ازەربايجان رەسپۋبليكاسىنىڭ پرەزيدەنتى يلحام اليەۆ استانادا وتەتىن ءىرى حالىقارالىق ءىس-شارالارعا قاتىسۋ ءۇشىن قازاقستان رەسپۋبليكاسىنا كەلدى, دەپ حابارلايدى Egemen.kz.
پرەمەر-مينيستر ءاليحان سمايىلوۆ قۇرمەتتى قوناقتى ەلوردا اۋەجايىندا قارسى الدى. يلحام اليەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI سامميتىنە جانە تمد مەملەكەتتەرى باسشىلارى كەڭەسىنىڭ وتىرىسىنا قاتىسادى دەپ كۇتىلۋدە.
ەسكە سالا كەتسەك, 12-13 قازاندا استانادا ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI ءسامميتى وتەدى. سامميتكە ازەربايجان, يراك, يران, قازاقستان, كاتار, قىرعىزستان, پالەستينا, رەسەي, تاجىكستان, تۇركيا, وزبەكستان جانە بەلارۋس باسشىلارى, ۆەتنام ۆيتسە-پرەزيدەنتى جانە قحر توراعاسىنىڭ ورىنباسارى قاتىسادى. 14 قازاندا استانادا دوستاستىقتىڭ جوعارى ورگانى – تمد مەملەكەتتەرى باسشىلارى كەڭەسىنىڭ وتىرىسى وتەدى. ءىس-شارا بارىسىندا تمد الاڭىنداعى ءوزارا ءىس-قيمىلدىڭ وزەكتى ماسەلەلەرىن تالقىلاۋ, ساۋدا-ەكونوميكالىق, مادەني-گۋمانيتارلىق سالالارداعى, سونداي-اق قاۋىپسىزدىك سالاسىنداعى ينتەگراتسيالىق بايلانىستاردى ودان ءارى دامىتۋعا جانە نىعايتۋعا باعىتتالعان بىرقاتار قۇجاتتى قاراۋ جانە قابىلداۋ جوسپارلانعان.