پرەزيدەنت قاسىم-جومارت توقاەۆ پەن قاتار ءامىرى شەيح ءتاميم بەن حاماد ءال ءتاني كەڭەيتىلگەن قۇرامدا كەلىسسوز جۇرگىزدى, دەپ حابارلايدى Egemen.kz مەملەكەت باسشىسىنىڭ ءباسپاسوز قىزمەتىنە سىلتەمە جاساپ.
تاراپتار ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىنتىماقتاستىقتى دامىتۋعا ەرەكشە نازار اۋدارا وتىرىپ, قازاق-قاتار قارىم-قاتىناسىنىڭ جاي-كۇيى مەن دامۋ پەرسپەكتيۆالارىن تالقىلادى.
قازاقستان پرەزيدەنتى قاتاردىڭ الەمدىك ارەنادا ماڭىزدى ءرول اتقاراتىن حالىقارالىق قاۋىمداستىقتىڭ بەدەلدى مۇشەسى ەكەنىن اتاپ ءوتتى.
مەملەكەتتەر باسشىلارى ساۋدا-ەكونوميكالىق بايلانىستاردى نىعايتۋعا ەكى جاقتىڭ دا نيەتتى ەكەنىن ناقتىلادى. قاسىم-جومارت توقاەۆ قاتارلىق كومپانيالارعا جان-جاقتى قولداۋ كورسەتۋگە دايىن ەكەنىن مالىمدەپ, ولاردى ەلىمىزدەگى بىرلەسكەن ينۆەستيتسيالىق جوبالاردى جۇزەگە اسىرۋعا بەلسەندى قاتىسۋعا شاقىردى. اتاپ ايتقاندا, اۋىل شارۋاشىلىعى, ەنەرگەتيكا, مۇناي-حيميا, تاۋ-كەن ونەركاسىبى, قارجى سالالارىندا مول مۇمكىندىكتەر بار ەكەنىنە توقتالدى. قاسىم-جومارت توقاەۆ كەلەسى جىلى قازاقستان مەن قاتار اراسىندا ديپلوماتيالىق قارىم-قاتىناستار ورناعانىنا 30 جىل تولاتىنىن اتاپ ءوتتى.
– بۇل – ەرەكشە مەرەيلى بەلەس. وسى مەرزىم ىشىندە ءبىز تىعىز مەملەكەتارالىق ىنتىماقتاستىق ورناتتىق. سىندارلى ساياسي ديالوگ قۇردىق. وسىنىڭ ءبارى ءداستۇرلى دوستىق پەن بەرىك ارىپتەستىككە نەگىزدەلگەن. استاناداعى ء«ال-فارابي» مەشىتى مەن شەيح ءتاميم اتىنداعى ءبىلىم ورداسى – وسىنىڭ ايقىن كورىنىسى. سونداي-اق, جۋىردا الماتى وبلىسىنىڭ وتەگەن باتىر كەنتىندە پەريناتالدى اۋرۋحانانىڭ قۇرىلىسى باستالدى. ءبىز قاتار مەملەكەتىنىڭ ەلىمىزدى كوركەيتۋگە قوسقان ۇلەسى مەن جان-جاقتى قولداۋىن ەشقاشان ۇمىتپايمىز. بولاشاقتا دا قازاق-قاتار قاتىناستارىن ءارى قاراي دامىتۋعا دايىنبىز, – دەدى مەملەكەت باسشىسى.
ءوز كەزەگىندە قاتار ءامىرى شەيح ءتاميم بەن حاماد ءال-تاني قاسىم-جومارت توقاەۆقا قوناقجايلىق كورسەتكەنى ءۇشىن العىسىن العىس ايتىپ, الداعى رەسپۋبليكا كۇنى مەرەكەسىمەن قۇتتىقتادى.
قاتار ءامىرى قازاقستانمەن اراداعى جان-جاقتى بايلانىستاردى ودان ءارى دامىتۋعا نيەتتى ەكەنىن اتاپ ءوتىپ, ەكىجاقتى ۇكىمەتارالىق كوميسسيانىڭ جۇمىسىن جانداندىرۋ قاجەت ەكەنىن ايتتى. سونداي-اق كوپجاقتى قۇرىلىمدار بويىنشا, ونىڭ ىشىندە اوسشك اياسىنداعى جۇمىستاردى جالعاستىرۋ قاجەت ەكەنىن جەتكىزدى.