شىعىس قازاقستاننىڭ ەت ەكسپورتىنداعى الەۋەتىن نىعايتۋ ءۇشىن مىقتى جەمشوپ بازاسىنىڭ قاجەتتىلىگىن اتاپ ءوتتى.
– شىعىس قازاقستان وتكەن جىلى 400 توننا ەتتى ەكسپورتقا شىعاردى. اتالعان كورسەتكىشتى ەسەلەۋ ءۇشىن شەتەلدەرگە ساتىلاتىن ەتتىڭ ۇلەسىن كوبەيتۋگە ءتيىسپىز. بۇل ءۇشىن اۋقىمدى جەمشوپ بازاسى قاجەت. بۇگىن اشىلعان كومبينات ءوڭىردىڭ قۇس, شوشقا شارۋاشىلىعىن دامىتۋعا سەپتىگىن تيگىزەدى, – دەدى ءوڭىر باسشىسى.
مامانداردىڭ ايتۋىنشا, وڭىرگە ءونىمدى قايتا وڭدەيتىن كاسىپورىندار كەرەك. سەبەبى, جەرگىلىكتى ءوندىرىستىڭ جەمى ساتىپ الىناتىن ازىقتان 30 پايىزعا ارزانعا تۇسەدى. ال قازىرگى تاڭدا مەملەكەتتىك قولداۋدىڭ ارقاسىندا ءاربىر اۋىل شارۋاشىلىعى مامانى ءوز ءوندىرىس ورنىن اشۋعا مۇمكىندىك الىپ وتىر.
شىعىس قازاقستان وبلىسى,
شەمونايحا اۋدانى.
دۋمان اناش,
«ەگەمەن قازاقستان».
سۋرەتتى تۇسىرگەن
سەرگەي سۋروۆ.