6-12 قازان كۇندەرى رەسپۋبليكا كۇنىنە وراي استانا قالاسىندا قول دوبىنان قىزدار اراسىندا وتكەن قازاقستان رەسپۋبليكاسىنىڭ چەمپيوناتى مارەسىنە جەتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
چەمپيوناتقا ەلىمىزدىڭ استانا, شىمكەنت, الماتى قالارىمەن قاتار, قاراعاندى, پاۆلودار, اقتوبە, اقمولا, الماتى وبلىستارىنان قۇرالعان 8 كوماندا قاتىسىپ, جاس گاندبولشىلار سۋپەرليگا جانە جوعارى ليگا بويىنشا سىنعا ءتۇستى.
ايتا كەتەيىك, ەل چەمپيوناتى 15 جانە ودان تومەن جاستاعى سپورتشىلار اراسىندا ۇيىمداستىرىلدى.
«چەمپيوناتتىڭ نەگىزگى ماقساتى - قالامىزدا بۇقارالىق سپورت ءتۇرىن كەڭىنەن دامىتۋ ارقىلى سالاۋاتتى ءومىر سالتىن قالىپتاستىرۋ قاعيداتتارىن ناسيحاتتاۋ, بارلىق ەلدى مەكەندەردە قول دوبى ويىنىن ودان ءارى دامىتۋ, تۇرعىنداردى دەنە شىنىقتىرۋ مەن سپورتپەن جۇيەلى شۇعىلدانۋعا تارتۋ, قىزدار اراسىندا قول دوبى ويىنىن شەبەرلىك دەڭگەيىن كوتەرۋ, سپورت رەزەرۆىن دايارلاۋدى قامتاماسىز ەتۋ, وبلىس قۇراما كومانداسىن ۇزدىك ويىنشىلارمەن تولىقتىرىپ, الەمدىك دەڭگەيدەگى جارىستارعا قاتىستىرۋ», دەيدى №5 بجمورسم باسشىسى قۋات تلەگەنوۆ.
جارىس قورتىندىسى بويىنشا شىمكەنتتىك گاندبولشىلار پاۆلودار قالاسىنىڭ سپورتشىلارىن ايقىن باسىمدىقپەن ۇتىپ, باس جۇلدەنى ولجالادى. وسىلايشا پاۆلودار قالاسىنىڭ قول دوپشىلارى ەكىنشى ورىننان كورىندى. قولا مەدال الاڭ قوجايىندارى استانا قالاسىنىڭ قىزدارىنا بۇيىردى.
سونىمەن قاتار, شارا بارىسىندا استانا كومانداسىنىڭ قىزدارى قالالىق سپورت باسقارماسىنىڭ باسشىسى سامات ءسابيت ۇلىنىڭ قولىنان «سپورت شەبەرى» كۋالىگىن الدى. ولار: ۇلجان كامەتاي, ءمادينا مىرزامسەيىتوۆا, ءمادينا ەگىنباەۆا, مارجان ەلەۋسىز, ءجاميلا سارسەنبەكوۆا, داميرا جاپاروۆا جانە لۋيزا ولەينيكوۆا.