ءبىز تۇرىك رەسپۋبليكاسى باسشىسىنىڭ قازاقستانعا مەملەكەتتىك ساپارىنا ەرەكشە ءمان بەرەمىز. بۇل تۋرالى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ايتتى, دەپ حابارلايدى Egemen.kz.
«بۇگىنگى ساپار ديپلوماتيالىق قارىم-قاتىناستىڭ 30 جىلدىعىنا ورايلاستىرىلىپ وتىر. ونىڭ ۇلكەن سيمۆولدىق ءمانى بار. وسى كەزەڭدە ەكى ەل اراسىندا تىعىز ساياسي ديالوگ, ءوزارا قۇرمەت پەن سەنىمگە نەگىزدەلگەن باۋىرلاستىق قارىم-قاتىناس ورنادى. مارتەبەلى مەيماننىڭ بۇل ساپارى دا ەكىجاقتى ىنتىماقتاستىقتى نىعايتىپ, جەمىستى دە تابىستى بولادى دەپ سەنەمىز. بۇگىنگى كەلىسسوزدەر قازاق-تۇرىك بايلانىستارىن نىعايتا تۇسەتىنى ءسوزسىز», دەدى قاسىم-جومارت توقاەۆ قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ وتىرىسىندا.
قازاقستان رەسپۋبليكاسىنىڭ پرەزيدەنتى تۇركيا قازاقستاننىڭ ەڭ جاقىن جانە سەنىمدى سەرىكتەستەرىنىڭ ءبىرى ەكەنىن ەرەكشە اتاپ ءوتتى.
ء«بىزدىڭ ەلدەرىمىزدىڭ اتا تەگى, ءتىلى, رۋحاني قۇندىلىقتارى ورتاق. تۇرىك مەملەكەتىنىڭ رەسپۋبليكالىق دامۋ جولىن تاڭداعانىنا عاسىرعا جۋىق ۋاقىت ءوتتى. وسىعان وراي, ءسىزدى جانە باۋىرلاس تۇرىك حالقىن تاريحي بەلەسكە جەتۋىڭىزبەن شىن جۇرەكتەن قۇتتىقتايمىن. ەلدەرىڭىز بۇل بەلەسكە ۇلكەن جەتىستىكتەرمەن قادام باسىپ كەلەدى. بۇگىندە تۇركيا ساياسي جانە الەۋمەتتىك-ەكونوميكالىق دامۋ جولىندا ۇلكەن قادامدار جاسادى. ايماقتىق جانە جاھاندىق ماسەلەلەر بويىنشا بەلسەندى جانە تاباندى ساياساتتى ۇستانادى. سونىڭ ارقاسىندا تۇركيا الەمدىك ساياساتتا بەدەلى جوعارى مەملەكەت بولىپ قالا بەرەدى. رەجەپ باي, ەلىڭىزدىڭ بيىك بەلەستەردى باعىندىرۋىنا تىلەكتەسپىن! ءسىز ەكى مەملەكەت اراسىنداعى ىنتىماقتاستىقتى كەڭەيتۋگە زور ۇلەس قوساتىنىڭىزعا سەنىمدىمىن», دەپ تۇيىندەدى ءسوزىن مەملەكەت باسشىسى.