ەلوردادا ءىرى حالىقارالىق ءىس-شارالاردى وتكىزۋگە بايلانىستى استانا پوليتسەيلەرى بۇگىننەن باستاپ قىزمەت اتقارۋدىڭ كۇشەيتىلگەن نۇسقاسىنا كوشتى, دەپ حابارلايدى Egemen.kz.
10 قازان ساعات 21.00-دەن باستاپ ستاتسيونارلىق باقىلاۋ بەكەتتەرىنىڭ بازاسىندا ەلوردا اۋماعىنا كىرۋدى باقىلاۋ كۇشەيتىلەدى. بەكەتتەردە قىزمەت اتقارۋدى تاۋلىك بويى قۇرامىندا پوليتسيا قىزمەتكەرلەرى مەن قورعانىس مينيسترلىگىنىڭ اسكەري قىزمەتشىلەرى بار ءموبيلدى توپتار جۇزەگە اسىرادى.
«كوشى-قون زاڭناماسىن بۇزۋشىلىقتاردىڭ الدىن الۋ جانە جولىن كەسۋ ماقساتىندا 1 قازاننان باستاپ «ۋچاسكە» رەسپۋبليكالىق جەدەل-الدىن الۋ ءىس-شاراسى وتكىزىلۋدە. جول قاۋىپسىزدىگىن قامتاماسىز ەتۋگە جانە جول قوزعالىسى ەرەجەلەرىن ساقتاۋعا ەرەكشە نازار اۋدارىلاتىن بولادى. وتكىزىلەتىن ءىس-شارالارعا بايلانىستى قالانىڭ جاڭا اكىمشىلىك ورتالىعىندا جولداردىڭ كەيبىر ۋچاسكەلەرىندە قوزعالىستى ۋاقىتشا ءىشىنارا شەكتەي وتىرىپ, قوناقتاردىڭ ەركىن جۇرۋىنە مۇمكىندىك بەرىلەدى», دەپ جازىلعان تاراتقان حابارلامادا.
استانا قالاسىنىڭ پوليتسيا دەپارتامەنتى ەلوردا تۇرعىندارى مەن قوناقتارىنان وتكىزىلەتىن ءىس-شارالارعا تۇسىنىستىكپەن قاراۋدى سۇرادى جانە ىڭعايلى بولۋ ءۇشىن قوعامدىق كولىكتى پايدالانۋدى ۇسىندى. سونداي-اق جول ءجۇرۋ باعىتتارىن الدىن الا جوسپارلاپ وتىرۋدى ەسكەرتتى.