دەنساۋلىق ساقتاۋ ءمينيسترى اجار عينيات ماجىلىستە وتكەن ءباسپاسوز ءماسليحاتىندا ەلىمىزدە بالالار اراسىندا كوروناۆيرۋس جۇقتىرۋ جاعدايلارى ازايىپ بارا جاتقانىن حابارلادى, دەپ جازادى Egemen.kz.
«بالالار اراسىندا كوروناۆيرۋس جۇقتىرۋ جاعدايلارى ءالى دە بار. دەسەك تە, سوڭعى ايلاردا كورسەتكىش تومەندەي باستادى. سەگىز ايدىڭ ىشىندە سەگىز مىڭعا جۋىق بالا كوروناۆيرۋستىق ينفەكتسيامەن اۋىردى, بۇگىندە سىرقاتتانۋشىلىقتىڭ تومەندەۋى بايقالادى», دەدى اجار عينيات جۋرناليستەردىڭ سۇراقتارىنا جاۋاپ بەرە وتىرىپ.
ءمينيستردىڭ ايتۋىنشا, قازىرگى ۋاقىتتا كوروناۆيرۋس جۇقتىرعان 100-دەن استام ناۋقاس ستاتسيونارلاردا ەمدەلىپ جاتىر.
«نەگىزىنەن ەرەسەكتەر اۋىرادى, بالالار اراسىندا ماۋسىمدىق ۆيرۋستىق ينفەكتسيا تاراپ جاتىر. مەن بۇل كوروناۆيرۋستىق ينفەكتسيا نەمەسە باسقا ءبىر جاڭا ينفەكتسيا دەپ ايتا المايمىن. قازىر قازاقستاندا تۇماۋ مەن پاراگريپپكە دايىندالۋ, ۆاكتسيناتسيا ناۋقانى مەن اۋرۋدىڭ الدىن الۋ شارالارى جۇرگىزىلۋدە. كوپجىلدىق باقىلاۋلاردى ەسەپكە الساق, ماۋسىمدىق سىرقاتتانۋشىلىق قاراشا ايىندا كوتەرىلەدى», دەپ تۇيىندەدى اجار عينيات.