كەنتاۋ پوليتسياسىنا سانيتارلىق-ەپيدەميولوگيالىق باقىلاۋ بولىمىنەن تۇرعىنداردىڭ جاپپاي ۋلانىپ, اۋرۋحاناعا تۇسكەنى جايلى دەرەك كەلىپ تۇسكەن, دەپ حابارلايدى Egemen.kz.
اتالعان جايت بىردەن قر قك-ءنىڭ 304-بابى 1-بولىگىمەن «سانيتاريالىق قاعيدالاردى نەمەسە گيگيەنالىق نورماتيۆتەردى بۇزۋ» بويىنشا تىركەلىپ, قىلمىستىق ءىس قوزعالدى.
ءتارتىپ ساقشىلارى ءدامحانا قىزمەتكەرلەرىنەن, وقيعا كۋاگەرلەرىنەن جاۋاپ الىپ, سۇراستىرۋ جۇمىستارىن جان-جاقتى جۇرگىزۋدە. سانيتارلىق-ەپيدەميولوگيالىق باقىلاۋ باسقارماسىنىڭ زەرتحانا قىزمەتكەرلەرىمەن ساراپتاما جۇرگىزۋ ءۇشىن جۇمىستار اتقارىلۋدا. ءدامحانانىڭ بارلىق تاعام تۇرلەرى زەرتتەۋگە جىبەرىلدى.
اتالعان تاماقتانۋ ورنىنداعى قىزمەتكەرلەردىڭ بىرقاتارىندا مەديتسينالىق كىتاپشا بولماي شىقتى. قازىرگى ۋاقىتتا بەلگىلى بولعانى – كەنتاۋ مەن تۇركىستان قالاسىنىڭ اۋرۋحانالارىندا 98 تۇرعىن, ال ءۇي جاعدايىندا 70 ادام ەم قابىلداۋدا.
قازىر سوتقا دەيىنگى تەرگەۋ امالدارى جۇرگىزىلۋدە.