تەاترعا ادام جانى تازارۋ ءۇشىن بارادى. سىرلى ونەردىڭ قوعامعا بەرەر ينتەللەكتۋالدىق يگىلىگى ۇشان-تەڭىز. جەتىسۋ جۇرتى بۇل ەرەكشە اسەردى بيكەن ريموۆا اتىنداعى تالدىقورعان دراما تەاترىنان الادى. بيىل ونەر ورداسى 47-ءشى ماۋسىمىن ۇلى جازۋشى مۇحتار اۋەزوۆتىڭ «قورعانسىزدىڭ كۇنى» تراگەدياسىمەن اشتى. ماۋسىماشار قويىلىم كورەرمەننىڭ كوڭىلىن ءبىر تولقىتتى.
سالتاناتتى جيىنعا ارنايى كەلگەن وبلىس اكىمى بەيبىت يساباەۆ اۋەلى تەاتر مۋزەيىندەگى جادىگەرلەرمەن تانىستى. جارتى عاسىرعا جۋىق تاريح تۇزگەن ونەر وشاعىندا وسىندا قىزمەت ەتكەن تانىمال تۇلعالاردىڭ پورترەتى, ساحنادا ويناعان رولدەرى بەدەرلەنگەن سۋرەتتەر, ساحنالىق كيىمدەر, تەاتردىڭ جەتىستىگىن پاش ەتەتىن باسقا دا ارنايى بۇيىمدار قويىلعان.
زاماننىڭ زاڭعار جازۋشىسى مۇحتار اۋەزوۆتىڭ قالامىنان تۋعان «قورعانسىزدىڭ كۇنى» تراگەدياسى قاي ۋاقىتتا بولسىن وزەكتىلىگىن جوعالتپاق ەمەس. ويتكەنى سەنىم مەن نانىمنان اتتاعان, جاقىن تۇتقان ادامىنان وپىق جەپ جۇرگەن كەيىپكەرلەر قازىرگى ومىردە دە جەتەرلىك. كەشەگى تايعاق كەشكەن زاماندا اكەسى جاقىپتىڭ سۇزەكتەن كەتىپ, ارتىنان اي وتپەي باۋىرىنان ايىرىلعان, كارىلىك مەڭدەگەن اجەسى مەن زاعيپ اناسىنا قارايلاعان عازيزانىڭ تاعدىرى جۇرەك باسىنا ۋ قۇيىپ, كورەرمەندى تەرەڭ ويعا قالدىرادى. جازىقسىز قىزعالداقتىڭ ءجابىر تارتقانى اشكوزدىك پەن تويىمسىزدىقتىڭ, ءناپسىنىڭ كەسىرىنەن ەكەنىن ۇعىندىرادى.
بۇگىندە دە مۇنداي ازعىندار جەتىپ-ارتىلادى. بالدىرعاندارعا كوز قادايتىن ارام نيەتتىلەر زاڭ الدىندا ءوز جازاسىن تارتسا دا, ادام شوشىرلىق قىلمىس ءالى توقتاعان جوق. كەشەگى مەن بۇگىنگىنىڭ اراسىنا وسىلايشا وي جەتەلەتكەن اۋەزوۆتىڭ شەرلى شىعارماسى تالدىقورعان تورىندە ءساتتى ساحنالاندى. ماۋسىماشار قويىلىمدا اكتەرلىك شەبەرلىكتەرىمەن ءتانتى ەتكەن تەاتر مايتالماندارى جۇرت قوشەمەتىنە بولەندى. ونەر يەلەرى وبلىس اكىمىنىڭ ىقىلاس گ ۇلىن الدى.
وبلىس باسشىسى سپەكتاكلدەن سوڭ مادەنيەت وشاعىنىڭ شىعارماشىلىق ۇجىمىمەن تىلدەستى.
«وبلىس ورتالىعىندا وسىنداي اكادەميالىق اۋراسى بار, كلاسسيكالىق ۇلگىدە سالىنعان كەرەمەت عيماراتتىڭ بولۋى قۋانتادى. حالىققا رۋحاني قىزمەت جاسايتىن ءى.جانسۇگىروۆ اتىنداعى مادەنيەت سارايى دا بار. ەندى وسىعان ىشكى مازمۇنىمىز دا ساي بولۋى كەرەك. بۇگىن مۇحتار اۋەزوۆتىڭ كلاسسيكالىق تۋىندىسىن اسەرلى قويدىڭىزدار. مۋزىكامەن كوركەمدەۋدىڭ, تەحنيكالىق مۇمكىندىكتەردىڭ شەبەر قولدانىلعانى بايقالىپ تۇر. كلاسسيكالىق شىعارما قاي داۋىردە دە جاڭعىرىپ تۇراتىن ولمەيتىن تۋىندى. دەگەنمەن قازىرگى زاماننىڭ تىنىسىن تاپ باساتىن, ادامنىڭ ىشكى قالتارىستارىنداعى وزگەرىستەردى, جاڭعىرۋلاردى اشاتىنداي دۇنيەلەردى دە جارىققا شىعارۋ كەرەك. سىزدەر ىزدەنىسپەن جاڭا شىعارمالار جازىپ, ۇسىنساڭىزدار, مەن ءاردايىم قولدايمىن», دەدى ب.يساباەۆ.
كەزدەسۋ بارىسىندا قازاقستاننىڭ حالىق ءارتىسى الماحان كەنجەبەكوۆا, قازاقستاننىڭ ەڭبەك سىڭىرگەن قايراتكەرى ءاليحان ىدىرىشەۆا باستاعان تەاتر ارتىستەرى حاس سۇلۋدىڭ كوز جاسىنداي ءمولدىر ونەردى وركەندەتۋ باعىتىندا پىكىر ءبولىستى.
جەتىسۋ وبلىسى