كوك مۇنارلى كوكشەتاۋ مەن ءۇزىلىپ تۇسكەن مونشاقتاي كوگىلدىر كولدى قورعالجىننىڭ اراسىنداعى كەڭ كوسىلگەن دالادا مىڭنان استام كول بار. عالىمداردىڭ ساراپتاۋىنا ۇڭىلسەڭىز, 531 كولدە بالىق وسىرۋگە ابدەن بولادى ەكەن.
ايتسە دە, كوكشەتاۋ كولدەرىندەگى بالىقتىڭ باسىم بولىگى باعالى بالىق تۇرىنە جاتا قويمايدى. الداعى ۋاقىتتا وسى ءبىر ولقىلىقتىڭ ورنىن تولتىرۋ مۇمكىندىگى تۋىپ تۇرعانداي. تاياۋدا بۋراباي اۋدانىنا قاراستى اقىلباي اۋىلىندا فورەل وسىرۋگە ارنالعان جابىق ورىن پايدالانۋعا بەرىلدى. وسى ءبىر تاۋەكەلدى ءىستى قولعا العان «Biosphere-fish» جشس ديرەكتورى رۋسلان قۋاتوۆ الدىمەن نارىقتى, كەيىن وسى وڭىردە باعالى بالىقتى ءوسىرۋ جايىن زەرتتەگەن. نەسى بار, مىقتاپ قولعا السا, وڭىنان وڭعارىلاتىن ءتارىزدى. قابىرعاسىمەن كەڭەسە كەلە, اينالىسۋعا شەشىم قابىلداعان. باعالى بالىقتى ءوسىرۋ ءۇشىن كوپ جۇمىس ىستەۋ كەرەك ەكەن. ەڭ باستىسى, ەكولوگيالىق تازا ءونىم. بۇگىنگى تۇتىنۋشىنىڭ ىزدەيتىنى دە وسى.
– سىيىمدىلىعى 25 تەكشە مەتر بولاتىن ارنايى باسسەيندەر دايىندالدى. وعان فرانتسيادان جەتكىزىلگەن فورەلدىڭ العاشقى لەگى, ياعني 70 مىڭعا جۋىق شاباق جىبەرىلدى, – دەيدى ر.قۋاتوۆ. – سىرى بەيمالىم باعالى بالىق ءبىزدىڭ ءمولدىر سۋعا ۇيرەنىپ, وسە باستاعان ۋاقىتتا سانىن دا كوبەيتۋدى مەجەلەپ وتىرمىز.
كاسىپورىننىڭ جوبالىق قۋاتى جىلىنا 40-50 توننا بالىق وندىرۋگە تولىق جەتەدى. شىنتۋايتىندا, بۇل – ەلەڭ ەتكىزەرلىك جاڭالىق. بۇعان دەيىن ءدال وسىنداي باستاما قورعالجىن, تسەلينوگراد اۋداندارىندا قولعا الىنعان بولاتىن.
اقمولا وبلىسى,
بۋراباي اۋدانى