مۇگەدەكتىك توبىن بەلگىلەۋ ءۇشىن مەديتسينالىق-الەۋمەتتىك ساراپتاما جۇرگىزۋدىڭ سىرتتاي فورماتى بويىنشا قاناتقاقتى جوبانى ىسكە اسىرۋ اياسىندا 2022 جىلعى 1 قازانىنداعى جاعداي بويىنشا قازاقستاننىڭ بارلىق وڭىرىنەن 39,3 مىڭ ءوتىنىم قارالدى.
ۇلتتىق قوعامدىق سەنىم كەڭەسىنىڭ VI وتىرىسىندا مەملەكەت باسشىسى ەرەكشە قاجەتتىلىكتەرى بار ادامدار ءۇشىن بارىنشا قولايلى جاعداي جاساۋدى, ولاردى قاعازباستىلىقتان ارىلتۋدى, ينستانتسيالار بويىنشا ءجۇرۋىن جانە قىزمەت كورسەتۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىرعان بولاتىن. ەڭبەك جانە حالىقتى الەۋمەتتىك قورعاۋ مينيسترلىگى ءباسپاسوز قىزمەتىنىڭ حابارلاۋىنشا, قازىرگى ۋاقىتتا جوباعا 625 مەديتسينالىق ۇيىم قوسىلعان. پيلوتتىق جوبا ارقىلى 2022 جىلى مۇگەدەكتىكتى بەلگىلەۋ بويىنشا سىرتتاي قىزمەت كورسەتۋمەن قامتۋدى 20%-عا دەيىن جەتكىزۋ جوسپارلانعان. بۇل كورسەتكىش بۇگىندە 22,6%-دى قۇرايدى.
مەملەكەت باسشىسىنىڭ تاپسىرماسىن ورىنداۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ جانە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىمەن بىرلەسىپ, قازاقستاننىڭ بارلىق 20 وڭىرىندە جاڭا رەجىمدە مەديتسينالىق-الەۋمەتتىك ساراپتاما جۇرگىزۋدىڭ سىرتتاي فورماتى بويىنشا جاسالعان جوبانى ىسكە اسىرۋدا. مۇگەدەكتىك توبىن انىقتاۋ بويىنشا قىزمەت الۋ ءۇشىن ءوتىنىش بەرۋشى تەك تۇرعىلىقتى جەرى بويىنشا ەمحاناعا بارىپ, قاجەتتى تەكسەرۋدەن ءوتۋى قاجەت, قالعان پروتسەستەر اقپاراتتىق جۇيەلەردى ينتەگراتسيالاۋ ەسەبىنەن ونىڭ قاتىسۋىنسىز وتەدى.
جالپى, سىرتتاي كۋالاندىرۋعا كوشۋ اكىمشىلىك جانە بيۋروكراتيالىق كەدەرگىلەردى جويادى, مەديتسينالىق-الەۋمەتتىك ساراپتامانىڭ ساراپتامالىق شەشىمدەرىنىڭ اشىقتىعىن قامتاماسىز ەتەدى, ۇيدەن شىقپاي-اق مۇگەدەكتىكتى بەلگىلەۋ جانە مۇگەدەكتىگى بار ادامداردى الەۋمەتتىك قورعاۋ شارالارىن ايقىنداۋ بويىنشا قىزمەتتەر الۋعا مۇمكىندىك بەرەدى. سونداي-اق كورسەتىلەتىن قىزمەتتى الۋشىنىڭ كورسەتىلەتىن قىزمەتتى بەرۋشىمەن تىكەلەي بايلانىسىن بولدىرمايدى. وسىلايشا, سىبايلاس جەمقورلىق تاۋەكەلدەرىن بارىنشا ازايتۋ كوزدەلىپ وتىر.